Read Ntcham Jérémie 13 Bible Online

Jérémie 13 - Ntcham bible

Jérémie 13

¹Ti-Dindaan nín tùkū-mi puee sèé: «Cùú dā ŋŋaabu ŋun bí fálfalee dambalau kí gbìn̄ a-caŋ, ama á taa dū-u kí tɔ̄ nnyimin.»

²Ní m cūtìi dá dambala kii ti-Dindaan nín bí yii ḿ ŋá puee, ki dūu gbìn̄ m-caŋ.

³Ti-Dindaan nìn gíti sòon̄ nì mi nliliitiim yii:

⁴«Yòon̄ dambala un ní a dá ki gbìn̄ a-caŋee kí nīn cá Eefiraati mɔɔl caŋin kí dū-u kí báĺ ntaŋkpaween ŋubɔn.»

⁵Ní m cáá dambalee ki bál̀ Eefiraati mɔɔl caŋin, kii ti-Dindaan nín nìn tīī-mi mara puee.

⁶Iwiin iba boonee ní ti-Dindaan bí-mi yii: «Yīkì kí gítí dimɔɔlee caŋin kí yòon̄ní dambala un m nìn tīī-si mara yii á cáá báĺ niinee.»

⁷Niinee ní m nín cá Eefiraati mɔɔl caŋin. M bàn̄ee ní ki nyàab̄ dambalee ki lēeń-u laakin m nìn dū-u ki bál̀ee. Ama m nìn ká yii dambalee nìn bíil̀ kaa ti pée bí tiban.

⁸Niinee ní ti-Dindaan sòon̄ nì mi yii:

⁹«Man ni-Dindaan nín lī puee sɔ̀. Míǹ ní m làá bīil̀ Juuda yab lambil nì Jeerusaleem yab lambikpaandi.

¹⁰Di sá yii an sá dinibul din nib kaa ŋān̄ee ní. Bi yíì kaa pílifì m-nyɔkɔ, ki nóó bíǹ bi-ba nín là puee saŋŋu. Bi jòó ki pá awaa boon ki tòotī-ŋi. Too, dinibul nee ń kpántí kii dambala un bíil̀ kaa ti bí tiban nee.»

¹¹Ti-Dindaan nín lī puee sèé: «Kii unil nín dù dambala kí gbìn̄ u-caŋ puee, míǹ ní m nìn dū Isirayeel yab nì Juuda yab ki bóob́ ki nákáǹ m-ba. M nín nìn là puee di sá bí nīn sá man nibul, kí nyā diyindi, kí nīn sá m-jilmau nì m-nyooti. Ama ní baa gbìl̄ ki tīiǹ-mi.»

¹²«Á tùkù-bi yii: <Ti-Dindaan Isirayeel yab Nimbɔtiu nín lī puee sɔ̀. Tilɔn bí bí nīn fūuntí ndaam ní>. Bi yaa kíí-si yii: <Mimmee timbi kaa nyí tilɔn nín bí bí nīn fūuntí ndaameeee?>

¹³Niinee ní á tùkù-bi yii: <Ti-Dindaan nín sòon̄ puee sɔ̀. M làá yàntī kitiŋ nee pu nib nì bibɔtiibi bin kā Daafiidi beejal puee, nì bisaraaŋaliibi nì m-bɔnaatiliibi nì Jeerusaleem yab kɔkɔ ń gbí.

¹⁴Man ni-Dindaan di bí yii m làá dū-bi kí yāŋkì tɔb kí kɔ̄fì, bibaatiibi nì mbiyaamu dicilpu. Maa làá tàan̄ báà ubɔ. Maa làá dàkà kulaŋŋaŋfitiiuaaa, kaa làá sɔ̄ isaa mun. Tiba nì tiba kaa làá cúú-mi ḿ taa nàan̄-bi.>»

¹⁵Pīlifìmaan, kpòom̄maan ni-tafal, taa nín̄ sámaan bilambidambi. Ti-Dindaan di bíi sòoǹ.

¹⁶Tīīmaan ti-Dindaan ni-Nimbɔtiu tinyool kí wàatī ní dibɔmbɔndi wiiŋŋu ń nín bàń, án nín làá ŋá pu ní taa láa gbéetí ajoon ŋin pu kunyeeu mɔ́ee. Ni bàà kā ki cí ŋwalifi dee, ama ní u dūu kpántì ŋkúm bɔmbɔndi, ki dūu kpántì ditagbambɔndi.

¹⁷Ni yaa kaa pílifì tibɔkpaafikaal nee, m làá nīn sūǹ dibalin ni-lambil pu. Nnyinnyim làá gbí m-nimbiliŋ kí nīn bàtifī, kun puee bi cúú ti-Dindaan picaŋkpuŋku ki cūnnì kuyuŋu.

¹⁸Tùkù ubɔti nì u-na yii: «Kàl̄maan kitiŋ, di sá ni-beefuunyaaŋki nyáń ni-yil pu ki lítì kitiŋ.

¹⁹Bi pīiǹ Neegeeb timmu punyɔmmu, ubɔ kaa ti pìitī-mu. Bi cúú Juuda yab ki cūnnì kuyuŋu, bi-kɔkɔ búntì ubɔ kaa kíǹ.

²⁰Wáaǹ kí kpèè bin nyánní ŋgan pú ki dòońee. Kupicaŋkpuŋu kun m nìn kpāaǹ-see bí la? Apibil ŋin nìn tìì-si tinyoolee bí la?

²¹A yāntì biba kpántì a-bɔɔbi. An nib gbanti yaa láa yíkì ki bíi jáà nì si kí jī a-pu dinyandee, a làá dāá lì yii ba dee? A làá dāá jī falaa kii unimpu di kāl̀ imatiŋween puee.

²²Niinee, a làá dāá bàlifì yii: <Ba di yì-tì ní nnaabu nee bāań-mi míǹ?> Too, bi yaa láa kóoǹ a-wɔndoou, ki bíi ŋáań-si tipɔmbɔtee, an sá a-kpitii nín wīikée pu.

²³«Unibɔn ŋūǹ kí kpántí u-wuŋgbaŋŋuɔɔɔ? Ugbii ŋūǹ kí pítí u-tàmaaa? Míǹ mbaantiim ní nimbi bin mántiǹ ikpiti diŋálee, naa ŋūǹ kí ŋá tiŋan.

²⁴M làá jà-ni kí yàl̄ an kɔkɔ pu kii kuteeun buŋku nín yòontí timool puee ní.»

²⁵Ti-Dindaan bí yii: «Jeerusaleem, tin dɔ̄ ki cí-see dee. Dijandi din m kpáafì ki yóoǹ-see dee. Di sá yii a súntì man pu, ní ki dū a-mákal ki páaǹ awaa pu.

²⁶An puee ma mun làá kóoǹ a-wɔndoou kí cáá sāā a-nimbiin pu, ní bí wāl̀ a-cooi.

²⁷Yéēee! A-laakpaati nì a-mɔŋŋu biilii nì a-laakpaatuuŋŋi ŋin kɔ̄ntí-si icoo na! M ká a-gbantammu pu nì a-satin a-waaŋi ŋin sá ntimbiil wantee. Ba naabuŋu ŋúǹ bulifi dee, Jeerusaleem, aa là kí ŋá a-ba circir. Án làá nīn bí míǹ kí tin sāā ŋyunti ŋulɔŋu ní?»