Read Ntcham Jérémie 32 Bible Online

Jérémie 32 - Ntcham bible

Jérémie 32

¹Juuda bɔtiu Seedeesiyasi nín kāl̀ dibeel abin disaalaatiil poonee, Babiloon bɔtiu Neebukadineesaar úǹ nìn ŋá abin saalku nì ata dee dibeel pu. Ŋyunti gbanti ní ti-Dindaan sòon̄ nì Yeereemii.

²Ŋyunti gbantee Babiloon janjaliibi nìn māntìi tú Jeerusaleem tiŋki kí já nì kì. Bi nìn cúú Unimbɔti bɔnaatiliu Yeereemii ki pīiǹ kudii bijanjaliibi dumpu, Juuda bɔtiu beecindin.

³Juuda bɔtiu Seedeesiyasi di nìn yāntì bi pīiǹ-u niin. Di sá yii u nìn wòon̄ Yeereemii u nín nāatì ti-Dindaan bɔti yii: «M làá dū Jeerusaleem tiŋki kí ŋá Babiloon bɔtiu ŋaan ú fōō-kèe.

⁴Juuda bɔtiu Seedeesiyasi kaa làá ŋmátí kí nyā Babiloon yab ŋaan, di sá yii m lēē kí dū-u kí ŋá Babiloon bɔtiu ŋaan. U làá cùú yūĺ Neebukadineesaar nimbiin ní bí nīn sòoǹ ki kpèé tɔb.

⁵Bi làá cúú Seedeesiyasi kí cùnnì Babiloon tiŋkin, ní ú nīn bí niin kí tin sāā ŋyunti ŋun ní m làá dāá kpèè u-bɔtee, ti-Dindaan di lī míǹ. Ni yaa gbíntìi bíi jáà nì Babiloon yab, naa làá ŋmā-bi.»

⁶Yeereemii bí yii: «Ti-Dindaan nín sòon̄ nì mi puee sèé:

⁷<A-wee Anameeyeel, Saaluum jipɔɔn làá dāan̄ a-cee kí bí-si yii á dā u-kpaabu bun bí Anatootee. Di sá yii sii nì u di pēē. An puee, sii di cáá nsan kí dā bukpaa gbanti[39].>»

⁸Kii ti-Dindaan nín sòon̄ nì mi puee, m-wee Anameeyeel nìn lafun dɔ́miń m-cee bijanjaliibi mɔŋkiŋu ki bí-mi yii: «Dā m-kpaabu bun bí Anatooti, Beenjameen tiŋkinee. Di sá yii man nì sii di pēē. Míǹ puee, mara poonee, sii di cáá nsan kí dā-bu.» Niin ní m béè yii ti-Dindaan di sòon̄ nì mi.

⁹Niinee ní m dá m-wee Anameeyeel kpaabu bun bí Anatooti tiŋkinee, ki pàn̄-u bukpaayee daaku nín sá puee, animbil jitɔmbi saalku nì bili.

¹⁰Ní m ŋá kugbɔŋu kun dàkà yii u nyáfiǹ-mi u-kpaabuee mili pu. M-seeradambi nimbiinee, ní m kpáb́ kugbɔŋu kun pu m nyīī m-jaliikee, ní ki ŋmāntì animbil saniya pu.

¹¹Boonee ní m fōō kugbɔŋu kun dàkà yii m dá bukpaayee ki kpáb́ kii mara nín bí yii ḿ ŋá puee nì kun baa kpáb́ee.

¹²M nìn dū tigbɔnliitilee ki tīī Neeriya jipɔɔn Baruuki, Maaseeyawuu naantiiu[40]. M-wee Anameeyeel nì biseeradambi bin nìn nyīī ŋŋal kugbɔŋuee puee, nì Juuda yab bin kɔkɔ nìn bí bijanjaliibi mɔŋkiŋuee nìn bí.

¹³Ní m tùkū Baruuki tibɔti nee samaa kɔkɔ nimbiin yii:

¹⁴«Ti-Dindaan Mpɔŋkɔdaan, Isirayeel Nimbɔtiu nín lī puee sèé: <Yòon̄ tigbɔnliitil tin dàkà yii m dá bukpaayee, kun pu m nyīī ŋŋal ki kpáb́ee nì kun maa kpáb́ee. Á dū-tì kí ŋá diboolin kí kpāafì an nīn bí kí yúntí.>»

¹⁵«Ti-Dindaan Mpɔŋkɔdaan Isirayeel Nimbɔtiu nín lī puee sèé: <Ŋwiin bí ki dòoń, bi làá dāá fàtīí dā kitiŋ nee poon adiin nì akpaan nì fiinyi kpaaŋŋi.>»

¹⁶M nín dū tigbɔn gbanti ki tīī Neeriya jipɔɔn Baruuki ki dóòyee ní m mēē ti-Dindaan yii:

¹⁷«Too, ti-Dindaan, sii di dū a-pɔŋkpaaŋŋu nì a-kpabil ki náań kutagbɔŋu nì kitiŋ. Tiba kaa pɔ̄ɔ̄ a-cee.

¹⁸Sii di dàkà binib kulaŋŋaŋfitiiu kí tin sāā anaantitɔntɔkɔ kutuku pu. Ama bibaatiibi yaa yīntèe, bi-biyaamu tafal ní a dátí kí tɔ̀ ipɔntoon[41]. A sá Unimbɔtikpaan, ní ki cáá mpɔn. Sii yindi di sá ti-Dindaan Mpɔŋkɔdaan.

¹⁹A nín lēē kí ŋá puee sá ŋkpaami ní a cáá mpɔn kí ŋá míǹ. A kpèé ki wāĺ tin kɔkɔ nnibiyaamu bí ki ŋáańee. A pà báà ŋma paati ki nóó nì u-bimbim nì u-tuuŋŋi nín sá puee ní.

²⁰«Sii di nìn túń atuŋkpaan nì maamaacib Eejipiti tiŋkin. Áli nì díǹ, a dàkà un ní a sée Isirayeel nibul nì inifunaan kɔkɔ kansikin, kii an nín bí pu díǹ nee ní.

²¹A nìn túń atuŋkpaan nì maamaacib ki dàkā mpɔŋkpaan nì dikpabil ki nyántì a-nibul Isirayeel Eejipiti tiŋkin.

²²A nìn pūtì ki pōoǹ ti-naanjab yii a làá dū kitiŋ kin poon nnaabiim nì tisiil pùub̀ee kí tīī-bi ní a lafun ŋá míǹ.

²³Bi nìn lafun kɔ́ ki fōō kitiŋ gbanti ki kāl̀. Ama baa pílifiǹ-si, kaa nóó a-dàkatam, kaa tɔ́ a-marab. Niinee ní a yāntì inaabu in kɔkɔ bíi bàń-ti díǹ nee jéetì bi-pu.

²⁴«Kɔŋkɔnnee, Babiloon yab dɔ́miń ki gūū kitiŋee ki bíl̀ ataŋkpuku kí fōō-kì. Bi bíi jáà nì kì ní kì làá pée kɔ́ bi-ŋaan ní kujaau nì ŋkùm nì bìlbil kúm pu. Tin a nìn sòon̄ ki síiǹee bāań ní sii a-ba wāĺ míǹ.

²⁵Too, Jeerusaleem làá kɔ́ bi-ŋaan dee! Kin ba pu ní a tīī-mi mara yii ḿ dā bukpaa Anatooti kí pà biseeradambi nimbiin?»

²⁶Ní ti-Dindaan kíí Yeereemii yii:

²⁷«Man di sá tin kɔkɔ cáá kufoouee Nimbɔtiu. Tiba bí ki pɔ̄ɔ̄ ki jítiǹ-maaa?

²⁸An pu ní man ni-Dindaan bí yii m làá dū kitiŋ nee kí ŋá Babiloon bɔtiu Neebukadineesaar nì u-janjaliibi ŋaan. U làá fōō-kì[42].

²⁹Babiloon yab bin bíi jáà nì kitiŋ nee làá kɔ́ ki-ni, kí nàan̄-kì ní kí tūū-kì ŋŋmi. Adiin aba yilpu bi nín bɔ̀b̄ puee, binib tūutì talaalub ki tīī diwaal Baal ní ki fá awaa aba mun ndaam. Bi ŋá míǹ ki gbítì m-ŋuul. Too, Babiloon yab làá tūū adiin gbanti ŋŋmi.

³⁰«Di sá doooo kutaafaau ní Isirayeel yab nì Juuda yab bí ki ŋáań tin kaa ŋān̄ee m-nimbiin. Tiŋman, tin kɔkɔ Isirayeel yab ŋáańee gbítí m-ŋuul ní, ti-Dindaan di lī míǹ.

³¹Di sá yii doooo bi nín máń kitiŋ nee ki dāa sāā díǹ nee, ki-nib pée gbítí m-ŋuul ní ki yàntī m fòol̄ mbum. An pu ní maa ti là kí wāl̀-bi m-nimbiin.

³²Isirayeel yab nì Juuda yab ŋá ikpiti tikpil ki gbítì m-ŋuul, bíǹ nì bi-bɔtiibi nì bi-kpilib nì bi-saraaŋaliibi nì bi-bɔnaatiliibi nì bin kóò Jeerusaleem tiŋkin nì Juuda timmu mun kíǹee poonee.

³³An bàà sá bí fàtī bi-nimbiin kí túĺ-mee, bi fātì bi-boon ki tīī-mi. Nì min kamaa m yōoǹ ŋyunti ki dàkā-bee, baa pílifì kaa dū m-saŋkii ki túń ditundi.

³⁴Bi cáá bi-waaŋi ŋin sá ntimbiil tuuŋŋee ki kɔ́ǹ Kudii kun bi dūu sú-mee poon ki kɔ́ǹ-ku tijɔkɔndi.

³⁵Inɔɔm tantakalinee, bi ŋātì mpaan kí nīn tòotī diwaal Baal. Niin ní bi dū bi-jipɔmbi nì bi-bisalib ki tūū ŋŋmi ki tīī diwaal Mooleeki. Maa pée tīī-bi dalba dalba mara bí ŋá míǹ, kaa kpáàa dākafì míǹ ŋwindal. Bi nín ŋá ntimbiil tuuŋŋi gbantee, bi téé Juuda yab ki yāntì bi ŋá ikpiti.

³⁶«Ni sòoǹ Jeerusaleem tiŋki pu yii: <Kujaau nì ŋkùm nì bìlbil kúm di dū-kì ki ŋá Babiloon bɔtiu ŋaan.> Kɔŋkɔnnee, man ni-Dindaan Mpɔŋkɔdaan, Isirayeel Nimbɔtiu nín sòon̄ kitiŋ nee pu puee sɔ̀.

³⁷M nìn gíí bi-pu diŋuul ki fōō bi-pu mbum ŋkpitim pu. M nìn jìn̄-bi bi yàl̄ ki kɔ́ ntimu kɔkɔn. Nì míǹ kɔkɔee, m làá kóoǹ-bi kí kpāfì doo bí nīn bí ŋgbansɔŋfin.

³⁸Niinee bi làá fàtīí nīn sá man nibul, ní man ń nīn sá bi-Nimbɔtiu.

³⁹M làá dāá tīī-bi dipɔbibaantiil nì nlandɔkɔbaanti bí ŋmā kí nīn tɔ́-mi ki cá jaanjaan. Niinee bi làá nīn bí mmɔnni, bi nì bi-biyaamu.

⁴⁰M làá ŋá mpèé nì bi kí nīn cá jaanjaan. M làá nīn pée nóó-bi kí ŋá-bi tiŋan kí taa gbèen̄. Mimmee, bi làá nīn tɔ́-mi ní kaa ti làá fàtī bi-boon kí tīī-mi.

⁴¹Án làá dāá nīn mɔ̄ǹ-mi ḿ ŋá-bi tiŋan. M làá dāá kàan̄-bi kitiŋ nee poon katanjoolii nì m-pɔbil kɔkɔ nì m-naŋki kɔkɔ.»

⁴²Ti-Dindaan gíti sòon̄ yii: «Man di cáań nnaabukpaan nee ki tɔ́ Juuda nibul pu. Man ubaantee di làá tí cáań nnaam min m pōoǹ-bee kí tīī-bi.

⁴³Binib lì yii: <Bi dū kitiŋ nee ki ŋá Babiloon yab ŋaan. Kɔŋkɔnnee kì kpántì kuteeu ní binib nì tiwaŋkuti kaa ti bí ki-pu. Ama kitiŋ nee poonee, binib làá dāá fàtīí dā akpaan.

⁴⁴Tiŋman bi làá dāá fàtīí dā akpaan Beenjameen tiŋkin nì Jeerusaleem tiŋki kpaanceetii nì Juuda timmun nì ntimu mun bí ajoon puee nì mun bí Seefeelaayee nì mun bí Neegeebee. Binib làá dāá ŋmà tigbɔn tin dàkà yii bi nyáfì bi-kpaatantee ní kí dāá dū kijalii kí nyīī ti-pu ŋŋal ní kí kpáb́ biseeradambi nimbiin. Di sá yii m làá fàtīí gíiǹní bi-yab bin bi cúú ki cūnnì kuyuŋuee», ti-Dindaan di lī míǹ.