Read Ntcham Jérémie 10 Bible Online

Jérémie 10 - Ntcham bible

Jérémie 10

¹Isirayeel yab, pīlifìmaan tibɔti tin ti-Dindaan sòon̄ ni-puee!

²U bí yii: «Ní taa nín̄ túŋkíǹ atimbun ŋin kíǹee! Ní taa fàŋkì tidaandi tin nyēē ki pāantí kutagbɔŋu puee. Atimbun ŋin kíǹee di fàŋkí an wanti.

³Di sá yii anibul ŋin kíǹee koobiliŋ kaa bí tiban! Bi gà ndɔ kubambaŋŋun, ní ukpiŋkpiiti ń dū kicɔkɔ kí kpítí diwaal.

⁴U dù animbil kúti nì sindaariya kí nyɔ̀kɔntì-dì, ní kí dū dikújal nì mpiin kí kpáá-dì kí nákań, dí nīn pɔ̄ɔ̄ kí taa nín̄ cìŋkī.

⁵Awaa gbanti náań nì tiwan tin bi sākaǹ diputaajul kpaabun ki fàantí inoonee ní. Awaa gbanti kaa sòoǹ. Bi tūntí-ŋi ní, di sá yii ŋaa ŋūǹ kí còom̀. Taa fàŋkìmaan-ŋi, di sá yii ŋaa ŋūǹ kí ŋá tikpitilaaa, kaa ŋūǹ kí ŋá tiŋan mun.»

⁶Sii, ti-Dindaan, ubɔ kaa bí kii siiyee! A sá ukpaan, ní a-yindi sá dikpaandi ki cáá mpɔn.

⁷Ŋma di kaa fàŋkí sii atimbun bɔtiu? Kun puee sii ní bi máaǹ kí fàŋkì. Di sá yii duulinya ciŋfitiibi kansikin, nì abee kɔkɔ poonee, ubɔ kaa bí kii siiyee[17].

⁸Bi-kɔkɔ nín bí pu nee, ugàntil kpá, bi sá bigbaambi kaa nyí tiba. Bi-waaŋi kaa ŋūǹ kí dàkà-bi tiba, di sá yii ŋì sá idɔ ní.

⁹Ukpiŋkpiiti di kpítì-ŋi, ní ukúduntil dūu tikúti ki dūntì ki nyūntì-ŋi ní ki dū animbil kúti tin nyánní Taarsiisi tiŋkinee, nì sindaariya un nyánní Ufasi tiŋkinee ki nyɔ̄kɔntì-ŋi. Míǹ boonee ní bi dū iŋaaman cínciŋ nì in máǹ wèeeeyee ki ŋáĺ dibɔkutil ki pēeǹ-ŋi. Bin nyí iŋal pu tundi tiŋanee di mɔ́ɔ̀ an wanti.

¹⁰Ama ti-Dindaan di sá Unimbɔti tiŋman pu yɔu. U sá Unimbɔti un bí dimaŋfalinee, ki sá ubɔti kí nīn cá jaanjaan. U yaa fōō diŋuulee, kitiŋ cìŋkī ní, ní atimbun kaa ŋūǹ kí yūĺ u-bum nimbiin.

¹¹Kpèè ni nín làá sòoǹ nì bi puee sèé: Bi máaǹ kí kúntí awaa ŋin kaa náań yilpu nì taapuee, ŋi máaǹ kí wāŋkì kutagbɔŋu taapu.

¹²Ti-Dindaan di dū u-pɔŋŋu ki ŋá kitiŋ, ki dū u-ciiŋŋu ki náań duulinya, ki dū u-nyil ki kpátì kutagbɔŋu ki dāntì.

¹³U yaa téeńee, inyiŋfi kōontí ní kí kpāfì kutagbɔŋu pu. U yàntī atagbaŋkpaan ń nyānní kitiŋ gbeennyɔkɔ kí jɔ̄m̀. U yàntī utaa ń ŋmɔ́ kí cáań utaa, ní ki nyāntiń kubuŋu ku-walimbookun.

¹⁴Binib kɔkɔ bākatì sèee, kaa ti nyí tin poon bi bée. Awaa ŋin bikúduntiliibi mɔ́ɔ́yee cáá-bi icoo. Awaa gbanti sá tinyimɔmbɔti ní. Ŋaa cáá kufoou.

¹⁵Ŋì sá tiwan tin kaa bí tibanee, ki mɔ̄ tilaal. Ŋwiin ŋun ti-Dindaan làá yīkì ŋi-puee, ŋì làá wāŋkì ní.

¹⁶Ama Unimbɔti un sá Jaakɔb gaajawantee, kaa bí kii ŋíǹ nín bí puee. Jaakɔb Nimbɔtiu di náań duulinya kɔkɔ, ní Isirayeel naakooku sá u-fakal. U-yindi di sá ti-Dindaan Mpɔŋkɔdaan.

¹⁷Jeerusaleem, sii un bi māntìi túee, kóoǹ a-waŋguliŋ ŋin dɔ̄ kitiŋee!

¹⁸Ti-Dindaan nín lī puee sèé: «Min bí nee, m làá dū kitiŋ nee nib kí tɔ̄ ndan kii kujaataafuŋ taŋkpalee. M làá cáań dinimbinaamandi kí tɔ̄ bi-pu áli ubɔ ń taa ŋmátí.»

¹⁹Ba busuu dee! Nnaabu ŋulɔŋu ŋúǹ dee!, Tiweendi tin m fōōyee kaa cáá dicáaǹdi! M lī m-ban yii: «An kaa páb́, m làá ŋmā kí túń m-gìńdi.

²⁰Bi nāaǹ m-tantiu, u-ŋmiii kɔkɔ tīfì. M-biyaamu yíkì-mi, muaa ti bí. Ubɔ kaa ti bí kí cóoń m-tantiu, kí ŋāŋkì m-kɔŋkooŋŋu.»

²¹Tin yì-tèe di sá yii bikpootiliibi ŋá digbaandi. Baa nyàab̄ ti-Dindaan. An pu ní an kaa bútì-bi, ní bin bi nìn kpòotēe yàl̄ an kɔkɔ pu.

²²Ti gbìl̄ kuwoou kubɔ pu, ku tóobiń. Kukunsaŋu kubɔ nyánní ŋgan pú tiŋkin. Ku làá yàntī Juuda tiŋki ń kpántí kuteeu, laakin sinsiŋkub làá nīn kóòyee.

²³M-Dindaan, m nyí yii, unil kaa yì u-ba. Unil un còom̄ee kaa ŋūǹ kí kpòotī u-ba.

²⁴Dáaĺ m-tafal, ama á taa lákatí marab pu. Taa fōō diŋuul, an yaa sá fám, a làá nàan̄-mi.

²⁵Kpáatí a-ŋuul kí sìtī atimbun ŋin kaa nyí-see pu, kí sìtī anibul ŋin kaa jáaḿ-see pu. Kun puee bi tɔ̄ntì a-nibul Jaakɔb naantiibi, bi fúkúl̀-bi ki púntì-bi, ní ki nāaǹ bi-tiŋki[18].