Read Ntcham Jérémie 24 Bible Online

Jérémie 24 - Ntcham bible

Jérémie 24

¹Ti-Dindaan nìn yāntì m ká tikabiti tili tin poon fiigi subiliŋ kēe yú ti-Dindaan kɔŋkooŋŋu nyɔkɔpu. An nìn sá ŋyunti ŋun Babiloon bɔtiu Neebukadineesaar nìn cúú Yooyakiim jipɔɔn Yeekooniya, Juuda bɔtiu nì Juuda yab kàliŋkpilib nì bicaabi nì bin tūǹ ŋŋal pu tundee Jeerusaleem ki cūnnì Babiloon tiŋkin kuyuŋuee ní.

²Fiigi biliŋ ŋin ŋān̄ kii asubipeekaayee nìn kā kukabiku kubɔ poon ní fiigi biliŋ ŋin bíil̀ unil kaa ŋūǹ kí ŋmɔ́ee kā kukabiku kun kíǹee poon.

³Ní ti-Dindaan bālifì-mi yii: «Yeereemii, ba ní a wāĺ?» Ní m kíí-u yii: «M wāĺ fiigi subiliŋ ní. Amɔntee ŋān̄ tikpilku, ama ní akpilee ŋíǹ baasii bíil̀. Ŋi nín bíil̀ puee, unil kaa ŋūǹ kí ŋmɔ́-ŋi.»

⁴Niinee ní ti-Dindaan bí-mi yii:

⁵«Ti-Dindaan Isirayeel Nimbɔtiu nín sòon̄ puee sɔ̀. Kii unil nín kpèé fiigi subimɔntiŋ nee án fáatíǹ-u puee, míǹ ní ma mun làá kpèè Juuda yab bin bínní kuyuŋun nee bí fáatíǹ-mi, bíǹ bin m jìn̄ kitiŋ nee pu ki cūnnì kuyuŋuee.

⁶M làá kpèè-bi nì kulaŋŋaŋfitiiu ní kí gíiǹní-bi kitiŋ nee poon. Maa ti làá gbá kí kpìtī-bi, ama m làá fàtīí mā-bi ní, maa ti làá cóotí-bi, ama m làá fàtīí cóoń-bi ní.

⁷M làá dāá tīī-bi dipɔbil din làá yàntī bí béé yii man di sá bi-Dindaanee. Bi làá nīn sá m-nibul, ní man ń nīn sá bi-Nimbɔtiu, di sá yii bi làá fàtīí gítiń m-cee nì bi-pɔbil kɔkɔ.

⁸«Ama kii bi nín ŋáań asubil ŋin bíil̀ kaa bí diŋmɔlee puee, míǹ ní m làá ŋá Juuda bɔtiu Seedeesiyasi nì u-kàliŋkpilib nì binib bin kíǹ Jeerusaleem tiŋkinee nì bin kóò kɔŋkɔnnee Eejipiti tiŋkinee. Ti-Dindaan di lī míǹ.

⁹Duulinya beeŋi kɔkɔ yaa láa ká mimmee, ŋi làá dāá kɔ́ dinyoondin. Bi yaa láa là kí kɔ́ǹ ubɔ icoo àá kí bèel̀ ubɔ àá kí sìì ubɔ àá kí tɔ̄ ubɔ mbusu ntimu mun kɔkɔ poon m làá dāá jà-bi kí kɔ́ǹee, bíǹ ní bi làá dāá yòon̄ ŋabika.

¹⁰M làá dāá dū kujaau nì ŋkùm nì bìlbil kúm kí tɔ̄ bi-pu áli bí dāá wāŋkì kitiŋ kin m tīī bi nì bi-naanjabee poon.»