Read Ntcham Jérémie 26 Bible Online

Jérémie 26 - Ntcham bible

Jérémie 26

¹Joosiyaasi jipɔɔn Yoowakiim, Juuda bɔtiu beel nín kíĺ puee ní ti-Dindaan sòon̄ nì Yeereemii tibɔti nee yii:

²«Man ni-Dindaan nín sòon̄ puee sɔ̀. Cùú yūĺ kunimbɔtidii cindin. Á sòoǹ nì bin kɔkɔ nyēeń Juuda yab timmun ki dòoń ki jáaḿ-mee. Tibɔti tin kɔkɔ m tīī-si mara á tùkù-bee, dūú tùkù-bi, á taa báĺ-bi báà tiba.

³An yaa yíì bi làá pīlifiǹ-si ní báà ŋma ń fá u-bimbikpitim. Bi-tuŋkpitiŋ puee, m bàà lēē kí dū nnaabu kí tɔ̄ bi-pu. Ama bi yaa pílifì, m làá kpántí m-landɔkɔŋu.

⁴Á dāá tùkù-bi yii, ti-Dindaan nín sòon̄ puee sèé: <Nín̄ nóómaan marab bin m tīī-nee.

⁵Ní pīlifìmaan m-tɔntɔnliibi m-bɔnaatiliibi. M pée tūǹ-bi ni-cee ní kaa gbèentí ama ní naa pílifíǹ-bi.

⁶Ni yaa kaa pílifèe, m làá wīī kunimbɔtidii nee kii m nín nìn wīī Siiloo[29] yɔkɔ puee. Niinee atimbun ŋin kɔkɔ bí duulinyanee poonee, m làá dū Jeerusaleem ní kí ŋá ŋabika bí nīn cáa tòó tɔb mbusu.>»

⁷Bisaraaŋaliibi nì Unimbɔti bɔnaatiliibi nì samaa kɔkɔ gbìl̄ tibɔti tin Yeereemii sòon̄ kunimbɔtidii cindinee.

⁸Yeereemii nín sòon̄ tin kɔkɔ ti-Dindaan tīī-u mara ú sòoǹee ní bisaraaŋaliibi nì bibɔnaatiliibi nì samaa kɔkɔ cúú-u ní ki bí yii: «A máaǹ ŋkúm!

⁹A cáá dipɔbil ki nāatì ti-Dindaan bɔti yii: <Bi làá wīī kunimbɔtidii nee kii Siiloo yɔkɔee! Bi làá kpēelikì Jeerusaleem tiŋki ní ubɔ ń taa nín̄ gíti kóò ki-ni!» Ní bin kɔkɔ nìn bí kunimbɔtidiinee kóoǹ ki múkuǹ Yeereemii pu.

¹⁰Juuda yab kàliŋkpilib nín gbìl̄ an bɔtee, ní bi yíkì dibeecindi ki nín cá kunimbɔtidii laŋki. Míǹ boonee ní bi kóoǹ ki kpáfì kunimbɔtidii punyɔkɔki Kipɔŋ nyɔkɔpu.

¹¹Niinee ní bisaraaŋaliibi nì Unimbɔti bɔnaatiliibi bí bikàliŋkpilib nì samaa kɔkɔ yii: «Kijapaai nee máaǹ ŋkúm, di sá yii u sòon̄ ki tɔ́ Jeerusaleem pu, nimbi ni-ba tafal gbìl̄ míǹ.»

¹²Ama ní Yeereemii bí bikàliŋkpilibee nì samaa kɔkɔ yii: «An sá ti-Dindaan di túnní-mi ḿ dāá sòoǹ tin ni gbìl̄ nee kí tɔ̄ kunimbɔtidii nee nì Jeerusaleem tiŋki pu.

¹³Kɔŋkɔnnee, ní kpántí ni-bimbim kí nīn ŋáań min kítèe, kí pīlifì ni-Dindaan ni-Nimbɔtiu nyɔkɔ. Niinee u làá kpántí u-landɔkɔŋu. Waa làá ti dū nnaabu kí tɔ̄ ni-pu kii u nín sòon̄ puee.

¹⁴Mamee, m bí ni-ŋaan. Ŋámaan-mi min ni ká yii an máaǹee.

¹⁵Ama ni máaǹ kí béé yii nimbi nì Jeerusaleem tiŋki nì ki-nib yaa kūū-mee, maanyiiba fatikuu kpuulool làá lítí ni-pu. Di sá yii ti-Dindaan di lafun túnní-mi ni-cee ḿ sòoǹ nì ni tibɔti nee kɔkɔ ní gbìl̄.»

¹⁶Niinee ní bikàliŋkpilib nì samaayee bí bisaraaŋaliibi nì Unimbɔti bɔnaatiliibi yii: «Kijapaai nee kaa máaǹ ŋkúm, di sá yii tin ti-Dindaan tùkū-uee ní u dūu nāatì-ti.»

¹⁷Míǹ boonee ní bitindaŋkpilib kansikin biba yíkì ki bí samaa kɔkɔ yii:

¹⁸«Ŋyunti ŋun Eeseekiyaasi nìn sá Juuda bɔtiuee, Unimbɔti bɔnaatiliu ubɔ nìn bí bi yíì-u Miisee, u sá Mooreeseeti tiŋkin. U nín tùkū Juuda nibul kɔkɔ puee sɔ̀. Ti-Dindaan Mpɔŋkɔdaan nín sòon̄ puee sèé: <Siiyɔn tiŋki làá dāá kpántí kii bukpaa bun bi kùn̄ee ní, Jeerusaleem làá dāá kpántí adigbun ŋma, ní kunimbɔtidii gbantaŋki ń kpántí kimɔgbaai[30].>

¹⁹Mimmee Juuda bɔtiu Eeseekiyaasi nì Juuda yab nìn kūū Miiseeee? Aayee, ama bi nìn fāŋkì ti-Dindaan ní ki nìn pɔ́ɔǹ kí ŋá min fáatiǹ-uee. Niinee ní ti-Dindaan nìn yāntì kaa ti cáań nnaabu ŋun u nìn sòon̄ kí cáań kí tɔ̄ bi-puee. Too timbi yaa kūū uninja nee, timbi ti-ba ní ti làá ŋá tikpitil.»

²⁰Ŋyunti gbantee, uninja ubɔ mun nìn bí ki sá Unimbɔti bɔnaatiliu ki nàatī ti-Dindaan bɔti. Úǹ di nìn sá Seemayawuu jipɔɔn Uriya. U nìn sá Kiiriyati-Yeeyariim tiŋkin ní. U mun nìn sòoǹ ki tòó Jeerusaleem tiŋki nì Juuda nibul pu kii Yeereemii nín nìn ŋáań puee ní deedee.

²¹Ubɔti Yooyakiim nì u-janjakpilib kɔkɔ nì u-kàliŋkpilib nìn gbìl̄ tin Uriya sòon̄ee. Niinee ní ubɔti nyàab̄ kí kpɔ̀-u. Uriya nín gbìl̄ mimmee ní ki fāŋkì ki sáǹ ki cūtìi bál̀ Eejipiti tiŋkin.

²²Ama ní ubɔti Yooyakiim dū Akibɔɔr jipɔɔn Eelnatan nì bininjab biba mun ki tú Eejipiti.

²³Bi nìn cūtì Eejipiti tiŋkin ki cúuń Uriya ki cáań ubɔti cee. Yooyakiim nìn yāntì bi kūū-u, ní ki yāntì bi dū u-wunti ki tɔ́ mbòó ŋun poon bi síb̀ báà ŋmee.

²⁴Ama Safan jipɔɔn Ayiikaam nìn wúń Yeereemii pu. Úǹ puee, baa nìn dū Yeereemii ki ŋá samaa un nìn nyàab̀ kí kpɔ̀-uee ŋaan.