Read Ntcham Jérémie 19 Bible Online

Jérémie 19 - Ntcham bible

Jérémie 19

¹Ti-Dindaan nín sòon̄ puee sèé: «Cù uyɔɔmaati cee kí dā kulɔŋŋu. A yaa cée, á kpáaǹ bitindaŋkpilib biba nì bisaraaŋaliibi kpilib.

²Á dī abɔkati punyɔkɔki kí cù Inɔɔm tantakalin. Niin ní á bāakì tibɔti tin m làá sòon̄ nì si nee.

³Á dāá lì yii: <Juuda yab bɔtiibi nì Jeerusaleem yab, pīlifìmaan ti-Dindaan nín sòon̄ puee. Ti-Dindaan Mpɔŋkɔdaan, Isirayeel yab Nimbɔtiu nín sòon̄ puee sɔ̀. M làá cáań nnaabukpaan ŋubɔ kí tɔ̄ mpaan nee pu. Bin yaa láa gbìl̄-tèe làá fàŋkì.

⁴Di sá yii Juuda yab dū-mi ki fá. Bi-puee, baa ti béetí mpaan nee. Bi tūutì niin talaalutuukaabi ki tīī awaa. Bíǹ bi-baaa, bi-naanjabaaa, Juuda yab bɔtiibi kaa nìn nyí-ŋi. Bi yāntì maanyiibab fatikuu gbí mpaan nee pu.

⁵Bi ŋātì iwaatootipaan kí nīn tòotī diwaal Baal. Niin ní bi cáǹ bi-jipɔmbi ki tòotī diwaal Baal ki wù ŋŋmi. Maa tīī-bi mara yii bí nīn ŋáań míǹ, maa sòon̄ an pu, kaa dākafì míǹ pu gba.>

⁶«An pu ní ti-Dindaan bí yii: Ŋwiin ŋubɔ bí ki dòoń, baa làá dāá ti yíiń mpaan nee yii <Toofeeti> àá <Been-Inɔɔm tantakal>, ama bi làá dāá nīn yíì-ŋu yii <Dipɔ̀fil tantakal>.

⁷Mpaan nee puee, m làá dāá nàan̄ Juuda yab nì Jeerusaleem yab nín bɔ́ntì kí ŋá tiŋyee. M làá yàntī bi-nannanliibi ń kpɔ̀-bi kujaaun. M làá dūú dī bin nyàab̀-bi ŋkúmee pu ní kí ŋá míǹ. M làá dū bi-nikpiliŋ kí tīī inoon ń jī ní ipeel ń ŋmɔ́.

⁸M làá yàntī kitiŋ nee ń kpántí adigbun ŋma kí yàntī báà ŋma ń nīn gbáà ki-pu ibiil. Bin kɔkɔ làá dāá jītí niinee làá dāá fàŋkì ní kí nīn búǹ ifoon tin bāań-kèe pu.

⁹Binannanliibi bin là kí kúntí-bee làá dāá màntīí tū bi-tiŋki kí jáǹ-bi. Bi làá dāá nīn bí falaakpaan poon áli kí dāá ŋmɔ́ bi-jipɔmbi nì bi-bisalib nanti ní kí dāá ŋmɔ́ tɔb.

¹⁰«Míǹ boonee ní á gbá kí wīī kulɔŋŋuee bin nóó-see nimbiin,

¹¹ní kí tùkù-bi yii: Ti-Dindaan Mpɔŋkɔdaan nín sòon̄ puee sɔ̀. M làá wīī dinibul nee nì kitiŋ nee kii bi nín wìil̄ uyɔɔmaati lɔŋku puee ní. An kaa dāa gíti cáá diŋaŋkil. «Bi làá dāá síb́ anikpil Toofeeti tantakalin gba, kun puee mpaan kaa dāa gíti bí laaba bí síb́-ŋi.»

¹²Ti-Dindaan nín sòon̄ puee sɔ̀. M làá yàntī kitiŋ nee nì ki-nib ń kpántí kii Toofeeti tantakalee ní.

¹³Jeerusaleem diiŋŋi nì Juuda bɔtiibi diiŋŋi làá kɔ́ tijɔkɔndi kii Toofeetee ní. Di sá yii bi tūutì talaalub adiin kɔkɔ yilpu bi nín bɔ̀b̄ puee ki tīī iŋmalbijaa in bí kutaa puee, ki fá awaa ndaam.

¹⁴Míǹ boonee ní Yeereemii nyánní Toofeeti tantakalin, laakin ti-Dindaan nìn tú-u ú cù kí sòoǹ u-bɔtee. U nìn cūtì ki kɔ́ kunimbɔtidii cindin, ní ki bí samaa kɔkɔ yii:

¹⁵«Ti-Dindaan Mpɔŋkɔdaan, Isirayeel Nimbɔtiu nín sòon̄ puee sèé: <M làá cáań nnaabu ŋun m nìn sòon̄ ki tɔ́ kitiŋ nee nì ki-timbilimmu kɔkɔ puee. Di sá yii kitiŋ nee nib yiliŋ pɔ̄ɔ̄, ní bi yíì kaa pílifì m-nyɔkɔ.>»