Read Ntcham Jérémie 18 Bible Online

Jérémie 18 - Ntcham bible

Jérémie 18

¹Ti-Dindaan sòon̄ nì Yeereemii tibɔti nee yii:

²«Yīkìí sìntī uyɔɔmaati cee. Niin ní m làá sòoǹ nì si tin m cááyee.»

³Niinee ní m nín sìntī uyɔɔmaati cee. M bàn̄ee u bíi māā dibool kupiliŋu kun pu bi māā abookuŋkunee.

⁴Ama dibool din u nìn bíi māāyee kaa nìn kāl̀ kii iyunti iba án nín pée bàń uyɔɔmaati puee. Niinee ní u fātìi máń dibool diba din fáatiǹ-uee.

⁵Niinee ní ti-Dindaan sòon̄ nì mi tibɔti nee yii:

⁶«Mimmee Isirayeel yab, maa ŋūǹ kí ŋá-ni kii uyɔɔmaati nee nín ŋá pueeee? Man ni-Dindaan di sòon̄ míǹ. Kii kuyɔkɔu nín kā uyɔɔmaati ŋaan puee, míǹ ní nimbi Isirayeel yab mun kā m-ŋaan.

⁷Iyunti ibee m sòoǹ yii m làá cóotí ditimbundi àá dibeel diba kí lábití-dì kí cìb̄ ní kí nàan̄-dì.

⁸Ama ditimbundi gbanti yaa fá di-tuŋkpitiŋee, ma mun kpántí m-landɔkɔŋu ní kí taa ti ŋá-dì tin m bàà bɔ́ntì kí ŋá-dèe.

⁹Iyunti ibee m tí sòoǹ ditimbundi àá dibeel diba pu yii bí fàtīí náań-dì kí mā-dì.

¹⁰Ama ditimbundi gbanti yab yaa kaa pílifì m-nyɔkɔ ní ki bíi ŋáań min maa lèe, m kpántí m-landɔkɔŋu ní kí taa ti ŋá-bi tiŋan tin m bàà bɔ́ntì kí ŋá-bee.

¹¹«Kɔŋkɔnnee, Yeereemii, á tùkù Juuda nì Jeerusaleem yab yii: <Ti-Dindaan nín sòon̄ puee sɔ̀. M bíi bɔ́ntí nnaabu kí tɔ̄ ni-pu, m bíi dàkafī min m làá ŋá-nee. An puee báà ŋma ń fá u-saŋkiŋkpitil. Ní ŋāŋkì ni-bítam nì ni-ŋáaǹtam.>»

¹²Ama bi làá lì-si yii: «Tin a sòoǹ nee sá fám ní! Ti nín pée lēē kí ŋá puee, míǹ ní ti làá ŋá, ti làá nóó ti-landɔkɔkpitii ní.»

¹³An pu ní ti-Dindaan sòon̄ yii: «Ní bàlifìmaan atimbun ŋin kíǹee yab. Ni pée gbìl̄ tibɔti nee juti ki káaa?> Isirayeel un bí kii usapɔɔn un kaa nyí uninjee túń ntimbiil tuuŋŋi tikpil.

¹⁴Ntaayim kaa bìintí Leebanɔn jooŋŋi taŋkpeeŋi puɔɔɔ? Ibun in nyim sìntī ajoon pu ki sɔ̀m̀ee ŋūǹ kí gbèen̄ kí taa ti pùub̀aaa? Aayee!

¹⁵Ama man nibul súntì m-pu! Bi tòotī awaa ŋin kaa bí tibanee. Awaa gbanti di líikí-bi bi-saŋŋu poon. Ŋi yàntī bi féeń dooooyee saŋyi kí cùú nóó nsan ŋun baa cátèe.

¹⁶M-nibul yāntì di-tiŋki kpántì ataŋkpakpuku, ki yàntī binib gbáà inimɔɔn biilii kaa gbèentí. An ŋáań bisanjitiliibi bitii, ní bi gbēentí bi-yiliŋ.

¹⁷Binannanliibi yaa láa bāańee, m làá gbá kí yàaǹ m-nibul kii ŋwìiń nyalaŋki buŋku nín kpàá ntam ki féeń puee ní. Bi-nimbinaamandi dalee, án nín bàà sá ḿ fàtī m-nimbiin kí tīī-bee, m-boon ní m làá fàtī kí tīī-bi.»

¹⁸Binib biba bí yii: «Tí cùmaan kí bɔ́ntí kí jáǹ Yeereemii! An kaa sá ti lóò bisaraaŋaliibi bin làá dàkà-ti marabee àá biciŋfitiibi bin làá tīī-ti isaŋkee. Taa tí lóò bibɔnaatiliibi bin làá nàatī-ti Unimbɔti bɔtee. Tí cùmaan kí jáǹ-u kí sòoǹ kí bīil̀-u. Ti taa pīlifì tin u sòoǹee.»

¹⁹Ama sii m-Dindaan, gíiǹní a-landɔkɔŋu m-cee, pīlifì tibɔti tin bin bíi kɔ́kɔĺ-mee sòoǹee.

²⁰Bi dù tikpitil kí pà tiŋan puɔɔɔ? Bi gbìn̄ mbòó ḿ jēetí poon. Ti-Dindaan, téetí yii m yúl̀ a-nimbiin ki gbāam̀-si binib nee pu yii á páatí a-ŋuul bi-pu.

²¹Míǹ puee yàntī ŋkùm ń kpɔ̀ bi-biyaamu, bí dū ntàataajimu kí kpɔ̀-mu! Bi-nimpoobi ń kpántí biŋmaŋŋmantiibi nì bikpiipoobi! Bìlbil kúm ń kpɔ̀ bi-calib! Bi-naacimpɔmbi ń kpúń kujaaun.

²²A yaa láa dū binannanliibi ki tɔ́ bi-puee, bí dāá gbìl̄ ibiil pu bi-dumpui! Di sá yii bi gbìn̄ mbòó ḿ jēetí poon, ki píĺ-mi titalindi kí sàl̄-mi.

²³Ama sii ti-Dindaanee, a nyí tin kɔkɔ bi bíi búkù m-pu ki là kí kpɔ̀-mee. Á taa dū bi-kpitii kí pɔ̄-bi! Taa kpìtī bi-yìntitam a-nimbiin! Bí lítí a-nimbiin. A-ŋuul wiiŋŋu dalee, á dāá jáǹ-bi.