Read Ntcham Jérémie 2 Bible Online

Jérémie 2 - Ntcham bible

Jérémie 2

¹Ti-Dindaan sòon̄ nì mi yii:

²«Cù kí sòoǹ nì Jeerusaleem yab án kɔ́ bi-tafaliŋin. Man bi-Dindaan nín lī puee sɔ̀. M téetí a-pɔntinee, a nín nìn cáá m-pu dineeŋkpaandi diŋyee. Dineendi gbanti nìn bí kii unil nín néeń u-bɔɔn puee ní. A nìn nóó-mi kuteeun laakin tiba nì tiba nìn kpée.

³Di sá yii sii Isirayeel, a nìn sá ki tīī man a-Dindaan baba ní, a lì kii tijincɔ̀fikaalee. Bin yaa nìn lámintì ki gbēē-see nìn kóò m-bɔtin ní ḿ yàntī nnaabu ń jēetí bi-pu.» Ti-Dindaan di lī míǹ.

⁴«Nimbi Jaakɔb naantiibi, nimbi Isirayeel maaliŋun yab kɔkɔ, pīlifìmaan ti-Dindaan bɔti nee.

⁵Ti-Dindaan nín sòon̄ puee sɔ̀. Diyìntil dilal ní ni-naanjab ká m-pu, ní ki sáǹ ki wāatì-mi ní? Bi sáǹ ki jòó ki pá tin kaa bí tibanee boon, ní bíǹ bi-ba kpántì tin kaa bí tibanee.

⁶Baa bālifì yii: <Ti-Dindaan un nyántìń-ti Eejipiti tiŋkinee, úǹ un kpōotì-ti kuteeun laakin kūń ki sá mbuŋgalimuee, ŋweel nì dibɔmbɔndi tiŋkee, kitiŋ kin báà ubɔ kaa kóòyee bí la?>

⁷M nìn cáá-ni ki kɔ́ǹ kitiŋ kin cáá ntiŋkpamee poon, ní ŋmɔ́ ki-subiliŋ kí jī ki-gaajawanti. Ama ni bàn̄ee ní ki kɔ́ǹ m-tiŋkee tijɔkɔndi, ní ki dū m-gaajawammɔntiiti ki kpántì ntimbiil wanti.

⁸Bisaraaŋaliibi kaa bālifì yii: <Ti-Dindaan bí la?> Bimaradakaliibi kaa nyí-mi, ní bikpootiliibi jáà nì mi. M-bɔnaatiliibi bí ki nàatī diwaal Baal bɔti, bi jòó ki pá tin kaa bí tibanee boon.

⁹An pu ní m làá cùnnì-ni ibɔsoon, ní kí cùnnì ni-naantiibi mun ibɔsoon.» Man ni-Dindaan di lī míǹ.

¹⁰«Dùtīmaan Kitiim buŋyi kí cùú kpèè! Tɔ̄maan binib bí cù Keedaar tiŋkin kí bàlifì kí béé tiŋan. Ni làá ká yii baa ŋáań tin ni ŋáań nee niin.

¹¹Dinibul diba kpántì di-waaŋi ni káaa? Nì min kɔkɔ awaa gbanti kaa kpáàa sá Unimbɔtee! Ama m-nibul díǹ dū di-nyooti ki kpántì tin kaa bí tibanee.

¹²An puee, kutagbɔŋu, yàntī án ŋá-si bitii, kí kɔ́ǹ-si dinyoondi nì tifaandi. Man ni-Dindaan di lī míǹ.

¹³M-nibul ŋá ikpiti mili pu: bi dū man un sá nnyimbul ŋun tìì dimaŋfalee ki fá, ki cūtìi gbìn̄ anyimbɔbil ŋin tátì nnyim kaa ŋūǹ kí dòon̄ poonee.»

¹⁴Isirayeel yab kpántì iyumbu naaa, bi màl̄-bi kuyuŋun ní? Kin ba pu ní bi fúkúl̀-bi míǹ?

¹⁵Bíǹ pu ní gbikintib mùuǹ ki tátée. Bi yāntì bi-tiŋki kpántì adigbun. Bi sēē bi-timmu ŋŋmi ní báà ubɔ kaa ti kóò mu-ni.

¹⁶Áli gba Meemifiisi yab nì Dafinee yab kōol̀-bi diyibaakpandi.

¹⁷Isirayeel, tíǹ gbanti kɔkɔ kaa nyánní a-ceeee? Man a-Dindaan a-Nimbɔtiu nìn ŋúb́-si ní ti còom̄, ama ní a dū-mi ki fá.

¹⁸Kɔŋkɔnnee, a yaa cūtì Eejipiti tiŋkin ki nyùn̄ Niil nyimee, án làá kūtì-si ba? A yaa cūtì Asuur tiŋkin ki nyùn̄ Eefiraati nyimee, a làá páatí ba?

¹⁹Fōō ikpiti in a ŋée tafadaaldi! A nín kaa yúl̀ nì mi deedeeyee kpuulool ń gítí a-pu! Ŋyunti gbantee, a làá wāl̀ kí béé yii unil yaa dū man u-Dindaan u-Nimbɔtiu ki fée, u jīǹ falaa ní án píĺ-u fíŋfiŋfiŋ. Tiŋman, aa ti kpáàa fàŋkí-mi.

²⁰Ti-Dindaan bí yii: «Isirayeel, dooooyee ní a yíkì kaa kíí a-ba pu. A kpītì mpèé ŋun nìn bí man nì si kansikinee ní ki bí yii: <Maa ti là kí nīn sá uyumbu>. Di sá yii ŋgbantamu mun fɔ̀kɔ̀ee kɔkɔ pu nì isufi in cáá tifaasɔnee taapu ní sii dɔ̀ ki ŋáań a-laakpaatuuŋŋi.

²¹M nìn cóoǹ-si á nīn sá bufiinyisumɔntiibu bun pu bi ŋūǹ kí nīn mákée ní. Kpèè a kpántì difiinyileendi din biliŋ gàm̀ee, an ŋá mana ní ki ŋá míǹ?

²²Báà a yaa dū njeem ki fíntì a-ba, ní ki dū fɔfɔb tikpil tikpil ki fùl̄, a-yìntitam daaŋku làá nīn gbíntìi dɔ̄ m-nimbiin ní.» Man a-Dindaan a-Nimbɔtiu di lī míǹ.

²³Mana ní a ŋūǹ kí lì yii: <Maa kɔ́ tijɔkɔndi, maa tōotì diwaal Baal>? Kpèè kun a ŋá ditantakalinee! Béé tin a ŋée. A náań nì ugutansal un sáń ajan kɔkɔ puee ní.

²⁴A bí kii kumooun maŋki kin mántiǹ kuteeun laakin wāā pàaayee ní. Kì yaa nyàab̀ uja ń jɔ̄m̀-kèe, kì tíkì bijab num, ŋyunti gbantee, tiba kaa ti ŋūǹ kí cúú-kì. Ijaa in nyàab̀ kí jɔ̄m̀-kèe kaa ti gì. I pée kāntí-kì sɔkɔmii ní.

²⁵<Isirayeel yab, kpèèmaan tiŋan! Ni làá gbéetí kí fōō tiweendi ní ni-neen ń kpā.> Ama ní ni kíí yii: <Taa ti ŋūǹ kí gítí boon! M néeń awaa ní ki làá nīn jòó ki pá ŋi-boon.>

²⁶Kii bi nín cútí unaayuu icoo ń cúú-u puee, míǹ ní icoo làá dāá cúú nimbi Isirayeel yab, ni nì ni-bɔtiibi nì ni-kàliŋkpilib nì ni-saraaŋaliibi nì ni-bɔnaatiliibi.

²⁷Ni tùkù ndɔ ŋun ni dūu kpítì diwaalee yii: <Sii di sá man baa.> Ní kí bí ditaŋkpal yii: <Sii di màl̄-mi!> An nín bàà sá ní fàtī ni-nimbiin kí túĺ-mee, ní ni fātì ni-boon ki tīī-mi. Ama ni yaa kɔ́ dinimbinaamandi poonee ní ní bí-mi yii: <Yīkì malaa kí dāá fīī-ti.>

²⁸Awaa ŋin ni kpítèe bi la? Ŋí yīkì tí kpèè ŋi yaa ŋūǹ kí fīī-ni kí nyāntí-ni ni-nimbinaamandi poon! Di sá yii nimbi Juuda yab waaŋi wīikí ki jítiǹ ni-timmu nyɔkɔm.

²⁹Ba pu ní ni bí ki wòoǹ-mi? Ni-kɔkɔ yíkì ki jáń nì mi. Ti-Dindaan di lī míǹ.

³⁰M fáá-ni ama an kaa ŋá-ni tiba, kaa cíikì-ni, ní gbìl̄ kí béé tin m ŋée taapu. Ni dū ntàataajimu ki kūū ni-bɔnaatiliibi kii gbikinti nín bìliŋkī ipeel puee.

³¹«Nimbi waanee nib, ní pīlifìmaan tin ti-Dindaan sòon̄ nee tiŋan. M kpántì kuteeu ní ki tīī Isirayeel yabaaa, dibɔmbɔndi tiŋki ní? Kin ba pu ní m-nibul yab lì yii: <Ti làá cù laakin ti yaa lèe, taa làá fàtīí gítiń a-cee?>

³²Usapɔɔn ŋūǹ kí súntí u-wanléeŋkaati puɔɔɔ? Unimpucaan ŋūǹ kí súntí u-nimpucambɔkutil puɔɔɔ? Ama nimbi man nibul súntì man pu an yúntì tikpil tikpil.»

³³«Óooo! A nyí bi nín dì pu kí nyàab̀ kí ká dineendi pueeyeeee! An yāntì a mántiǹ ikpiti diŋál.

³⁴Bi kāntí a-wampeeŋkaati pu bisoodambi nì maanyiibab fatikuu. Ama aa cúú-bi bi bíi wìil̄ a-diiku punyɔkɔki. Nì míǹ kɔkɔee,

³⁵ní a lì yii: <Maa ŋá tiba. Báà an ŋá pu, ti-Dindaan làá páatí u-ŋuul m-pu.> Ama a nín lì yii: <Maa ŋá tikpitil tibee puee>, m làá sòoǹ a-bɔti.

³⁶A kpántì ubɔɔti sɔkɔmii! Ama á béé yii Eejipiti tiŋki làá kɔ́ǹ-si icoo kii Asuur tiŋki nín kɔ́ǹ-si icoo puee ní.

³⁷A làá dāá nyānní niin mun ki tú a-ŋalii a-yilpu nì icoo. Di sá yii ti-Dindaan dū bin pu a mákée ki fá. An kaa sá bíǹ pu ní a làá dī kí ŋá tiba.»