Read Ntcham Lévitique 8 Bible Online

Lévitique 8 - Ntcham bible

Lévitique 8

¹Ti-Dindaan[13] bí Mooyiisi yii:

²«Yíiń Aarɔn nì u-jipɔmbi, kí cáań asaraaŋabɔkuti nì ŋkpam nì ikpiti pɔ̄tam nabil nì ipijaa ili nì kpɔnɔb bin baa ŋá ŋkpɔnɔnyɔkɔee an nīn kā kukabikun.

³Míǹ boonee á yíiń samaa kɔkɔ ń kpāfì circir kɔŋkooŋŋu punyɔkɔki nyɔkɔpu.»

⁴Ní Mooyiisi ŋá ti-Dindaan nín bí yii ú ŋá puee ní samaa kɔkɔ kóoǹ ki kpáfì circir kɔŋkooŋŋu punyɔkɔki nyɔkɔpu.

⁵Niinee ní Mooyiisi bí samaa yii: «Kpèèmaan ti-Dindaan nín bí yii tí ŋá puee sɔ̀.»

⁶Ní Mooyiisi cáań Aarɔn nì u-jipɔmbi nyɔkɔpu ki yāntì bi fùl̄ nnyim kí nyā kí nīn bí circir.

⁷U nìn dū poon bɔkutil ki pēeǹ Aarɔn ní ki dū ŋŋaabu dambalau ki gbìn̄-u, ní ki dū dibɔkutifɔkɔl mun ki pēeǹ-u, ní ki dū eefoodi[14] ki léeǹ-u, ní ki dū dambala un kā eefoodi puee ki cúú u-caŋ.

⁸U nìn dū kilɔbiki kin pāantí usaraaŋakpil bindi puee ki páaǹ-u ní ki dū Uriim nì Tumiim ki ŋá kilɔbikee poon[15].

⁹U nìn dū ŋŋaabu ki fìn̄ u-yil ní ki dū sindaariya un bi nyūntì ki nántiǹ mpumpukumee ki nákáǹ nyɔkɔpu kí dàkà yii bi dū-u ki sú disaraaŋal tundi, kii ti-Dindaan nín nìn tùkū Mooyiisi yii ú ŋá puee.

¹⁰Mooyiisi yōoǹ ŋkpam ní ki bātì ki yāaǹ circir kɔŋkooŋŋu pu nì tin kɔkɔ bí ŋu-poonee ní ki dū tiwanee kɔkɔ ki sú ti-Dindaan.

¹¹U nìn dū ŋkpamee ki yāaǹ nsaraafan pu ŋfunyɔm miluli ní ki bātì ki sītì nsaraafan pu nì tin kɔkɔ bi cáa tūǹ ŋu-pu ditundee nì kusampeeu[16] nì kun pu ku tɔ́kɔ́ee ki dū an wantee kɔkɔ ki sú ti-Dindaan.

¹²U ŋá míǹ ki dóòyee ní ki bātì ŋkpamee ki sītì Aarɔn yil pu ki dū-u ki sú ti-Dindaan.

¹³Míǹ boonee ní Mooyiisi yāntì Aarɔn jipɔmbi mun sútì ki pìl̄-u ní u dū bi-bɔkutiŋ ki pēeǹ-bi ní ki dū dambalab ki gbìn̄-bi ní ki dū iŋaabu ki fìn̄ bi-yiliŋ kii ti-Dindaan nín bí yii ú ŋá puee.

¹⁴U dóòyee ní ki dātìń dinabil din bi làá dūú ŋá ikpiti pɔ̄tam saraauee ki cáań, ní Aarɔn nì u-jipɔmbi dū bi-ŋalii ki páaǹ di-yil pu.

¹⁵Ní Mooyiisi lāntì-dì ní ki dū u-ŋambiki ki sēē fatiku ki dūu jōō nsaraafan yiŋyi pu ki māntìi tú ki ŋá-ŋu circir. U nìn dū fatiku un kíǹee ki kpáatìi pɔ̀l̄ nsaraafanee taapu. Míǹ ní u ŋá ní ki dū nsaraafan ki sú Unimbɔti, bí nīn ŋáań ikpiti pɔ̄tam saraau ŋu-pu[17].

¹⁶Mooyiisi yōoǹ ŋkpam min kɔkɔ bīī ina puee nì mpɔɔlam nì aceebil liitil nì ŋkpam min bīī ŋi-puee ki cáa wùn̄ ŋŋmi nsaraafan pu.

¹⁷Ama bi yōoǹ dinabilee gbaŋŋu nì di-nanti nì di-bintee kɔkɔ ki cáa wùn̄ ŋŋmi dinaapaal kpaanceetiŋu kii ti-Dindaan nín kpáafì Mooyiisi yii ú ŋá puee.

¹⁸Niinee ní Mooyiisi tí dātì upìja un bi làá dūú ŋá saraawɔkaayee ki cáań ní Aarɔn nì u-jipɔmbi dū bi-ŋalii ki páaǹ u-yil pu.

¹⁹Ní Mooyiisi lāntì-u ní ki dū fatiku ki yāaǹ nsaraafan kɔkɔ pu ki māntìi tú.

²⁰Mooyiisi càkā upìjee nanti ní ki dū diyil nì ŋkpam ki dūu kútì ki wùn̄ ŋŋmi.

²¹U dū nnyim ki fíntì ina nì ayaka ní ki dū upìjee nanti tin kíǹee kɔkɔ ki kútì ki dūu wùn̄ ŋŋmi nsaraafan pu ki ŋá saraawɔkaa, ní saraayee sɔnsɔfiŋu sɔ̄ŋkì ti-Dindaan pɔbil kii ti-Dindaan nín nìn kpáafì-u yii ú ŋá puee.

²²Míǹ boonee ní u dātì upìjaliliiti ki cáań bí dūú ŋá saraa, bisaraaŋaliibi ń kíĺ bi-saraaŋatundi, ní Aarɔn nì u-jipɔmbi dū bi-ŋalii ki páaǹ upìjee yil pu.

²³Ní Mooyiisi lāntì-u ní ki dū fatiku ki jōō Aarɔn tafalam ŋgiil yal pu nì u-ŋambijal ŋgiil yal pu nì u-taŋambijal ŋgiil yal pu.

²⁴Boonee ní Mooyiisi yāntì Aarɔn jipɔmbi sútì ki pìl̄-u ní u dū fatiku ki jōō bi-tafalam ŋgiil yaŋ pu nì bi-ŋambijaliŋ ŋgiil yaŋ pu nì bi-taŋambijaliŋ ŋgiil yaŋ pu ní ki dū fatiku un kíǹee ki kpáatìi pɔ̀l̄ nsaraafan ki māntìi tú.

²⁵Mooyiisi lēē ŋkpam nì dijugbindi[18] nì ŋkpam min bīī ina puee nì mpɔɔlam nì aceebil liitil nì ŋkpam min bīī ŋi-puee nì diŋaŋgiitaal.

²⁶Kikabiki kiba nìn yú niin bi dū-kì ki sú ti-Dindaan. Kpɔnɔb bin baa ŋá ŋkpɔnɔnyɔkɔee nìn kā poon. U nìn lēē kpɔnɔb bin bi dū ŋkpam ki búuń ki púĺ ŋkpɔnɔnyɔkɔ kpá poonee ubɔ, nì ŋkpɔnɔwaamu mun pu bi yɔ́kɔfì ŋkpam ki púĺ ŋkpɔnɔnyɔkɔ kpá poonee ubɔ, nì kalaabi bin bi dū ŋkpam ki ŋmālim̀ ki búuńee ubɔ. U nìn dū kɔkɔ ki páaǹ upìjee kpam nì u-ŋaŋgiitaal pu.

²⁷Ní Mooyiisi dūu ŋúbiǹ Aarɔn nì u-jipɔmbi ní bi dúkutì yilpu ki fíiǹ fíiǹ ti-Dindaan nimbiin.

²⁸Bi ŋá míǹ ki dóòyee ní Mooyiisi fātìi fōō bi-ŋaan ki dūu páaǹ saraawɔkaa un pá nsaraafan puee ki wùn̄ ŋŋmi. Míǹ ní bi nìn ŋá saraabi ní bisaraaŋaliibi kíĺ bi-tundi, ní saraayee sɔnsɔfiŋu nìn sɔ̄ŋkì ti-Dindaan pɔbil.

²⁹Mooyiisi nìn yōoǹ upìjee bindi, ki dúkutì yilpu ní ki fíiǹ fíiǹ ti-Dindaan nimbiin. Dijandi gbanti ní bi nìn dūu tīī Mooyiisi kii ti-Dindaan nín nìn síiǹ-u mara puee.

³⁰Niinee Mooyiisi yōoǹ ŋkpam nì fatiku un nìn bí nsaraafan puee ki dūu yāaǹ Aarɔn nì u-wampeeŋkaati pu nì u-jipɔmbi mun nì bi-wampeeŋkaati pu. Míǹ ní u ŋá ki dū Aarɔn nì u-jipɔmbi nì bi-wampeeŋkaati kɔkɔ ki sú ti-Dindaan.

³¹Niinee ní Mooyiisi bí Aarɔn nì u-jipɔmbi yii: «Tɔ́kɔḿmaan tinan dikpafindi tantiu punyɔkɔki nyɔkɔpu. Ni yaa tɔ́kɔǹ-tèe, ní ŋmɔ́-tì niin nì kpɔnɔb bin kā kikabikin bi cáań ki ŋá saraayee kii m nín nìn tīī-si mara ki lī yii: <Aarɔn nì u-jipɔmbi di làá ŋmɔ́-tèe.>

³²Tinan nì kpɔnɔb bin ni ŋmɔ́ an kíǹee, ní dūú wà ŋŋmi.

³³Naa máaǹ kí yīkì circir kɔŋkooŋŋu punyɔkɔki nyɔkɔpu kí cáá sāā iwiin iluli dal. Naa máaǹ kí nyā áli iwiin iluli in bi síiǹ kí dūú ŋá saraabi ní kíĺ disaraaŋal tundee ń kúntí.

³⁴Kii ti nín ŋá pu díǹ nee, ti-Dindaan u-ba di síiǹ mara yii tí ŋá míǹ ní ní ká ni-kpitii pɔ̄tam.

³⁵Ni máaǹ kí nīn bí circir kɔŋkooŋŋu punyɔkɔki nyɔkɔpu ŋwiimpu nì kunyeeu kí cáá sāā iwiin iluli. Mimmee ni ŋūǹ kí tɔ̄ ti-Dindaan tundi kí taa kpú. Ti-Dindaan nín kpáafì-mi yii ḿ ŋá puee dee.»

³⁶Aarɔn nì u-jipɔmbi ŋá tin kɔkɔ ti-Dindaan dī Mooyiisi pu ki síiǹ-bi yii bí ŋée deedee.