Read Ntcham Jérémie 31 Bible Online

Jérémie 31 - Ntcham bible

Jérémie 31

¹Ti-Dindaan bí yii: «Ŋyunti gbantee, man di làá dāá nīn sá Isirayeel dicaŋŋi kɔkɔ Nimbɔtiu, ní ŋí dāá nīn sá m-nibul.»

²Ti-Dindaan nín sòon̄ puee sèé: «Kuteeunee, m dàkā dinibul din ŋmátì ki nyáń ŋkúm ŋaanee m-laŋŋaŋfitiiku. M làá tīī Isirayeel diŋuŋfil dee.

³Dinibulee nìn lì yii: <Doooo ndandati ní ti-Dindaan lēē u-ba ki dàkā-mi.> Ní m kíí-u yii: <Dooooyee ní m néeń-si ní ki làá nīn pée néeń-si. An pu ní m dū m-ba ki nákáǹ-si kiŋkiŋ.

⁴Sii Isirayeel un m néeńee, m làá fàtīí yòon̄-si kí yóoń, ní bí fàtīí mā-si. A làá fàtīí yòon̄ a-gaŋgammu nnyaammuee kí cùú kūtì bin bí ki jīǹ jiŋaalee pu ní ŋɔ̄.

⁵A làá dāá fàtīí cóoń fiinyi sufii Samaarii jooŋŋi pu. Bin cóoǹ-iee di làá dāá kìtī abil.

⁶Di sá yii ŋwiin ŋubɔ bí ki dòoń biciitiliibi làá dāá tɔ́kɔń Eefiraayiim jooŋŋi pu kí téeń yii: Yīkìmaan tí jɔ̄m̀ Siiyɔn <jool, ti-Dindaan ti-Nimbɔtiu cee.>»

⁷Ti-Dindaan nín sòon̄ puee sɔ̀. Nín̄ tátímaan nì dipɔɔpindi kí tīī Isirayeel, nín̄ fàal̀maan ditimbundi din tɔ́kɔ́ atimbun kɔkɔ puee. Nín̄ gàmaan ilan mpɔn ki lì yii: «Ti-Dindaan, fīī a-nibul, fīī bin kíǹ Isirayeel tiŋkin ki bí dimaŋfalinee.»

⁸Di sá yii m làá nyāntiń-bi ŋgan pú timmun kí gíiǹní, ní kí kóoǹní-bi ntindandatimun kí kpāfì. Bi-kansikinee, bijɔfub nì bideembi, bipɔdambi nì bimatimpɔmbi làá nīn bí. An dāa sá dinikitikpaandi di làá fàtīí gítiń.

⁹Bi fàtīi gítiń ki sūǹ, ní m cēentí-bi ki ŋmēentí-bi. M làá dāá cáá-bi kí cùnnì ibun in pùub̀ee ni. M làá dāá dū-bi kí dī nsan ŋun tèen̄ baa làá gbéetée pu. Di sá yii m sá kii ubaatee ní ki tīī Isirayeel, ní Eefiraayiim sá m-jipɔŋkpiliu.

¹⁰Nimbi atimbun, pīlifìmaan ti-Dindaan nyɔɔbundi. Ní cáá-dì kí nàatī ntimu mun dátì nnyim māntìi tú-muee ni. Ní lì yii: «Ti-Dindaan nìn jìn̄ Isirayeel yab bi yàl̄ ki gbí an kɔkɔ. Kɔŋkɔnnee u kóoǹ-bi ki kpáfì, ki wúń bi-pu kii upikpaal nín wúǹ u-piii pu puee.»

¹¹Di sá yii ti-Dindaan fīī Isirayeel yab, u nyántì-bi unannanli un pɔ̄ɔǹ-bee ŋaan.

¹²Bi làá dāá bàń Siiyɔn gbantaŋki pu ki kūuntí dipɔɔpindi kuŋkuuntii. Bi fāā mɔ̀ɔɔ ki cá ti-Dindaan wammɔntiiti cee, an dàkà yii bilee nì ndapɔm nì ŋkpam nì ipii nì iŋoobu nì inaa. Bi làá dāá nīn bí kii bukpaa bun bi yāaǹ nnyim tiŋanee ní. Bi-pɔŋŋu pée gíti kpá kí bàtī.

¹³Niinee bisapɔmbi dāa ŋōō nì dipɔɔpindi ní binaacimpɔmbi nì bijaŋkpilib fàal̀ dicilpu. M làá dāá yàntī bi-nimbaaku ń kpántí-bi jiŋaal, m làá ŋméeǹ-bi bi-nimbinaamandi poon, ní kí yàntī bi-pɔbil ń sɔ̀ŋkì.

¹⁴M làá dāá tīī bisaraaŋaliibi tinan tin cáá ŋkpamee tikpil. M làá dāá gbéeǹ m-nibul tiwammɔntiil, ti-Dindaan di lī míǹ.

¹⁵Ti-Dindaan nín sòon̄ puee sèé: «Bi gbìl̀ Raama tiŋkin[34] dituweel nì nsiim pu. An sá Raaseel di bíi sūǹ u-biyaamu pu. Waa kíí ubɔ ń ŋméeǹ-u, di sá yii muaa ti bí.»

¹⁶Ti-Dindaan nín sòon̄ puee sɔ̀. Taa ti sɔ̄ kí yīkintì, pítí a-nyinnyim! Man ni-Dindaan di sòon̄ míǹ, m làá pà a-gìńdi paati. A-biyaamu làá nyānní binannanliibi tiŋkin kí gítiń.

¹⁷Ti-Dindaan bí yii: «Dimákal bí ki tīī a-naantiibi, a-biyaamu làá fàtīí gítiń bi-tiŋkin.»

¹⁸M gbìl̄ Eefiraayiim yab yáliŋkí ki lì yii: «Ti-Dindaan, a dáaĺ ti-tafal ŋkpitim pu kii bi nín tìŋkī dinajapɔmbil din bɔti pɔ̄ɔ̄yee puee. Ama á fàtīí gíiǹní-ti a-cee tí bàà fàtīí gítiń a-cee tiŋman pu. Di sá yii sii ti-Dindaan di sá ti-Nimbɔtiu.

¹⁹Ti nìn fātì ti-boon ki tīī-si, ama kɔŋkɔnnee, ti kpántì ti-ba. Ti béè ti-yìntitam, ní ki fátí ti-biŋŋi ki yáliŋkí. Ti fá ti-jilmau ní icoo cúú-ti gbòooo. Tiŋman ti ŋá tin kaa kítèe ti-naacimpɔntin, ní ki bíi fòol̄ an paati.

²⁰Eefiraayiim di sá m-bineeŋkaaki, m néeń-u ki jítiǹ bin kɔkɔ kíǹee. An pu ní ŋyunti ŋun kamaa m yaa bíi sòoǹ ki kù u-bɔtee, m gbíntìi dàkafī u-pu. M-pɔ̀ti kaa fù u-pu. Maa pée ŋūǹ kí gbèen̄ kí taa sɔ̄ u-saai.» Ti-Dindaan di sòon̄ míǹ[35].

²¹Cóoń kikpaanyɔkɔ taŋkpeeŋi kí nóó nì a-daanti, cóoń tidaandi nsan pu. Nín̄ nyí nì a-ba nì didandi din a dēe, nì nsan ŋun a cōom̀ee. Isirayeel un bí kii usapɔɔnee, fàtīí gítiń, fàtīí gítiń ntimu mun sá a-yaka nee poon! Fàtīí gítiń a-timmun.

²²Usapɔɔn un gáatèe, a làá nīn sáń ki lábití yéè kí tin sāā ŋyunti ŋulɔŋu ní? Di sá yii ti-Dindaan náań tiwampɔn tiba kitiŋ pu: Unimpu di làá nīn kíǹ ki mɔ̀nnì uninja.

²³Ti-Dindaan Mpɔŋkɔdaan Isirayeel Nimbɔtiu nín sòon̄ puee sèé: «M yaa láa fātìi gíiǹní bin bínní kuyuŋuee, bi làá dāá tí lì Juuda tiŋki nì ki-timmu pu yii: «<Ti-Dindaan ń bìin̄ a-boon, sii Siiyɔn gbantaŋki kin bí circiree, laakin difiil bée.>

²⁴«Niinee Juuda yab bin kóò tisatinee nì bin kóò ntimunee, bikpaabi nì biwaŋkpaaliibi kɔkɔ làá dāá nīn kóò kitiŋ nee pu dicilpu.

²⁵M làá dāá tīī bin gīīyee nnyim bí nyɔ̀ ní kí tīī bin kaa ti cáá mpɔnee kunyannyaau.

²⁶Míǹ boonee ní m fīntì ní ki ká yii ŋgeem min m gèen̄ee mɔ̄.

²⁷«Ti-Dindaan nín sòon̄ puee sɔ̀. Iwiin iba bí ki dòoń, m làá dāá yàntī binib nì tiwaŋkuti ń kpátí kí gbí Isirayeel nì Juuda beeŋin kii iwamboolee.

²⁸Kii m nín tāā ki bíikì bi-pu, ki fùkū, ki gāatì ki lúkú, ki kpéelikì, ki nāaǹ ní ki ŋá tikpitil puee, míǹ mbaantiim ní m làá ŋá kí tīī-bi bí fàtīí mā kí cóoń, man bi-Dindaan di lī míǹ.

²⁹Ŋyunti gbantee, ubɔ kaa dāa gíti lì yii: <Bibaatiibi ŋmɔ́ asubigaan, ama mbiyaamu nyiŋŋi di nyāŋfì[36].>

³⁰Un di yaa ŋmɔ́ asubigaanee, udaan nyiŋŋi di làá nyàŋfì. Un di yaa ŋá ikpitee, udaan di kúù.»

³¹«Ti-Dindaan di lī yii iwiin iba bí ki dòoń, m làá fàtīí pòon̄ Isirayeel nì Juuda yab dipoompɔndi[37].

³²Díǹ kaa dāa sá kii din m nìn pōoǹ bi-naanjab ŋwiin ŋun m nìn cúú bi-ŋal ki nyántì Eejipiti tiŋkin kuyuŋunee. Nì min kɔkɔ man di nìn sá bi-Dindaanee, bi nìn kpītì dipoondi gbanti, ti-Dindaan di lī míǹ.»

³³Ti-Dindaan bí yii: «Dipoompɔndi din m làá dāá líí Isirayeel yab ŋwiin gbantee sɔ̀. M làá dāá dū m-marab kí ŋmà kí ŋá bi-landɔkɔyin, kí ŋmà-bi kí ŋá bi-pɔbilin. Man làá dāá nīn sá bi-Nimbɔtiu ní bíǹ ń nīn sá m-nibul.

³⁴Ubɔ kaa dāa gíti dàkà u-juti àá u-nabiki ú nīn nyí ti-Dindaan. Di sá yii kí yòon̄ bi-kansikin mbiyaawaamu kí tin cáá sāā bikpaambee, báà ŋma làá dāá béé-mi, man ni-Dindaan di lī míǹ. Di sá yii m làá dāá dū bi-kpitii kí pɔ̄-bi ní kaa làá ti téetí bi-yìntitam pu[38].

³⁵Ŋma di dū ŋwìiń ki kāaǹ ŋú nīn ŋmíntí ŋwiimpu ní? Ŋma di tīī uŋmal nì iŋmalbijaa mara í nīn ŋmíntí kunyeeu ní? Ŋma di kùtī tiŋku ní ki yàntī u-nyiŋgbanti yíkí ki gà kuwoou ní? An sá ti-Dindaan Mpɔŋkɔdaan. U-yindi dee.»

³⁶Ti-Dindaan bí yii: «Daliŋkin ní m yaa kíí yii marab bin kpòotī duulinya nee kaa ti bée, mimmee m kíí yii Isirayeel yab kɔkɔ mun kaa ti kpáfì ki ŋá ditimbundi dee!»

³⁷Ti-Dindaan bí yii: «Unil yaa ŋūǹ kí ŋmàntī kutagbɔŋu kun dàn̄ee, ki yaa tí ŋūǹ kí béé kitiŋ nyóoŋŋuee, mimmee ma mun làá dū Isirayeel yab kɔkɔ kí fá, ikpiti in kɔkɔ bi ŋée pu, ti-Dindaan di lī míǹ.»

³⁸Ti-Dindaan bí yii: «Iwiin bí ki dòoń m làá fàtīí mā Jeerusaleem kí tīī m-ba, kí yòon̄ Ananeeyeel difɔkɔku Dikpindi punyɔkɔki.

³⁹Bi làá dāá dū ŋŋmiiŋmantikaa kí tɔ̄ kí ŋmàntī kitiŋ kpaanyɔkɔ kí nīn cá Gareeb gbantaŋki, ní kí yòon̄ niin kí pɔ́ĺ kí nīn cá Goowa tiŋki watil pú.

⁴⁰Bi làá dāá dū anikpil nì ŋfantam tantakal nì mpaan ŋun kɔkɔ dɔ̄ kí tin sāā Seedrɔn buŋŋuee nì Dikpindi punyɔkɔki kin sá Itaamu punyɔkɔki ŋwìiń nyalaŋki púee kí sú-mi. Ubɔ kaa dāa gíti fùkù tiba ki dāa nín bíiĺ tiba mpaan gbanti pu.»