Read Ntcham Jérémie 17 Bible Online

Jérémie 17 - Ntcham bible

Jérémie 17

¹«Juuda yab kpitiiyee, bi dū kigaai ní ki cáká ki ŋmàn̄, àá ataŋkpanyaan ní bi dūu ŋmàn̄-i. Bi ŋmàn̄-i ki ŋá bi-pɔbiliŋin, ní ki ŋmàn̄-i ki nákáǹ nsaraafan kpiŋŋi[23] pu.

²Kii bi nín dàkafī bi-jipɔmbi pu puee, míǹ ní bi dàkafī bi-saraafaŋyi nì bi-windɔi nì isufi in cáá tifaasɔn ki bí ŋgbantamu puee pu.

³Nimbi Juuda yab, nimbi bin tòotī awaa ajoon pu nì tisatinee, m làá dū ni-gaajati nì ni-gaajawanti nì ni-waatootipaaŋyi kí tīī bí fūkul̀. Ikpiti in ni ŋá ni-tiŋki kɔkɔ poonee pu ní m làá ŋá míǹ.

⁴Ni làá yīkì kí dū kitiŋ kin m nìn tīī-ni ní nīn kíǹ ki yèe kí fá. M làá yàntī ní kpántí ni-nannanliibi yumbui kitiŋ kin naa nyée poon. Di sá yii ni tūū m-ŋuul ŋmiŋu, ní ŋu làá nīn pée wù míǹ ní ki cá jaanjaan.

⁵Ti-Dindaan nín sòon̄ puee sèé: «An sá mbusu ní ki tīī unil un máká nisaal pu, ki nyàab̀ dijòońdi nisaaleen cee, ní ki fàtī u-boon ki tìì ti-Dindaanee.»

⁶U bí kii kisubiki kin cɔ́ kitiŋkuliŋŋi puee ní, kì pée kpá kí ká mmɔn. Kì làá nīn cɔ́ kuteeu taŋkpeeŋi kansikin, kitiŋ kin cáá ŋyaam ubɔ kaa kóò ki-puee ní.

⁷Ama unil un di máká man pu ki fōō-mi ki kíí nì u-pɔbil kɔkɔee, man u-Dindaan làá bìin̄ u-pu.

⁸Udaan bí kii busubu bun yú mbun caŋin, bu-nyaaŋyi lālim̀ ki kɔ́ mbunee ní. Kutuntuŋu yuntiŋuee, buaa fàŋkí tiba, ní bu-faati pée sɔ̀m̀ ŋma. Báà ŋweel yaa yúl̀ dibimmɔndi, bu pée lòoǹ abil ní kaa gbèentí.

⁹Unil pɔbil ŋmàtíǹ ki jítiǹ tikɔkɔ! Ubɔ kaa ŋūǹ kí cáaǹ-dì. Ubɔ mun kaa ŋūǹ kí béé-dì.

¹⁰«Man ni-Dindaanee, m wāĺ tin kā unil pɔbil poon poon kábuee, ní ki nyí u-landɔkɔi kɔkɔ nín sá puee. An pu ní m ŋūǹ kí pà báà ŋma bimbim nì u-tuuŋŋi paati.

¹¹Kii ujikpal nín nākantí ajin ŋin waa tɔ́ee puee, míǹ ní unil un dī isaŋkpiti pu ki ká tigaajatee bí. U-maŋfal wiiŋyi kansikin nì kansikinee ní u-gaajati ń wāŋkì, ní ú dūú kpántí kii kinaatuuyee.»

¹²Tinyool beejal din tɔ́kɔ́ yilpu doooo ŋkilkaaminee, míǹ ní ti-circir kɔŋkooŋŋu bí.

¹³Ti-Dindaan, sii un pu Isirayeel mákée, icoo ń cúú bin kɔkɔ dū-si ki fée! Bin kɔkɔ fātì bi-boon ki tīī-see, bí nīn bí kii ayin ŋin bi ŋmàn̄ ntaminee. Di sá yii bi dū sii ti-Dindaan un sá dimaŋfal nyimbuliŋuee ki fá.

¹⁴M-Dindaan, cáaǹ-mi ní ḿ ká dicáaǹdi, fīī-mi ní ḿ ká difiil. Di sá yii sii di sá m-nyɔŋkii.

¹⁵Bi lì-mi yii: «Ti-Dindaan bɔti tin u sòon̄ee bí la? Tibɔti gbanti ń ŋá míǹ tí kpèèyaa!»

¹⁶Ti-Dindaan, man di kaa páb́-si á cáań nnaabu. Maa tí mēē kí ká nnaabu wiiŋŋu, sii a-ba nyí míǹ. Tin m sòon̄ee, a-nimbiin ní m sòon̄-tì.

¹⁷Taa kpántí dinyoondi kí tīī-mi, sii ní m sáń ki kóò dinimbinaamandi yuntiŋu.

¹⁸Icoo ń cúú bin sàantí-mee kí taa cúú man. Tifaandi ń cúú-bi, ama kí taa cúú man. Cáań nnaabu kí tɔ̄ bi-pu, kí nàan̄-bi dúsi dusi.

¹⁹Ti-Dindaan nín sòon̄ nì mi puee sèé: «Cùú yūĺ kipunyɔɔkpaaŋŋi caŋin. Niin ní Juuda yab bɔtiibi dì ki kóò ki dì ki nyēē Jeerusaleem tiŋkin. Míǹ boonee, á cùú yūĺ kitiŋee punyɔmmu kɔkɔ caŋin.

²⁰Á tùkù Juuda yab bɔtiibi nì Juuda yab kɔkɔ nì Jeerusaleem yab bin kɔkɔ dì mpunyɔmu gbantee yii: <Pīlifìmaan ti-Dindaan nyɔɔbundi.

²¹U nín sòon̄ puee sɔ̀. Ní nīn nyíǹ ni-ba tiŋan kí taa túń diwaŋgul ŋwiŋŋuŋfikaa dal kí dī Jeerusaleem punyɔmmu nee kí kɔ́ àá kí nyā[24].

²²Ní taa nyāntiń ni-diiŋŋin diwaŋgul ŋwiŋŋuŋfikaa dal, kí taa tɔ̄ ditundi báà diba yaadal. Ama ní dū ŋwiin gbanti kí sú-mi kii m nín nìn yóoǹ ni-naanjab mara puee[25].

²³Baa nìn kpōoǹ bi-tafal ní kaa nín pílifì. Bi nìn ŋá ŋyipɔn kí taa pīlifì ní kaa nín fōō isaŋki.

²⁴«<Ti-Dindaan nín sòon̄ puee sɔ̀. Nimbee, ní pīlifiǹ-mi. Ní taa túń diwaŋgul ŋwiŋŋuŋfikaa dal kí dī kitiŋ nee punyɔmmu kí kɔ́. Ní dū ŋwiin gbanti kí sú-mi kí taa tɔ̄ ditundi diba ŋwiin gbanti.

²⁵Niinee, bibɔtiibi nì abɔtibil bin kā Daafiidi beejal puee làá nīn kàal̀ itaamu nì tɔrɔkub pu kí nīn pée dì kitiŋ nee punyɔmmu pu ki kóò ki nyēē. Bi-kàliŋkpilib nì Juuda yab nì Jeerusaleem yab làá nīn dì niin, ní binib ń nīn pée kóò kitiŋ nee ni kí nīn cá jaanjaan.

²⁶Binib làá nyānní Juuda timmun nì Jeerusaleem kpaanceetii nì Beenjameen tiŋkin nì Seefeelaa tiŋkin nì ajoon pu timmun nì Neegeeb. Bi làá dāá ŋá bisaraawɔkaabi nì saraabi biba mun nì tijimpin saraabi nì talaalutuukaa nì ijaam saraabi ti-Dindaan diikun.

²⁷Ama ni yaa kaa pílifiǹ-mi kaa dū ŋwiŋŋuŋfikaa ki sú-mi, ki túǹ diwaŋgul ŋwiŋŋuŋfikaa dal ki dī Jeerusaleem punyɔmmu pu ki kɔ́ee, m làá tūū ki-punyɔmmu ŋŋmi. Ŋu làá wà Jeerusaleem beeciŋŋi, ní kaa làá kpú.>»