Read Ntcham Jérémie 33 Bible Online

Jérémie 33 - Ntcham bible

Jérémie 33

¹Yeereemii nìn gbíntìi dáá pīī kudii bijanjaliibi bin cí ubɔtee dumpu. Ti-Dindaan nìn gíti sòon̄ nì u yii:

²«Ti-Dindaan un di ŋá tin bí nee kɔkɔee, ti-Dindaan un di bɔ́ntì-tì ki yāntì tì bée nín sòon̄ puee sɔ̀. Úǹ ní bi yíì ti-Dindaan.

³Kúuǹ ki yíiń-mi, m làá kíí-si. M làá lēē tiwaŋkpaandi tin bí dibalin aa nyée kí dàkà-si.

⁴Ti-Dindaan Isirayeel Nimbɔtiu nín sòon̄ tin kitiŋ nee diiŋŋi nì Juuda bɔtiibi beeciŋŋi nì ataŋkpakpuku ŋin bi bíl̀ kitiŋ gundi boon nì kitàataajiki pu puee sɔ̀.

⁵Bi yaa bíi jáà nì Babiloon yabee, bi bíi gbēentí adiin anikpil ŋin m làá kpɔ̀ m-ŋuul nì m-bum poonee dee. Di sá yii Jeerusaleem yab túń atuŋkpiti tikpil, an pu ní m fātì m-boon ki tīī kitiŋ nee.

⁶«Ama nì míǹ kɔkɔ, m làá dāá cáaǹ-kì kí pɔ̄ɔkì. M làá cáaǹ-kì ní ki-nib ń ká dipɔɔsɔŋkil kí nīn bí ŋgbansɔŋfin.

⁷M làá fàtīí gíiǹní Juuda nì Isirayeel yab bin bi nìn cúú ki cūnnì kuyuŋuee, m làá fàtīí gíiǹ-bi mpaan ŋun pu bi nìn bí dooooyee.

⁸M làá dāá ŋá-bi circir kí nyāntí ikpiti in kɔkɔ bi ŋée. Bi nín jáń nì mi puee, m làá dūú pɔ̄-bi.

⁹An làá dāá nīn mɔ̄ǹ-mi ḿ yíiń Jeerusaleem yindi. Kitiŋ gbanti làá dāá tīī-mi jilma ní ḿ dāá nīn fàal̀ ki-pu kitiŋ pu nibuliŋ kɔkɔ nimbiin. Anibul gbanti kɔkɔ làá dāá béé tiŋan tin kɔkɔ m làá dāá ŋá-kèe. Bi yaa láa ká nnaam nì ŋgbansɔŋfi ŋun kɔkɔ m làá tīī-kèe, bi làá dāá nīn jìkì nì kufaaŋŋu ní kí kɔ́ dinyoondin.»

¹⁰Ti-Dindaan nín sòon̄ puee sèé: «Nimbi Juuda yab, ni lì yii: <Kitiŋ nee kpántì adigbun binib nì tiwaŋkuti kaa ti kóò ki-pu.> Tiŋman, Juuda timmu nì Jeerusaleem daŋŋi kíǹ ki dɔ̄ fám binib nì tiwaŋkuti kaa ti kóò ntimu gbantin. Too, kitiŋ nee poonee, bi làá fàtīí gbìl̄

¹¹jiŋaal wooku nì dipɔɔpindi laŋyi nì animpucaŋgbiil pu. Bi làá dāá fàtīí tí gbìl̄ bin cāabìń inyɔŋki saraabi kunimbɔtidiinee laŋyi pu ki lì yii: <Tí nyɔ̄ŋkìmaan ti-Dindaan Mpɔŋkɔdaan, di sá yii u ŋān̄ ní u-neendi bí ki cá jaanjaan.> Di sá yii m làá fàtīí ŋāŋkì kitiŋ nee ní kí fàtīí gítí kii kì nín nìn bí pu dooooyee, ti-Dindaan di lī míǹ.»

¹²Ti-Dindaan Mpɔŋkɔdaan nín gíti sòon̄ puee sèé: «Kitiŋ kin kpántì adigbun binib nì tiwaŋkuti kaa ti kóò ki-pu nì ki-timmu kɔkɔ poonee, bi làá dāá gíti ká kunaakpaapɔɔu laakin bipikpaaliibi làá yàntī bi-piii nì bi-ŋoobui ń nīn dɔ̀ ki ŋùŋfēe.

¹³Dijool pu timmun nì Seefeelaa nì Neegeeb nì Beenjameen timmu nì Jeerusaleem kpaanceetii nì Juuda timmunee, ipii nì iŋoobu làá dāá tí jītí un kàaǹ-iee nimbiin», ti-Dindaan di lī míǹ.

¹⁴«Ti-Dindaan nín sòon̄ puee sɔ̀. Iwiin iba bí ki dòoń, m nín pōoǹ Isirayeel nì Juuda yab nibul kí ŋá-bi tiŋan tiŋyee, m làá ŋá míǹ.

¹⁵Ŋyunti gbanti yaa láa sāāyee, m làá yàntī bí màal̀ Daafiidi naantiiu tiŋman pu yɔu. Úǹ di làá dāá yàntī binib ń ŋá tin dɔ̄ nsanee nì tin bí deedeeyee kitiŋ nee pu.

¹⁶Iwiin gbantinee Juuda beel làá dāá ká difiil ní Jeerusaleem beel ń dāá nīn bí dipɔɔsɔŋkilin. Bi làá nīn yíì Jeerusaleem yii: <Ti-Dindaan ti-baamɔŋŋu.>»

¹⁷Ti-Dindaan nín sòon̄ puee sèé: «Daafiidi maaliŋu poon kpá kí lóó un làá kàl̄ Isirayeel tiŋki pu dibeelee.

¹⁸Míǹ mbaantiim Leefii yab bin sá bisaraaŋaliibee kpá kí lóó binib bin làá nīn yú m-nimbiin ki ŋáań bisaraawɔkaabi, ki tùutī saraabi ki ŋáań baabadal saraabee.»

¹⁹Ti-Dindaan sòon̄ nì Yeereemii yii:

²⁰«Man ni-Dindaan nín sòon̄ puee sèé: <Ni ŋūǹ kí kpìtī mpèé ŋun di bí man nì ŋwiimpu nì kunyeeu kansikineeee? Ni ŋūǹ kí pìin̄ nsan ŋwiimpu ń taa páań kunyeeu boon, àá kunyeeu ń taa páań ŋwiimpu boonaaa?

²¹Míǹ mbaantiim ní mpèé ŋun bí man nì m-tɔntɔnliu Daafiidi kansikinee kaa làá kpìtī. An pu ní u-naantiibi kansikin ubɔ làá nīn pée sá ubɔti Jeerusaleem tiŋkin. Míǹ mbaantiim ní bisaraaŋaliibi làá nīn pée bí Leefii dicaŋkun ki tūǹ m-tundi. Ubɔ kaa làá pée ŋmā kí pìin̄ nsan míǹ ń taa ŋá.

²²Unil kaa ŋūǹ kí kàaǹ iŋmalbijaa in bí kutaa puee, kaa ŋūǹ kí kàaǹ tiŋku gbandi bul. Míǹ mbaantiim ní m làá bùtī Daafiidi maaliŋun yab nì Leefii maaliŋun bin sá m-tɔntɔnliibee.»

²³Ti-Dindaan sòon̄ nì Yeereemii yii:

²⁴«Aa gbìl̀ binib nín sòoǹ pueeee? Bi lì yii m dū Isirayeel nì Juuda, adican ali ŋin m lēēyee ki fá. Bi sòoǹ mimmee ní ki kpèé m-nibul fám. Bíǹ ceeyee, ŋaa ti kpáàa sá ditimbundi gba.

²⁵Tin man ni-Dindaan lēe sɔ̀. M ŋá mpèé nì ŋwiimpu nì kunyeeu. M síiǹ marab bin kpòotī kutagbɔŋu nì kitiŋee.

²⁶Mimmee m ŋūǹ kí dū Jaakɔb dicaŋkun yab nì m-tɔntɔnliu Daafiidi maaliŋun yab kí fáaa? M ŋūǹ kí yíí kí taa lēē bin làá nīn kpòotī Abraam nì Isaaki nì Jaakɔb nibuleeee? «Aayee, kpataaa! M làá sɔ̄ bi-saai ní kí fàtīí yàntī án bútí-bi.»