Read Ntcham Jérémie 22 Bible Online

Jérémie 22 - Ntcham bible

Jérémie 22

¹Ti-Dindaan bí Yeereemii yii: «Sìntī Juuda bɔtiu beecindin. A yaa bàn̄ee, á sòoǹ tibɔti nee.

²Á sòoǹ yii: <Sii Juuda bɔtiu un kā Daafiidi beejal puee, pīlifì ti-Dindaan bɔti nee. Tì sá ki tīī a-kàliŋkpilib nì a-nibul yab bin jītí kipunyɔkɔ nee puee ní.>

³Ti-Dindaan nín sòon̄ puee sɔ̀. Ní dàkà ibaamɔn kí sòoǹ tibɔti ti-pú. Ní fōō bin bi mùul̄ee bimuuliliibi ŋaan. Ní taa sàaǹ unicaan nì ditaŋkpiibil nì ukpiipu, kí taa dàkà-bi tipɔmbɔti. Ní taa ti kpɔ̀ maanyiiba mpaan nee pu.

⁴Ni yaa lafun ŋá míǹ, ni làá nīn pée cáá bibɔtiibi bin làá nīn kàal̀ Daafiidi beejal puee ní. Bi làá nīn gbíntìi kàal̀ itaamu àá janjatɔrɔkub pu ki jītí kipunyɔkɔ nee pu ki kóò dibeecindin, bi nì bi-kàliŋkpilib nì dinibul nee.

⁵Ama ni yaa kaa pílifì tin m sòoǹee, man ni-Dindaan, m pūtì yii m làá yàntī dibeecindi nee ń kpántí adigbun[27].

⁶«Ti-Dindaan nín sòon̄ tibɔti tin Juuda bɔtiu cindi puee sɔ̀. «Min kamaa a ŋān̄ kii Galaadi bambaŋku, àá kii Leebanɔn jooŋŋi yilpu kúntí kuntee, m làá yàntī á kpántí kuteeu, kitiŋ kin báà ubɔ kaa ti kóòyee.

⁷M làá bɔ́ntí binib bí nàan̄-si, báà ŋma làá nīn ŋúb́ u-tɔntɔŋwanti. Bi làá gàatì a-jaantalkunyaambi bin sá seedir dɔyee kí tɔ̄ ŋŋmin.

⁸«Atimbun kupaau nib làá dāá jītí Jeerusaleem tiŋki caŋin. Bi làá dāá bàlifì tɔb yii: <Ba pu ní ti-Dindaan ŋá kitiŋkpaaŋŋi nee míǹ ní?>

⁹Ní bí dāá kíí-bi yii: <Kun yì-tèe di sá yii bi fá mpèé ŋun nìn bí bi nì ti-Dindaan bi-Nimbɔtiu kansikinee, ki cūtìi gbāaǹ awaa nimbiin ki jáam̀-ŋi.>»

¹⁰Ní taa sɔ̄ un kpíìyee pu, kí taa yāliŋkì u-pu. Ama ní sɔ̄maan un bi cúú ki cáa cée pu, kun puee waa ti làá fàtīí gítiń, ní kaa nín fātìi ká u-tiŋki kin poon bi màl̄-uee.

¹¹Ti-Dindaan nín sòon̄ Joosiyaasi jipɔɔn Saluum, Juuda bɔtiu un fōō u-baa Joosiyaasi yil ki kāl̀ dibeel, ki dáá nyáń kitiŋ nee poonee puee sèé. «U kpá kí gíti gítiń.

¹²Bi nín cúú-u ki cūnnì kitiŋ kin poon kuyuŋuee, niin ní u làá tin kpú, waa làá ti ká u-tiŋki.»

¹³An sá mbusu ní ki tīī unil un máń u-diiku an kaa tɔ́kɔ́ mbaamɔn pu, ki māā adiin ki tɔ̄kɔntí tɔb pu kaa dī maree. U yàntī bin kíǹee tūǹ u-tundi fám ní waa pà-bi bi-paati.

¹⁴U lì u-ban yii: <M làá mā kudikpaaŋŋu kí mā adiin kí tɔ́kɔń ku-yilpu. M làá lèekì tɔkɔlab, ní kí dū seedir dɔi kí nákań agun pu ní kí dū peentaman kí ŋmìtī-ku.

¹⁵A dàkafī yii a nín néeń seedir dɔyee pu ní a sá ubɔtaaa? A-baa nìn jīǹ ki nyù kii báà ŋmee ní. U nìn nóó mara saŋŋu ki nìn dàkà mbaamɔn ní tikɔkɔ nìn còom̄-u tiŋan.

¹⁶Ti-Dindaan nín sòon̄ puee sɔ̀. A-baa nìn mɔ́tí binandambi nì bisoodambi pu ní tikɔkɔ nìn còom̄-u tiŋan. Unil un ŋáań mimmee dàkà yii u lafun nyí-mi ní.

¹⁷Ama tin sii nyàab̀ee di sá a-baba paatii kaa dàkafī bin kíǹee pu. A pée nyàab̀ kí nīn kù maanyiibab ŋma ní ki dàkà binib tipɔmbɔti ki mùul̄-bi.

¹⁸An pu ní ti-Dindaan sòon̄ Joosiyaasi jipɔɔn Yoowakiim, Juuda bɔtiu pu yii: «U yaa láa kpíìyee, bí taa sɔ̄ u-pu. Ubɔ ń taa láa lì yii: <Ba naabuŋu dee, m-nabiki!> <Ba naabuŋu dee, m-niisal!> Ubɔ ń taa láa sɔ̄ u-pu kí lì yii: <Ba naabuŋu dee, m-dindaan!> <Ba naabuŋu dee, ti-baa!>

¹⁹Bi làá dāá síb́-u kii kimaŋee ní. Bi làá dāá fù-u kí nyāntí kí fá ú nīn dátiǹ Jeerusaleem punyɔmmu.»

²⁰«Jeerusaleem, jɔ̄m̀ Leebanɔn jooŋŋi pu kí nīn tátí. Cù Baasan tantakalin kí nīn kūuntí. Tɔ́kɔń Abariim jooŋŋi yilpu kí nīn tátí, kun puee an dóò a-bɔmbi kɔkɔ pu.

²¹Ŋyunti ŋun a nìn bí nsɔŋfinee, m nìn sòon̄ nì si, ama ní a kíí-mi yii: <Maa làá pīlifiǹ-si!> Tin a ŋá doooo a-sapɔntinee dee, aa pée pílifíǹ-mi dalba dalba.

²²Kubuŋu làá yòon̄ a-kpootiliibi kɔkɔ. An yōoǹ a-bɔmbi ki cūnnì kuyuŋu. Ikpiti in kɔkɔ a ŋée puee, a làá fá a-jilmau ní icoo ń cúú-si gbòooo.

²³Kɔŋkɔnnee, a kóò Leebanɔn bambaŋkun, ki máń a-diiku kii kunɔndii di pá seedir sufii puee. Ama iween yaa láa túuǹ-see, a làá dāá yāliŋkì, ní kí dāá jī falaa kii unimpu di kā imatiŋween puee.»

²⁴Á sòoǹ nì Yoowakiim jipɔɔn Yeekooniya Juuda bɔtiu yii: «Ti-Dindaan nín sòon̄ puee sèé: <M bí dimaŋfalin, m pūtì yii báà a yaa bàà sá kii kibɔmbiki ki fúuń m-ŋambiki m cáa nyìitī m-daaŋkuee, m làá fúutí-si kí fá.

²⁵M làá dū-si kí ŋá bin nyàab̀ kí kpɔ̀-si a fàŋkí yɔ́kɔ́ yɔkɔee ŋaan, an dàkà yii Babiloon bɔtiu Neebukadineesaar nì u-janjaliibi ŋaan.

²⁶M làá dū si nì a-na un màl̄-see kí tɔ̄ ndandati, kitincaŋ kin poon baa màl̄-nee. Niin ní ni làá tin kpú.

²⁷Ni làá dāá nyàab̀ nì ni-pɔŋŋu kɔkɔ kí gítiń, ama naa làá dāá ŋmā.>»

²⁸Binib bàlifī yii: «Kooniya gbanti kpántì kii disambil din wīī kaa ti bí tibanee, àá tiwan tin kaa ti kèetēe níii? Ba pu ní bi jìn̄-u ki cáań kitiŋ kin poon ní u nì u-biyaamu kaa nyée poon ní?»

²⁹M-tiŋki, m-tiŋki, pīlifì ti-Dindaan nyɔɔbundi!

³⁰Ti-Dindaan nín sòon̄ puee sèé: «Bí ŋmà Kooniya nee pu kii unil un kaa màl̄ ki kée. U bíil̀ u-maŋfal. U-dicaŋkun ubɔ kaa làá ŋmā kí kàl̄ Daafiidi beejal pu kí kpòotī Juuda tiŋki.»