Read Ntcham Jérémie 12 Bible Online

Jérémie 12 - Ntcham bible

Jérémie 12

¹M-Dindaan, a baasii sá deedeedaan ní, maa ŋūǹ kí kpákáǹ-si. Ama m là kí sòoǹ nì si tin bí deedeeyee pu. Ba pu ní an bútí binikpitib ní? Ba pu ní bin kaa bí deedeeyee bí ŋgbansɔŋfin ní?

²A cóoǹ-bi bi báaǹ inyaan áli ki lòon̄ abil. A-yindi pée kā bi-nyɔkɔn, ama ní bi-pɔbiliŋ dátiǹ-si.

³Ama mamee, m-Dindaan, a nyí-mi, a wāĺ-mi ki nyí m-landɔkɔi, i dɔ̄ a-nimbiin. Gàntī binikpitib kí síiń kii bi nín lèekī ipii in bi làá kpɔ̀ee kí síiń puee. Kpāafì-bi kí síiń ŋwiin ŋun a làá kpɔ̀-bee.

⁴Kí tin sāā ŋyunti ŋulɔŋu ní kitiŋ nee làá nīn bí kunimbaaun ní? Kí cáá sāā ŋyunti ŋulɔŋu ní akpaan làá nīn dɔ̄ ki kūń ní? Kitiŋ nee peelii nì ki-nooŋyi bíi kúù bin kóò ki-puee kpitii pu. Bi lì yii: «Yeereemii kaa ti làá nīn bí kí ká tin làá bàń-tee.»

⁵«Sii nì binib yaa bíi sáń ní a gīīyee, kin mana ní si nì itaamu ŋūǹ kí sāǹ kí kpáká? An yaa sá kitiŋ kin cáá ŋgbansɔŋfee poon ŋmaniŋma ní a ŋūǹ kí nīn bí a-pɔbil sɔ̀m̀ee, kin mana ní a làá ŋá a yaa láa kɔ́ Jɔɔdan mɔgbaakin?

⁶«Di sá yii, a-nabiyaamu, a-dicaŋkun yab nyēē a-boon. Bi kóoǹ binib ki kpáfì bí já nì si ní saa nyí. Bi yaa bíi sòoǹ nì si nì anyɔɔbummɔntee, á taa nín̄ máká bi-pu.»

⁷«M dū m-Diiku ki fá, m fātì m-boon ki tīī tin sá m-yatee. M dū dinibul din m néeńee ki líiǹ di-nannanliibi.

⁸Bin nìn sá man yabee kpántì kii gbikinti di bí kupɔɔunee. Bi gbùkum̄ ki tátí m-pu, an puee ní maa ti là bi-bɔti.

⁹Bin nìn sá man yabee kpántì kii kinɔmbiki kin ŋān̄, ní ikaabu gbáb́ ki bīiǹ ki-puee. Ní cùmaan kí kóoǹ ipeel kí kpāfì, í dāan̄ kí jī jiŋaal.

¹⁰Bipikpaaliibi tikpil dɔ́miń ki bíil̀ m-fiinyi kpaabu, bi tāā m-tiŋki kì ŋá púb, ki dū m-tinjandi din ŋān̄ee ki kpántì kunimbaau teeku.

¹¹Bi yāntì kì kpántì inimɔɔn tiŋki, ki bí kunimbaaun, kì kpántì kitiŋkuliŋŋi. Bi nāaǹ kitiŋee kɔkɔ ní báà ubɔ kaa fātìi tɔ́.»

¹²Binàanliibi páaǹní kuteeu jooŋŋi pu ki dòoń. Ti-Dindaan tàataajiki bíi pɔ̀fī tikɔkɔ, kí yòon̄ kitiŋ kílilaŋki ki tin sāā ki-kúntilaŋki. Báà uniseen kaa ti bí ŋgbansɔŋfin.

¹³Bi nìn búĺ bilee ní ki dāa cáń ikuŋkum, bi bìn̄ ki gīī púb, ama kaa ká ipaati. Ti-Dindaan ŋuukpaandi din u fōō ni-puee di yì-tì ní tin ni cáńee cáá-ni icoo.

¹⁴Ti-Dindaan nín sòon̄ puee sɔ̀. M-kɔŋkɔnaatɔb bin kɔkɔ sá binikpitib ki gbēē kitiŋ kin m dūu tīī m-nibul Isirayeelee, m làá jà-bi bi-tiŋki pu. Ama m làá cúú Juuda nibul kí nyāntí bi-kansikin.

¹⁵Míǹ boonee, m làá sɔ̄ bi-saai, ní kí gíiǹní-bi bi-tiŋkin, báà ŋma nì u-kpaatanti pu.

¹⁶Bi nìn bífì m-nibul bí nīn pùtī Baal yindi pu. Ama bíǹ bi-ba yaa kíǹ ki cáá m-nibul bimbim, ki kíǹ ki cáá m-yindi ki pùtī ki lì yii: <M pūtì ti-Dindaan un bí dimaŋfalinee>, m làá dāá fōō-bi m-nibul kansikin.

¹⁷Ama atimbun gbanti diba yaa yíì kaa pílifiǹ-mee, m làá kpìkitī-dì kii bi nín kpìkitī busubu puee ní kí dū-dì kí líiǹ ŋkúm, ti-Dindaan di lī míǹ.