Read Ntcham Lévitique 9 Bible Online

Lévitique 9 - Ntcham bible

Lévitique 9

¹Ŋwinniniiti dalee ní Mooyiisi yíiń Aarɔn nì u-jipɔmbi nì Isirayeel yab kpilib.

²U nìn bí Aarɔn yii: «Nyàab̀ dinabil kí dūú ŋá a-kpitii pɔ̄tam saraau nì upìja kí dūú ŋá a-saraawɔkaau. Tiwaŋkutee liitil laaba ń taa nīn wɔ̀b̄ ní á cáań-tì ti-Dindaan nimbiin.

³Míǹ boonee á tùkù Isirayeel yab bí cáań uŋɔja kí dūú ŋá ikpiti pɔ̄tam saraau nì dinabil din cáá dibindi dibee nì dipibil din cáá dibindi dibee ŋi-laaba ń taa nīn wɔ̀b̄ bí dūú ŋá saraawɔkaa.

⁴Bí cáań unaja nì upìja kí ŋá mpèé saraau kí tīī ti-Dindaan, ní kí dū ŋyim min bi dū ŋkpam ki búuńee kí ŋá tijimpin saraau. Kun puee díǹ nee, ti-Dindaan làá nyāntí u-ba kí dàkà-ni.»

⁵Ní bi cáań tin kɔkɔ Mooyiisi bālifèe circir kɔŋkooŋŋu nyɔkɔpu, ní samaa kɔkɔ sútìń ki kíǹ ki sí ti-Dindaan nimbiin.

⁶Ní Mooyiisi lī yii: «M làá dàkà-ni tin ti-Dindaan kpáafì-ni ní ŋée. Ni yaa lafun ŋá míǹ, u làá lēē u-nyooti kí dàkà-ni.»

⁷Niinee ní Mooyiisi bí Aarɔn yii: «Sútí kí pìl̄ nsaraafan kí ŋá a-kpitii pɔ̄tam saraau nì a-saraawɔkaau, kí pítí a-kpitii nì samaa kpitii. Míǹ boonee á ŋá saraabi bin ní samaa cáańee kí pítí bi-kpitii, kii ti-Dindaan nín síiǹ mara puee[19].»

⁸Ní Aarɔn sútì ki pìl̄ nsaraafan ní ki lāntì úǹ u-ba kpitii pɔ̄tam saraau nabil.

⁹Ní u-jipɔmbi cáań-u fatiku ní u dū u-ŋambiki ki sēē fatikuee ki dūu jōō nsaraafan kpiŋŋi pu ní ki kpáatì un kíǹee ki pɔ̀l̄ nsaraafan taapu.

¹⁰U dū ŋkpam nì aceebil nì mpɔɔlamee ki wùn̄ ŋŋmi nsaraafan pu kii ti-Dindaan nín nìn kpáafì Mooyiisi puee.

¹¹Ama ní ki yōoǹ tinan nì ŋgbanee ki nyántì dinaapaal kpaanceetiŋu ki wùn̄ ŋŋmi.

¹²Míǹ boonee ní Aarɔn lāntì upìja un bi cáań kí ŋá saraawɔkaayee, ní u-jipɔmbi cáań-u fatiku ní u dūu yāaǹ nsaraafan pu ki māntìi tú.

¹³Bi càkā upìjee nanti ní ki dū diyil ki kútì ki tīī-u ní u dūu wùn̄ ŋŋmi nsaraafan pu.

¹⁴U fíntì ina nì ayaka ki dūu páaǹ saraawɔkaa un pá nsaraafan puee ki wùn̄ ŋŋmi.

¹⁵Míǹ boonee ní Aarɔn cáań samaa kɔkɔ saraabi: u yōoǹ samaa kɔkɔ kpitii pɔ̄tam ŋɔjau ki lāntì ki ŋá saraa kii u nín bàà ŋá dinabil puee.

¹⁶Bi cáań saraawɔkaa waŋkutee nyɔkɔpu ki ŋá saraa kii bi nín síiǹ mara bí nīn ŋáań-u puee.

¹⁷Bi yōoǹ tijimpin saraau ki yáfì diŋaŋkul ki dūu wùn̄ ŋŋmi nsaraafan pu, ki kpáaǹ saraawɔkaa un bi ŋáań kutaafaau kamaayee.

¹⁸Boonee ní u lāntì unaja nì upìja un samaa kɔkɔ cáań kí ŋá mpèé saraauee[20], ní u-jipɔmbi cáań-u fatiku ní u dūu yāaǹ nsaraafan pu ki māntìi tú.

¹⁹Bi gíti tí cáań-u unajee nì upìjee kpam, an dàkà yii ajugbin nì ŋkpam min pá ina puee nì aceebil nì mpɔɔlam,

²⁰ní ki dūu páaǹ unajee nì upìjee biŋŋi pu ní Aarɔn dū ŋkpamee ki wùn̄ ŋŋmi nsaraafan pu.

²¹Aarɔn yōoǹ tiwaŋkuti biŋŋi nì diŋaŋgiitaal yilpu ní ki fíiǹ fíiǹ ti-Dindaan nimbiin kii Mooyiisi nín nìn pée síiǹ-u mara puee.

²²Ŋyunti ŋun Aarɔn ŋá ikpiti pɔ̄tam saraau nì saraawɔkaa nì mpèé saraau ki dóòyee ní u yōoǹ u-ŋalii ki túĺ samaa[21] ki mēē ki bīiǹ bi-pu ní ki kpákatì nsaraafan pu.

²³Mooyiisi nì Aarɔn nín kóò dikpafindi tantiun. Bi dāa fātìi nyánnée ní ki mēē ki bīiǹ samaa kɔkɔ pu. Niinee ní ti-Dindaan nyántì u-nyooti ki dàkā samaa kɔkɔ.

²⁴Ní ŋŋmi ŋubɔ nyánní ti-Dindaan nimbiin ki dɔ́miń ki wùn̄ saraawɔkaa nì ŋkpam min pá nsaraafan puee. Samaa kɔkɔ nín ká mimmee ní bi fáá iwiliili nì dipɔɔpindi, ní ki tātìi dōoǹ dicincibil.