Read Ntcham Jérémie 28 Bible Online

Jérémie 28 - Ntcham bible

Jérémie 28

¹Dibimbaantiil gbanti poon, an dàkà yii Juuda bɔtiu Seedeesiyasi nín kāl̀ dibeel dibinnanaatiil poon uŋmaŋmooŋmooti poonee ní Unimbɔti bɔnaatiliu Ananiya, Asuur jipɔɔn un sá Gabawɔn tiŋkinee nìn bí kunimbɔtidiin. U nìn kíĺ ki bíi sòoǹ nì Yeereemii nì bisaraaŋaliibi nì samaa kɔkɔ nimbiin. U nìn bí yii:

²«Ti-Dindaan Mpɔŋkɔdaan Isirayeel Nimbɔtiu nín sòon̄ puee sèé: <M làá léetí-ni kpancikil un Babiloon bɔtiu léeǹ-nee.

³Babiloon bɔtiu Neebukadineesaar nìn yōoǹ kunimbɔtidii poon wanti ki cūnnì Babiloon tiŋkin. Too an kíǹ abin ali deedee m làá fàtīí gíiǹní tiwan gbanti doo.

⁴M làá fàtīí gíiǹní Juuda bɔtiu Yeekooniya, Yooyakiim jipɔɔn doo, ki kpáaǹ bin kɔkɔ bi cúú ki cūnnì Babiloon tiŋkin kuyuŋuee, man ni-Dindaan di lī míǹ. Tiŋman, m làá léetí kpancikil un Babiloon bɔtiu dūu léeǹ-nee.>»

⁵Niinee ní Unimbɔti bɔnaatiliu Yeereemii kíí Unimbɔti bɔnaatiliu Ananiya nì bisaraaŋaliibi nì bin kɔkɔ nìn bí kunimbɔtidiinee nimbiin yii:

⁶«Ameeni! Ti-Dindaan ń ŋá kii a nín dá láá nāatì tin nee kí gíiǹní kunimbɔtidiin wanti tin kɔkɔ bi yōoǹee nì bin kɔkɔ bi cúú ki cūnnì Babiloon tiŋkin kuyuŋuee doo.

⁷Nì míǹ kɔkɔee, sii nì samaa kɔkɔ ń pīlifì tibɔti tin m làá sòoǹ nee tiŋan.

⁸Unimbɔti bɔnaatiliibi nìn bí an yúntì ki wāatì ní man nì sii dāa nín dɔ́miń. Bi nìn nāatì Unimbɔti bɔti ki tùkū ntimu tikpil nì abeekpaan nib. Bi nìn sòon̄ nì bi kujaau nì nnaabu nì bìlbil kúm pu.

⁹Ama Unimbɔti bɔnaatiliu ubɔ yaa nāatì yii ŋgbansɔŋfi làá nīn bée, mana ní bi ŋūǹ kí béé yii ti-Dindaan di lafun túnní-u? See tin u sòon̄ee yaa láa ŋá mimmee ní bí béé.»

¹⁰Niinee ní Unimbɔti bɔnaatiliu Ananiya cúú kpancikil un Yeereemii nìn lée ki léetì ki gbáń ki wīī.

¹¹Míǹ boonee ní u bí samaa kɔkɔ yii ti-Dindaan nín sòon̄ puee sèé: «Abin ali deedeeyee, m làá cúú kpancikil un Babiloon bɔtiu Neebukadineesaar dūu léeǹ atimbun kɔkɔee kí léetí.>» Niinee ní Unimbɔti bɔnaatiliu Yeereemii búntì u-laŋki.

¹²Ananiya nín léetì Yeereemii neen kpancikil ki gbáń ki wīīyee boon ní ti-Dindaan sòon̄ nì Yeereemii yii:

¹³«Cùú tùkù Ananiya yii: <Ti-Dindaan nín sòon̄ puee sɔ̀. A gbáń ki wīī idɔ kpancikiliu. Too tikúti kpancikiliu ní a làá dūú téeǹ u-yil.>»

¹⁴Ti-Dindaan Mpɔŋkɔdaan, Isirayeel Nimbɔtiu nín sòon̄ puee sèé: «M làá dū tikúti kpancikiliu ní kí léeń atimbun nee kɔkɔ. Niinee bi làá nīn bí Babiloon bɔtiu Neebukadineesaar taapu kí nīn sá u-tɔntɔnliibi. M làá dū ipeel gba kí ŋá u-ŋaan.»

¹⁵Míǹ boonee ní Unimbɔti bɔnaatiliu Yeereemii bí Ananiya yii: «Ananiya, á pīlifì tiŋan! Ti-Dindaan kaa túnní-si ní a bí ki kíiĺ samaa nee bí fōō tinyimɔmbɔti kí kíí.

¹⁶An pu ní ti-Dindaan sòon̄ yii: <M làá jà-si kitiŋ nee pu. A làá kpú dun bindi, di sá yii a téé samaa bí já nì ti-Dindaan.>»

¹⁷Ní Ananiya lafun kpíì dibindi gbanti ŋmaluluútiu poon.