Read Ntcham Jérémie 21 Bible Online

Jérémie 21 - Ntcham bible

Jérémie 21

¹Tibɔti tin ti-Dindaan nìn sòon̄ nì Yeereemii ú dūú nàatī ubɔti Seedeesiyasee sɔ̀. Ubɔti nìn tú Maalkiya jipɔɔn Paasuur nì usaraaŋal Seefaniya, Maaseeyawuu jipɔɔn bí tùkù-u yii:

²«Bàlifì ti-Dindaan kí kpèè ti-yil pu bɔti, di sá yii Babiloon bɔtiu Neebukadineesaar bíi jáà nì ti. An yaa yíì ti-Dindaan làá tí ŋá u-maamaacikpaambee ubɔ kí yàntī ú búntí kí wàatī-ti.»

³Ní Yeereemii bí-bi yii: «Ní tin tùkù ubɔti Seedeesiyasi yii:

⁴Ti-Dindaan Isirayeel yab Nimbɔtiu nín sòon̄ puee sèé: <Ni bí ki jáà nì Babiloon bɔtiu nì u-janjaliibi bin bíi jáà nì nee. M làá ŋá bijanjaliibi bin bin nyáń agun boon ki jáà nì bee mpɔn bí fàtīí gítí kitiŋ poon.

⁵Man m-ba di làá dū m-pɔŋŋu nì m-kpabil kí já nì ni nì m-ŋuul nì m-bum nì m-biim poon.

⁶M làá yàntī bìlbil kúm ń kpɔ̀ kitiŋ nee pu nib nì ki-waŋkuti.

⁷Ti-Dindaan nín sòon̄ puee sɔ̀. Míǹ boonee, m làá dū Juuda bɔtiu Seedeesiyasi nì u-kàliŋkpilib kí ŋá Babiloon bɔtiu ŋaan. M làá dū kitiŋ nee nib bin kaa kpíì bìlbil kúmin àá kujaaun àá ŋkùm yuntiŋuee mun kí ŋá u-ŋaan. M làá dū-bi kí ŋá bi-nannanliibi bin nyàab̀ kí kpɔ̀-bee ŋaan. Neebukadineesaar làá yàntī bí pɔ̀fì-bi. Waa làá sɔ̄ bi-saai, kaa làá kíń ubɔ, kaa làá dàkà ubɔ mun kulaŋŋaŋfitiiu.>»

⁸Ti-Dindaan nín sòon̄ nì Yeereemii tibɔti tin ú dūú nàatī samaayee sèé: «Ti-Dindaan nín sòon̄ puee sɔ̀. M dū dimaŋfal saŋŋu nì ŋkúm saŋŋu ki bíl̀ ni-nimbiin.

⁹Bin kɔkɔ làá gbíntí Jeerusaleem tiŋkinee, kujaau nì ŋkùm nì bìlbil kúm di làá kpɔ̀-bi. Ama bin làá nyā kí cáá bi-ba kí tīī Babiloon yab bin bíi jáà nì nee làá ŋmátí. Tin an nibee páatèe di sá bi nín kaa kpíìyee.

¹⁰Ti-Dindaan nín sòon̄ puee sɔ̀. M làá fàtī kí já nì Jeerusaleem tiŋki kí ŋá-kì tikpitil, kaa sá tiŋan. M làá dū kitiŋ nee kí ŋá Babiloon bɔtiu ŋaan ní úǹ ń tūū-kì ŋŋmi.»

¹¹Tibɔti nee sá ki tīī Juuda bɔtiu dicaŋkun yab ní. Ní pīlifìmaan ti-Dindaan nyɔɔbundi,

¹²Daafiidi dicaŋkun yab! Ti-Dindaan nín sòon̄ puee sɔ̀. Ní kíĺ kutaafaau kí sòoǹ tibɔti ibaamɔn. Ní fōōmaan bin bi mùul̄ee bimuuliliibi ŋaan. An yaa kaa sá míǹ, m-ŋuul làá pōō kí yàaǹ ni-pu kii ŋŋmee. Di làá wà tikɔkɔ ní ubɔ kaa làá ŋmā kí gbíntí-dì.

¹³Ti-Dindaan nín sòon̄ puee sɔ̀. Nimbi bin kóò ditantakalin ki bí kii ditaŋkpal din cɔ́ kitimpiliŋ puee, man nì ni di cáá tibɔti. Di sá yii ni lì yii: «Ubɔ kaa ŋūǹ kí sìntīń doo kí já nì ti, àá kí kɔ́ ti-balilaŋkin.»

¹⁴Ti-Dindaan bí yii: «M làá dáaĺ ni-tafal kí nóó nì ni-tuŋkpitiŋ nín sá puee. M làá tūū Jeerusaleem bambaŋku ŋŋmi ní an wà tin kɔkɔ māntìi tú-kuee.»