Read Ntcham Jérémie 23 Bible Online

Jérémie 23 - Ntcham bible

Jérémie 23

¹Ti-Dindaan bí yii: «Mbusu dɔ̄ ki cí m-nibul kpootiliibi bin bí kii bipikpaaliibi bikpitibee. Bi féeń m-piii ní ki gbáà ki yàantí-i.»

²An pu ní ti-Dindaan Isirayeel Nimbɔtiu bíi sòon̄ bipikpaaliibi gbanti pu yii: «Ni yāntì m-piii wáŋkì ki yàl̄. Naa kpēē-i tiŋan. Too, mama m-ba làá kpèè ni-bɔti nì ni-tuŋkpitiŋ bɔti, man ni-Dindaan di lī míǹ.

³«Míǹ boonee, mama m-ba làá kóoǹ m-piii in kíǹ ki yàl̄ ki bí ntimu mun kɔkɔ poon m jìn̄-bi ki kɔ́ǹee kí kpāfì. M làá fàtīí gíiǹní-i i-pikpaapɔɔkun. Niinee, i làá bùtī kí wíiǹ.

⁴M làá tīī-i bipikpaamɔntiibi bin làá kpàà-iee. Niinee, iaa ti làá fàŋkì, kaa ti làá nyɔ̀ ŋkpatim, ní báà ubɔ kaa ti làá wāŋkì, ti-Dindaan di lī míǹ.»

⁵Ti-Dindaan bí yii: «Iwiin bí ki dòoń m làá yàntī bí màal̀ Daafiidi jipɔɔn tiŋman pu yɔu. U làá dū dinyil ní kí jī dibeel. U làá yàntī bí nīn tɔ́ mbaamɔn saŋŋu nì tin bí deedeeyee kitiŋ nee pu.

⁶U-yuntiŋuee, Juuda beel làá ká difiil ní Isirayeel yab ń nīn bí ŋgbansɔŋfin. Bi làá dāá nīn yíì-u yii: <Ti-Dindaan di sá ti-baamɔŋŋu.>

⁷«An pu ní ti-Dindaan sòon̄ yii, ŋwiin bí ki dòoń baa làá dāá gíti lì yii: <M pūtì ti-Dindaan un bí dimaŋfalin ki nyántìń Isirayeel yab kuyuŋun Eejipiti tiŋkinee!>,

⁸ama bi làá dāá lì: <Nì ti-Dindaan un bí dimaŋfalin, ki nyántìń Isirayeel yab kitiŋ kin bí ŋgan púee nì ntimu mun kɔkɔ poon u nìn jìn̄-bi ki kɔ́ǹ bi fātìi gítìń ki kíǹ ki kóò bi-tiŋkinee pu.>»

⁹Ti-Dindaan nín sòon̄ u-bɔnaatiliibi pu puee sèé: M-pɔbil bíil̀ m-wunti kɔkɔ jìkì. M bí kii udanyɔgbilee, a lì kii unil un nyùn̄ ndaam ki bál̀ee. An sá ti-Dindaan circir Nimbɔtiu nì tin u sòon̄ nì mee pu.

¹⁰U bí yii: «Kitiŋ nee poonee, binib kɔkɔ sá bilaakpaadambi ní. Bi-kɔkɔ sáń ki cá tikpitil laŋki ní, bi cáá tininjati kí ŋá tin kaa ŋān̄ee. Mbusu ubɔ puee, kitiŋ nee kā dikpool. Kitiŋ nee naakpaapɔɔku kɔkɔ kūń nyíki nyiki.»

¹¹Ti-Dindaan bí yii: «M-bɔnaatiliibi nì bisaraaŋaliibi mun sá bikpitib ní. Áli gba m kāntí bi-tuŋkpitiŋ m-Diikun.

¹²Míǹ puee bi-saŋŋu ń kpántí dijɔnjɔndi. Bí wāŋkì dibɔmbɔndin kí lítí. M làá cáań nnaabu kí tɔ̄ bi-pu dibindi din bi làá dāá sòoǹ bi-nyɔkɔpu yayee.»

¹³Samaarii bɔnaatiliibi ceeyee, m ká tiwan tin cáá titantanee. Diwaal Baal bɔti ní bi nìn nàatī, ní ki gáatí m-nibul Isirayeel yab.

¹⁴Ama tin m ká Unimbɔti bɔnaatiliibi bin bí Jeerusaleemee ceeyee di sá ntimbiil bɔti. Bi ŋáań tilaakpaal, ki mɔ́ntí inyimɔn, ki tìì bikpitiŋaliibi kunyannyaau, an yāntì báà ubɔ kaa ti ŋūǹ kí fá u-kpitii. Bi-kɔkɔ bí m-cee kii Soodoom yabee ní. Jeerusaleem yab náań nì Goomoora yab ní.

¹⁵An pu ní ti-Dindaan Mpɔŋkɔdaan sòon̄ u-bɔnaatiliibi pu yii: «M làá tīī-bi kisubiki kin tūee bí ŋmɔ́, kí tīī-bi nnyim min cáá ndabiimee bí nyɔ̀. Di sá yii Unimbɔti bɔnaatiliibi bin bí Jeerusaleemee cee ní ikpiti nyánní ki tīntì kitiŋ nee kɔkɔ.»

¹⁶Ti-Dindaan Mpɔŋkɔdaan bí yii: «Ní taa pīlifì tibɔti tin Unimbɔti bɔnaatiliibi sòoǹee, bi mɔ́ntí-ni ní. Bíǹ bi-ba di nāantí tin bi sòoǹee, taa nyánní man ni-Dindaan nyɔkɔn.»

¹⁷Bi lì bin kpèé-mi fámee cee yii: <Ti-Dindaan sòon̄ yii ni làá ká ŋgbansɔŋfi.> Bi tùkù bipɔɔgbifindambi yii: «Nnaabu ŋubɔ kaa làá bàń-ni.»

¹⁸Di sá yii ŋma di cūtì laakin man ni-Dindaan kàal̀ ki lèekī ilandɔkɔee? Ŋma di ká m-bɔti ki gbìl̄-tì? Ŋma di fōotì ki yīkiǹ m-nyɔɔbundi ki gbìl̄ di-taapu.

¹⁹Ti-Dindaan buŋkpaaŋku dòoń, u-ŋuul làá pōō. Kunaakpaabuŋkpaaŋŋu kubɔ bíi jītí, ku bí binikpitib yiliŋ pu ki màntī.

²⁰Ti-Dindaan yaa kaa ŋá u nín lēē kí ŋá puee, u-ŋuul kpá kí sɔ̀ŋkì. Boon kpataaayee, ni làá dāá gbìl̄ taapu.

²¹Unimbɔti bɔnaatiliibi gbantee, maa tú-bi, ama ní bi sáń ki cá. Maa sòon̄ nì bi, ama ní bi bí ki nàatī m-bɔti.

²²Bi yaa bàà nìn bí laakin m kāl̀ ki lēē ilandɔkɔee, bi bàà sòoǹ nì m-nibul bí béé m-bɔti. Bi bàà nyāntí binib bi-bimbikpitim poon, nì ikpiti in bi ŋáańee poon.

²³Ti-Dindaan bí yii: «M sá bin bí kɔŋkɔmee baba Nimbɔtiu níii? Maa sá bin bí ndanee mun Nimbɔtiuaaa?

²⁴Unil ŋūǹ kí báĺ laaba ḿ taa wāl̀-uaaa? Man ni-Dindaan di lī míǹ. Naa nyí yii m gbí kutagbɔŋu nì kitiŋ kɔkɔɔɔ?» Man ni-Dindaan di lī míǹ.

²⁵Man ni-Dindaan, m gbìl̄ tin m-bɔnaatiliibi sòoǹee. Bi lì yii bi sòoǹ m-yindi pu ní, ama an kaa sá míǹ. Bi lì yii: <M dámintì kudamintiiu kubɔ, m dámintì kudamintiiu kubɔ.>

²⁶Kí tin cáá sāā ŋyunti ŋulɔŋu dee? Ba di kalin kā bibɔnaatiliibi gbanti yiliŋin ní bi nàatī tinyimɔmbɔti ní? An sá bibɔnaatiliibi bin di nāantí tibɔti bi-ba ki nàatēe ní.

²⁷Nì bi-damintiiti tin bi cáa sòoǹ tɔb ceeyee, bi dàkafī yii m-nibul làá súntí m-pu, kii bi-naanjab nín nìn dī diwaal Baal pu ki súntì m-pu puee ní.

²⁸Unimbɔti bɔnaatiliu kansikin un yaa dámintèe ń sòoǹ tin u kée. Ama un fōō m-nyɔɔbundee ń nàatī-dì deedee! Idi nì tifin kaa sá ubaanti. Ti-Dindaan di lī míǹ.

²⁹Ti-Dindaan bí yii: M-bɔti sá kii ŋŋmee ní, a lì kii dikújal din bi cáa wìil̄ ditaŋkpakpaandee ní.

³⁰«Ti-Dindaan bí yii: <M làá jáǹ bibɔnaatiliibi bin di yòontí tɔb bɔti ki cáa nàatī yii an sá m-bɔtee.

³¹M làá jáǹ bibɔnaatiliibi bin di cáá bíǹ bi-ba bɔti ki nàatī yii an sá m-yatee, ti-Dindaan di lī míǹ.>

³²Ti-Dindaan bí yii: <M làá jáǹ-bi. Bi-damintiiti sá tinyimɔmbɔti ní. Bi yaa sòoǹ bi-damintiiti gbanti puee, bi cáá tinyimɔmbɔti nì nyɔɔmálmal ki kíiĺ m-nibul. Man kaa tú-bi, kaa dū dinyɔɔbundi diba ki ŋúbíǹ-bi. Baa pée ŋūǹ kí kèetī m-nibul tiba poon, ti-Dindaan di lī míǹ.>»

³³Ti-Dindaan bí Yeereemii yii: «Dinibul nee niliu ubɔ, àá Unimbɔti bɔnaatiliu ubɔ àá usaraaŋal ubɔ yaa bālifì-si yii: <Ti-Dindaan nyɔɔbundi sá dilal? Diwaŋgul dilal ní u làá tí túń-ti ní?> Á kíí-bi yii: <Ti-Dindaan bí yii nimbi di sá diwaŋgul, ní m làá túutí-ni kí fá kí wàatī m-ba, ti-Dindaan di lī míǹ.>

³⁴M-nibul niliu ubɔ àá m-bɔnaatiliu ubɔ àá usaraaŋal ubɔ di yaa lī yii: <Ti-Dindaan di túǹ-mi diwaŋgulee,> m làá dáaĺ udaan nì u-dicaŋku tafal.

³⁵Ni máaǹ ki bàlifì tɔb yii: <Ti-Dindaan kíí-ti yii ba ní? Ti-Dindaan bí yii ba ní.>

³⁶Ama ní taa ti sòoǹ yii ti-Dindaan túǹ-ti diwaŋgul dilal ní? Mimmee ti-Dindaan nyɔɔbundi sá diwaŋgulaaa? Ni yaa bíi lì mimmee ni bíi kpántí ti-Dindaan Unimbɔti Mpɔŋkɔdaan un bí dimaŋfalinee bɔti taapu dee.

³⁷Kpèè tin a máaǹ kí bàlifì Unimbɔti bɔnaatiliuee sèé: <Ti-Dindaan kíí-si yii bá ní? Ti-Dindaan tùkū-si yii ba ní?>

³⁸Ama ni yaa gbíntìi lì yii ti-Dindaan túǹ-ti diwaŋgulee, min kamaa ti-Dindaan bí yii ní taa ti lì mimmee, man ni-Dindaan nín lī puee sɔ̀.

³⁹M làá yòon̄-ni kí túń kí cáá ni nì ni-tiŋki kin m nìn tīī ni-naanjabee kí tɔ̄ kí fá ndandati.

⁴⁰M làá yàntī icoo ń cúú-ni kí nīn cáa cá jaanjaan, ní ní fá ni-jilmau kí nīn cá abin abin. Unil dāa pée kpá kí súntí.»