Read Ntcham Lévitique 5 Bible Online

Lévitique 5 - Ntcham bible

Lévitique 5

¹«Bi yaa bíi sòoǹ tibɔti ní ubɔ ká tibɔtee nín jítì puee ní bi yíiń udaan ú dāá sòoǹ tin u kée, ní u yaa yíì kaa cūtèe, udaan ŋá ikpiti ki fōō dibɔkpil[5].

²«Ubɔ yaa kaa nyí ní ki gbēē tiwan tin kaa bí circiree kansikin kubɔ, an yaa sá upeel àá kuwaŋkuluu kun kaa bí circiree kubɔ di yaa kpíì àá tin fù ti-pool puee kubɔ di yaa kpíì ní u gbēēyee, u kɔ́ tijɔkɔndi ní ki fōō dibɔkpil.

³«Ubɔ yaa tí gbēē unil jɔkɔnti, àá tin kamaa pée kɔ̄ntí unil tijɔkɔndee kaa kpáàa béèyee, bi yaa láa pée tùkū-u ní u béèyee, udaan fōō dibɔkpil.

⁴«Àá ubɔ yaa bíi sòoǹ ní u-nyɔkɔ ŋmátì-u ní u pūtì kí ŋá tikpitil àá tiŋan ní boonee ki dāa béèyee, udaan fōō dibɔkpil[6].

⁵«Ubɔ yaa ŋá ikpiti nee kansikin ibee, udaan máaǹ kí bìitī u-kpitii gbanti pu.

⁶Míǹ boonee, u máaǹ kí cáań upisal àá uŋɔsal kí ŋá saraa kí tīī ti-Dindaan kí ŋāŋkì u-bɔkpil. Ní usaraaŋal ń ŋá udaan pu dikoobil din u máaǹ kí ŋá ní ú ká u-kpitii pɔ̄tamee.»

⁷«Ubɔ ŋaan yaa kaa nyìm̀ ú dā upii àá uŋoobuee, u ŋūǹ kí cáań nnanjilimu muli àá abeenanjil ali kí ŋāŋkì u-bɔkpil. Ú dū diba kí ŋá ikpiti pɔ̄tam saraau ní kí dū din kíǹee kí ŋá saraawɔkaa.

⁸Ú cáań kí tīī usaraaŋal ní úǹ ń lēē unoon un sá bí dūú ŋá ikpiti pɔ̄tam saraauee, ní kí míkí kí gíí u-sil kí nákáǹ u-kpaŋkpantaapu, ama ní diyil ń taa tùkutī.

⁹Usaraaŋal ń dū fatiku kí còol̀ nsaraafan kpiŋŋi pu ní kí dū un kíǹee kí kpáatí kí pɔ̀l̄ nsaraafan taapu. Ikpiti pɔ̄tam saraau dee.

¹⁰Míǹ boonee, ú dū unoon un kíǹee kí ŋá saraawɔkaa kii mara nín sá puee. Ní usaraaŋal ń ŋá udaan pu dikoobil din u máaǹ kí ŋée ní ú ká u-kpitii pɔ̄tam.

¹¹«U yaa kaa tí cáá nnanjilimu muli àá abeenanjil alee, u ŋūǹ kí cáań ŋyim kiiloobi bita kí ŋá ikpiti pɔ̄tam saraau. Ama ú taa dū ŋkpam nì talaalutuukaa kí kūtì, kun puee an sá ikpiti pɔ̄tam saraau ní.

¹²Ú cáań kí tīī usaraaŋal ní úǹ ń yáfí diŋaŋkul din sá kudaaŋŋu ti-Dindaan nimbiin yii úǹ di yì saraa gbantee, ní kí dūú wà nsaraafan pu kí kpáaǹ saraabi bin bi dùú wà ŋŋmi kí tīī ti-Dindaanee. Ikpiti pɔ̄tam saraau dee.

¹³Ní usaraaŋal ń ŋá udaan pu dikoobil din u máaǹ kí ŋée ní ú ká u-kpitii pɔ̄tam. «Usaraaŋal ń ŋá saraa nee kii bi nín ŋáań tijimpin saraau puee.»

¹⁴Ti-Dindaan bí Mooyiisi yii:

¹⁵«Ubɔ yaa kaa nyí ní ki dū saraabi bin sá ki tīī ti-Dindaanee ki ŋá min kaa kítèe ní ki kɔ́ diyìntilinee, udaan máaǹ kí cáań upìja un laaba kaa wɔ̀b̄ee. Ú lēē upìja gbanti u-picaŋkpuŋkun, u-daaku ń nīn nóó nì circir kɔŋkooŋŋu nimbiliŋ ŋmàntitam kí cáań kí ŋá saraa kí ŋāŋkì u nín yīntiǹ ti-Dindaan puee.

¹⁶Udaan nín bàà máaǹ kí cáań tin circir kɔŋkooŋŋun ní kaa cáańee, ú téeǹ míǹ ní kí kūtì bi yaa yākatì tin u cáańee miŋmoo puee diba pu. Ní usaraaŋal ń fōō upìjee kí ŋá udaan pu dikoobil din u máaǹ kí ŋée ní ú ká u-kpitii pɔ̄tam.

¹⁷«Ubɔ yaa kaa nyí ní ki yīntì ki ŋá tin ti-Dindaan marab nee kansikin ubɔ bí yii bí taa ŋée, udaan ŋá ikpiti ki fōō dibɔkpil.

¹⁸Udaan máaǹ kí cáań upìja un laaba kaa wɔ̀b̄ee kí tīī usaraaŋal. Ú lēē upìja gbanti u-picaŋkpuŋkun, u-daaku ń nīn nóó nì kudaau kun bi síiǹ dibɔkpil saraauee. Usaraaŋal ń ŋá udaan pu dikoobil din u máaǹ kí ŋée ní ú ká u-kpitii in waa nyí ki ŋée pɔ̄tam.

¹⁹An sá saraa un ŋáŋkí dibɔkpilee ní, di sá yii unilee nìn baasii fōō dibɔkpil ní ti-Dindaan nimbiin.»

²⁰Ti-Dindaan bí Mooyiisi yii:

²¹«Ubɔ yaa kaa síl̀ nì ti-Dindaan deedee, ki yaa mɔ́ntì u-nabiki tiwan tin u dūu kpāaǹ-uee pu àá tiwan tin u pīnnèe àá tin u yùn̄ u-nabikee àá tin u fìkēe.

²²Tiwan tiba di yaa tí wáŋkì ní u píí ní ki bí ki néè yii waa ká kudɔŋu àá u yaa pūtì fám kí ŋmā kí bìin̄ ikpiti iba puee,

²³u ŋá ikpiti ki fōō dibɔkpil. U máaǹ kí téeǹ tin u yùn̄ee àá tin u fìkēe àá tin bi kpāaǹ-uee àá tin u pííyee,

²⁴àá tiwan tin pu ní u pée pūtì fám yii waa kée. U máaǹ kí téeǹ tiwan tin u yōoǹee kɔkɔ ní kí gíti nyàab̀ tiwan gbanti yaa yākatì miŋmoo puee diba pu kí kūtì kí tīī uwandaan ŋwiin ŋun u yaa béè yii u ŋá ikpitee.

²⁵Míǹ boonee ní ú cáań upìja un laaba kaa wɔ̀b̄ee kí nóó nì dibɔkpil saraau daaku kí tīī usaraaŋal ní úǹ ń dūú ŋá saraa kí tīī ti-Dindaan.

²⁶Usaraaŋal ń ŋá udaan pu dikoobil din u máaǹ kí ŋée ti-Dindaan nimbiin ní ú ká u-kpitii in ní u ŋá ki fōō dibɔkpilee pɔ̄tam[7].»