Read Ntcham Jérémie 25 Bible Online

Jérémie 25 - Ntcham bible

Jérémie 25

¹Joosiyaasi jipɔɔn Yoowakiim nín kāl̀ Juuda tiŋki pu dibeel dibinnanaatiil poonee, ti-Dindaan nìn sòon̄ nì Yeereemii Juuda nibul kɔkɔ pu. An nìn sá Babiloon bɔtiu Neebukadineesaar beel bimpeepeekaal poon ní.

²Unimbɔti bɔnaatiliu Yeereemii nìn sòon̄ nì Juuda yab kɔkɔ nì bin kɔkɔ kóò Jeerusaleemee yii:

³«Amɔn jipɔɔn Joosiyaasi, Juuda bɔtiu nín kāl̀ dibeel abin saalaa nì ata poon kí dāá sāā díǹee, an ŋá abin mmuŋku nì ata dee. M bí ki sòoǹ nì ni ti-Dindaan bɔti kaa gbèentí, ama naa pílifí.

⁴Ti-Dindaan túnní u-tɔntɔnliibi u-bɔnaatiliibi ni-cee kaa gbēeǹ, ama naa kpōoǹ ni-tafal ki pílifì-bi.

⁵Bi nìn tùkū-ni yii: <Báà ŋma ń fá u-bimbikpitim nì u-tuŋkpitiŋ. Niinee ni làá ŋmā kí kàl̄ kitiŋ kin man ni-Dindaan tīī ni nì ni-naanjabee poon kí nīn cá jaanjaan.

⁶Ní taa nín̄ jòó ki pá awaa boon kí nīn jáaḿ-ŋi, kí taa gbàan̄ ŋi-nimbiin kí tòotī-ŋi. Ní taa mā àá kí kpítí awaa kí gbítí m-ŋuul. Mimmee maa làá ŋá-ni tikpitil tiba.

⁷Ama ní naa pílifiǹ-mi, ní ki kpítì àá ki mɔ́ɔ́ awaa ŋin sá ni-naabuŋuee ki gbítì m-ŋuul. Ti-Dindaan di lī míǹ.>

⁸«An pu ní ti-Dindaan Mpɔŋkɔdaan bí yii: <Ni nín kaa pílifì m-bɔtee puee,

⁹m làá tɔ̄ bí cáań ŋgan pú nibuliŋ. M làá yíiń m-tɔntɔnliu Neebukadineesaar, Babiloon bɔtiu. M làá cáań bíǹ gbanti kɔkɔ kí tɔ̄ kitiŋ nee nì ki-nib nì ntimu mun māntìi tú-kèe pu. M làá nàan̄ ni nì bi kɔkɔ. M làá yàntī kitiŋ nee ń kpántí ntimbiil paaŋŋu, adigbun kí nīn cá jaanjaan. Binib làá dāá nīn gbáà inimɔɔn biilii, man ni-Dindaan di lī míǹ.

¹⁰M làá kúntí ifaal nì dipɔɔpindi kuŋkuuntii nì inimpucanlan bi-cee. M làá kúntí tinàti tin nà idee wooku ní kí kpɔ̀ fitila ŋmiŋu.

¹¹Kitiŋ kɔkɔ làá kpántí adigbun, mpaan ŋun kaa làá nīn bí ŋkpèéyee. Anibul nee kɔkɔ làá nīn bí Babiloon bɔtiu taapu abin imuŋku ita nì saalaa ní[28]>.»

¹²Ti-Dindaan bí yii: «Abin imuŋku ita nì saalaayee yaa láa jítèe, m làá dāá dáaĺ Babiloon bɔtiu nì u-yab tafal ikpiti in bi ŋée pu. M làá kúntí Babiloon tiŋki ní kí yàntī kí kpántí kuteeu kí nīn cá jaanjaan.

¹³M làá cáań inaabu in kɔkɔ m nìn sòon̄ bi ŋmàn̄ ki ŋá tigbɔn poonee kitiŋ nee pu. Tíǹ ní m nìn yāntì Yeereemii sòon̄ ki nāatì atimbun kɔkɔ pu.

¹⁴Di sá yii ntimu mun cáá mpɔnee nì bibɔtikpaambi mun làá dāá nyīī Babiloon yab kí gùl̄ bi-taapu. Niinee ní ḿ pà-bi bi-tuŋkpitiŋ nì bi-ŋáaǹtam paati.»

¹⁵Ti-Dindaan Isirayeel yab Nimbɔtiu bí-mi yii: «Fōō ndamam kɔŋkɔnnyɔkaau un poon m-ŋuul kā nee, kí cáá nyùntī atimbun ŋin kɔkɔ cee m làá tɔ̄-si nee yab.

¹⁶Bi yaa láa ká m tú binib bi dū kitàataajiki ki pɔ̄fì binib bi-kansikinee, bi làá dāá nyɔ̀ kí gbí ní ki kíǹ ki kpìntī, ní bi-yiliŋ ń lábití.»

¹⁷Ní m fōō ndamam kɔŋkɔnnyɔkaauee ti-Dindaan ŋaan ki cáa nyūntì atimbun ŋin kɔkɔ cee u tú-mee nib.

¹⁸M nyūntì Jeerusaleem yab nì Juuda timmun yab nì bibɔtiibi nì bikàliŋkpilib, ní ntimu gbanti kpántì adigbun, ki kíǹ ki fàantí. An yāntì binib gbáà mu-pu ibiil ní ki yāntì mu kpántì ŋabika bi cáa tòó mbusu.

¹⁹Míǹ boonee ní m tīī Eejipiti yab bɔtiu Faaroo nì u-kàliŋkpilib nì u-bɔtibiliŋ nì u-nibul kɔkɔ bi nyùn̄,

²⁰nì nyaaŋmaliŋku nibuliŋ ŋin kóò Eejipiti tiŋkinee, nì Uusi tiŋki bɔtiibi nì Fiiliistii yab bɔtiibi an dàkà yii Asikeelɔn yab bɔtiibi nì Gaasaa yab bɔtiibi nì Eekrɔn yab bɔtiibi nì Asidoodi yab bin kíǹee.

²¹M nìn tīī Eedoom yab nì Moowaab yab nì Amɔn yab,

²²nì Tiir yab bɔtiibi nì Siidɔn yab bɔtiibi nì ntimu mun bí tiŋku gbandee,

²³nì Deedan yab nì Teema yab nì Buusi yab nì bin kòol̄ bi-gatikiiyee,

²⁴nì Bilaalibub tiŋki bɔtiibi kɔkɔ nì nyaaŋmaliŋku nibuliŋ ŋin kóò kuteeunee kɔkɔ.

²⁵M nìn tí tīī Simrii yab bɔtiibi kɔkɔ nì Eelaam yab bɔtiibi nì Meedi yab bɔtiibi,

²⁶nì bibɔtiibi bin kɔkɔ bí ŋgan púee, bin pìl̄ee nì bin bí ndandatee kɔkɔ. Abee ŋin kɔkɔ bí duulinyanee máaǹ kí nyɔ̀ kɔŋkɔn gbanti kí kíǹ kí tīī tɔb. Bíǹ kɔkɔ yaa láa nyùn̄ ki dóòyee ní Seesaki bɔtiu ń nín nyɔ̀.

²⁷Á tùkù-bi yii ti-Dindaan Mpɔŋkɔdaan, Isirayeel Nimbɔtiu nín lī puee sèé: «Nyɔ̀maan! Gbímaan kí wùliŋkì! Lítímaan kí taa yīkì kí kpèè kitàataajiki kin m làá dūú pɔ̀fì binib ni-kansikinee.

²⁸Biba yaa yíì kaa làá fōō a-ŋaan ndamam kɔŋkɔnnyɔkaauee kí nyɔ̀ee, á tùkù-bi yii: <Ni làaa, naa làaa, ni làá fōō-u kí nyɔ̀, ti-Dindaan Mpɔŋkɔdaan di lī míǹ.

²⁹Di sá yii m dū nnaabu ki tɔ́ mama m-ba tiŋki pu, ní nimbi dàkafī yii m làá yàntī-naaa? Aayee, maa làá yàntī-ni fám. M làá dū kujaau kí tɔ̄ kitiŋ nee nib kɔkɔ pu, man ni-Dindaan Mpɔŋkɔdaan di lī míǹ.>»

³⁰Ní ti-Dindaan gíti bí-mi yii: «Dū tibɔti nee kí nàatī kí tùkù-bi yii: «Ti-Dindaan kāl̀ yilpu ki téenní. U kāl̀ u-circir kɔŋkooŋŋun ki yāntì bi gbìl̄ u-neen pu. U tátí u-tiŋki pu, u bíi kūuntí kí jáǹ kitiŋ nib kɔkɔ, kii bin bí ki tà fiinyi biliŋ kí nyāntí ndaamee.

³¹Kuwoou kun u ŋáańee bàn̄ kitiŋgbeennyɔkɔ. Ti-Dindaan di bíi sòoǹ anibul bɔti, u yíiń inifunaan kɔkɔ u-bɔsoondiikun. U làá yàntī bí pɔ̀fì bikpitiŋaliibi.» Ti-Dindaan di lī míǹ.

³²Ti-Dindaan Mpɔŋkɔdaan nín sòon̄ puee sèé: «Nnaabu ŋubɔ jéetì ditimbundi diba pu ki tin póotì din kíǹ pu, kubuŋkpaaŋŋu nyánní kitiŋgbeennyɔkɔ ki bíi jītí.»

³³Ŋwiin gbantee, bin ti-Dindaan làá dāá kpɔ̀ee làá dāá nīn bí kitiŋ gbeennyɔkɔ kiba kí tin sāā kin kíǹee. Tíǹ gbanti kɔkɔ yaa láa bāańee, ubɔ kaa dāa sūǹ bi-pu, kaa dāa kōontí bi-nikpiliŋ ki dāa nín nyàab̀ kí síb́-ŋi. Ŋi làá dāá dòon̄ kitiŋ ní kí kpántí ntiŋkpam.

³⁴Bikpootiliibi, gāāmaan ikpiisilan, nín̄ gbáàmaan ibiil kí dòon̄ kitiŋ kí nīn bíliŋkí. Di sá yii ŋyunti bāań bí kpɔ̀ ni mun dee. Ni làá lítí ní kí wīī kii disambil din pɔ̄ɔ̄ kudaauee.

³⁵Bikpootiliibi kaa làá ká kibalilaŋ, ní bipikpaaliibi kaa làá ŋmā kí sāǹ kí ŋmátí.

³⁶Bi gbìl̄ bikpootiliibi biilii pu nì bipikpaaliibi yaliŋkii pu. Di sá yii ti-Dindaan nāaǹ bi-pikpaapɔɔku.

³⁷Ti-Dindaan ŋuukpaandi puee, kunaakpaapɔɔu ŋmíl̀ díkí diki fɔ́ŋfɔŋ.

³⁸Gbikinti nyáń u-mɔgbaakin. Kujaau kun poon baa sūǹ ubɔ saayee nì ti-Dindaan ŋuukpaandi puee, bi-tiŋki kpántì kuteeu.