Read Ntcham Jérémie 29 Bible Online

Jérémie 29 - Ntcham bible

Jérémie 29

¹Unimbɔti bɔnaatiliu Yeereemii kāl̀ Jeerusaleem ki ŋmàn̄ kugbɔŋu ki tīī bitindaŋkpilib nì bisaraaŋaliibi nì Unimbɔti bɔnaatiliibi nì binib bin kɔkɔ Neebukadineesaar nìn cúú Jeerusaleem ki cūnnì kuyuŋu Babiloon tiŋkinee.

²Bíǹ di sá ubɔti Yeekooniya nì ubɔti na nì ubɔti kàliŋkpaambi nì Juuda nì Jeerusaleem kpilib nì bicaabi nì ŋŋal pu tɔntɔnliibi.

³Yeereemii nìn dū kugbɔŋuee ki ŋúbiǹ Safan jipɔɔn Eeleeyasa nì Ilikiya jipɔɔn Geemariya. Di sá yii Juuda bɔtiu Seedeesiyasi nìn tú-bi Babiloon bɔtiu Neebukadineesaar cee. Tin bi nìn ŋmàn̄ kugbɔŋu gbanti poonee sèé:

⁴«Ti-Dindaan Mpɔŋkɔdaan, Isirayeel Nimbɔtiu di bíi sòoǹ nì bin kɔkɔ u yāntì bi cúú Jeerusaleem ki cūnnì Babiloon tiŋkin kuyuŋuee.

⁵Māmaan adiin kí nīn kóò. Kpɔ̀maan akpaan kí lēē tijikaal kí jī.

⁶Ní cáá binimpoobi kí màal̀ mbininjabiyaamu nì nnimpubiyaamu. Ní cáá binimpoobi kí tīī ni-jipɔmbi, kí dū ni-bisalib kí pɔ̄ ticati bí màal̀ mbiyaamu. Ní màal̀ kí bùtī niin, ni-wíiŋŋu ń taa bàtī.

⁷Ní nyàab̀maan kitiŋ kin poon ti-Dindaan jìn̄-ni ki kɔ́ǹee nyɔkɔpu cùtam, di sá yii kitiŋ gbanti yaa bí ŋgbansɔŋfinee, ni mun làá nīn bí ŋgbansɔŋfin.

⁸«Ti-Dindaan Mpɔŋkɔdaan, Isirayeel yab Nimbɔtiu gíti bí yii: <Ní taa yàntī Unimbɔti bɔnaatiliibi bin bí ni-kansikinee ń kīil̀-ni, kí taa pīlifiǹ ni-bɔɔbi nì bin lèekī ni-damintiiti taapu ki tùkù-nee.

⁹Bi lì yii bi nàatī m-bɔti ní, ama an sá nnyimɔn ní. Maa tú-bi.> Ti-Dindaan di sòon̄ míǹ.

¹⁰«Ti-Dindaan nín sòon̄ puee sèé: <Babiloon beel yaa láa ŋá abin imuŋku ita nì saalaayee, m làá dāá sɔ̄ ni-saai. M nín nìn pōoǹ-ni dipoommɔntiil diŋyee, m làá dāá ŋá míǹ. M làá dāá fàtīí gíiǹní-ni Jeerusaleem doo.

¹¹Man ni-Dindaan nín sòon̄ puee sɔ̀. M nyí tin m bɔ́ntì kí ŋá kí tīī-nee. Maa bɔ́ntì nnaabu kí tīī-ni, ama an sá nnaam ní m bɔ́ntì kí tīī-ni. M bɔ́ntì ni-foolbooŋwu ń nīn ŋān̄ nì dimákal poon.

¹²Niinee, ni làá dāá dāan̄ kí yíiń-mi kí mèè-mi, ní ḿ dāá pīlifiǹ-ni.

¹³Ni làá dāá nyàab̄-mi ní kí dāá ká-mi, di sá yii ni làá dāá nyàab̀-mi nì ni-pɔbil kɔkɔ ní.

¹⁴M làá dāá yàntī ní ká-mi, ti-Dindaan di lī míǹ. M làá dāá gíiǹní bin bi cúú ki cūnnì kuyuŋuee ní kí dāá kóoǹ-ni kí kpāfì atimbun nì ipaan in kɔkɔ pu m jìn̄-ni ki kɔ́ǹee, ti-Dindaan di lī míǹ. M làá fàtīí gíiǹní-ni mpaan ŋun pu m nìn jìn̄-ni ki cūnnì kuyuŋu nee.>

¹⁵«Ti-Dindaan bíi sòoǹ nì ni míǹ, di sá yii ni lì yii: <Ti-Dindaan tīī-ti Unimbɔti bɔnaatiliibi Babiloon tiŋkin doo.>

¹⁶«Ti-Dindaan nín sòon̄ tin ubɔti un kā Daafiidi beejal pu puee sɔ̀. U nìn sòon̄ tibɔbaantiil gbanti bin kɔkɔ dáá gbíntìi kóò Jeerusaleem, ni-nabiyaamu mun baa cúú ki cūnnì kuyuŋu kii nimbee pu.

¹⁷Ti-Dindaan Mpɔŋkɔdaan nín sòon̄ puee sèé: <M làá cáań kujaau nì ŋkùm nì bìlbil kúm kí tɔ̄ bi-pu. M làá yàntī bí kpántí kii fiigi biliŋ ŋin sūū ki bíil̀ unil kaa ti ŋūǹ kí ŋmɔ́ee ní.

¹⁸M làá dāá dū kujaau nì ŋkùm nì bìlbil kúm ní kí jà-bi. Kitiŋ pu beeŋi nib yaa láa ká-bee, bi làá dāá kɔ́ dinyoondin ní. Ntimu mun kɔkɔ poon m làá dāá jà-bi kí kɔ́ǹee, bi yaa làá dāá tɔ̄ ubɔ mbusu àá kí sòoǹ kubɔbiiu kubɔ pu àá tibɔti tin cáá tifaandee pu àá kí kɔ́ǹ ubɔ icooyee, bíǹ ní bi làá dāá yòon̄ ŋabika.

¹⁹Kun pu tíǹ làá bàń-bee di sá yii baa pílifì m-bɔti, man bi-Dindaan di lī míǹ. Nì min kɔkɔ m tú m-tɔntɔnliibi m-bɔnaatiliibi kaa gbēeǹee, baa pílifiǹ-bi, man bi-Dindaan di sòon̄ míǹ.>

²⁰«Nimbi bin m jìn̄ Jeerusaleem ki tɔ́ Babiloon tiŋkin kuyuŋuee, ní pīlifì man ni-Dindaan nyɔɔbundi.

²¹«Ti-Dindaan Mpɔŋkɔdaan, Isirayeel Nimbɔtiu nín sòon̄ tin Koolaya jipɔɔn Akaab nì Maaseeyawuu jipɔɔn Seedeesiyasi pu puee sɔ̀. Bi-liitil lì yii bi nàatī ti-Dindaan bɔti ní, ama an kaa sá míǹ. Míǹ puee, m làá dū-bi kí ŋá Babiloon bɔtiu Neebukadineesaar ŋaan ú yàntī bí kpɔ̀-bi ni-nimbilaaliyin.

²²Juuda yab bin kɔkɔ bi cúú ki cūnnì Babiloon tiŋkin kuyuŋuee yaa làá dāá tɔ̄ ubɔ mbusuee, binib bili gbanti yiŋŋi ní bi làá nīn cáa tòó mbusu. Bi làá dāá nīn lì yii: <Ti-Dindaan ń ŋá-si kii u nín nìn ŋá Seedeesiyasi nì Akaab pu ki yāntì bi wùn̄-bi ŋŋmee!>

²³Tíǹ bāań-bi kun puee bi ŋá ntimbiil tuuŋŋi Isirayeel tiŋkin ki dōoǹ nì bi-jutiibi nimpoobi. Bi nìn lì yii bi nàatī m-bɔti ama ní an kaa sá míǹ, di sá yii maa nìn tīī-bi mara bí ŋá míǹ. M nyí tíǹ gbanti kɔkɔ ní ki sá useeradaan», man ni-Dindaan di lī míǹ.

²⁴Á sòoǹ nì Seemayawuu un sá Neelam tiŋkinee mun yii

²⁵ti-Dindaan Mpɔŋkɔdaan, Isirayeel Nimbɔtiu nín sòon̄ puee sɔ̀. A gāā a-bindi ki ŋmàn̄ kugbɔŋu ki tīī Jeerusaleem yab kɔkɔ nì usaraaŋakpil Seefaniya, Maaseeyawuu jipɔɔn nì bisaraaŋaliibi bin kɔkɔ kíǹee yii:

²⁶«Ti-Dindaan di lēē-si á nīn sá usaraaŋakpil kí fōō Yooyadaa yil. Á nīn kpèé kunimbɔtidii poon biwaatiibi bin yíì bi-ba Unimbɔti bɔnaatiliibee. Á bóob́-bi ikusaka ní kí bā-bi abaa.

²⁷Ba pu ní aa wòon̄ Yeereemii uanatootija un bí ni-kansikin ki nàatī-ni Unimbɔti bɔtee?

²⁸U ŋmàn̄-ti kugbɔŋu ki tīiń-ti Babiloon doo yii: Ni làá kàl̄ niin kí yúntí. An puee, māmaan adiin kí nīn kóò, kí kpɔ̀maan akpaan kí lēē tijikaal kí jī.»

²⁹Ama usaraaŋakpil Seefaniya kàan̄ kugbɔŋu gbanti ki tùkū Yeereemii.

³⁰Niinee ní ti-Dindaan sòon̄ nì Yeereemii yii:

³¹«Á tɔ̄ bí cùú tùkù bin kɔkɔ bi cúú ki cūnnì kuyuŋuee yii: <Ti-Dindaan nín sòon̄ Seemayawuu uneelamja puee sɔ̀. Seemayawuu nāatì-ni m-bɔti, ama maa túnní-u ni-cee. U dū tinyimɔmbɔti ní ki sɔ̄ŋkì ni-pɔbil.

³²Too man ni-Dindaan nín sòon̄ puee sɔ̀. M làá dáaĺ Seemayawuu uneelamja nì u-biyaamu nì u-naantiibi tafal. U-dicaŋkun yab ubɔ kpá kí ká tiŋan tin m làá ŋá m-nibulee. Di sá Seemayawuu lūkutì m-nibul yab bí já nì mi. Ti-Dindaan nín sòon̄ puee dee.>»