Read Ntcham Jérémie 34 Bible Online

Jérémie 34 - Ntcham bible

Jérémie 34

¹Babiloon bɔtiu Neebukadineesaar nìn bíi jáà nì Jeerusaleem tiŋki nì Juuda timmu mun kíǹee[43]. U-janjakitil kɔkɔ nì kitiŋ pu beeŋi janjaliibi kɔkɔ nì anibul ŋin kɔkɔ bí u-taapuee janjaliibi nìn kútì u-pu. Ŋyunti gbanti ní ti-Dindaan sòon̄ nì Yeereemii yii:

²«Man ni-Dindaan Isirayeel Nimbɔtiu nín sòon̄ puee sɔ̀. Cùú ká Juuda bɔtiu Seedeesiyasi kí tùkù-u yii man ni-Dindaan bí yii m làá dū kitiŋ nee kí ŋá Babiloon bɔtiu ŋaan ú wà-kì ŋŋmi.

³Sisee, aa làá ŋmátí kí nyā u-ŋaan. Bi làá cúú-si kí dū-si kí ŋá u-ŋaan. A làá cùú yūĺ u-nimbiin ní ní nīn sòoǹ ki kpèé tɔb. Míǹ boonee ní ú cáá-si kí cùnnì Babiloon tiŋkin.

⁴«Ama sii Juuda bɔtiu Seedeesiyasi, a yaa pílifì m-bɔtee, aa làá kpú kujaaun. Man a-Dindaan di sòon̄ nì si míǹ.

⁵A làá kpú ŋgbansɔŋfin ní. Bi làá ŋá a-kpool kii bi nín ŋá a-naanjab bin nìn sá bibɔtiibi ki wāatì ní sii nín kpántì ubɔtee puee ní. Bi làá dāá tūū talaalub kí tīī-si jilma ní kí gāā-si icaalan yii: <Áù, ti-baa ubɔti kpíì!> Man a-Dindaan di sòon̄ míǹ.»

⁶Unimbɔti bɔnaatiliu Yeereemii nìn dū an bɔtee ki nāatì Juuda bɔtiu Seedeesiyasi Jeerusaleem tiŋkin.

⁷Ŋyunti gbantee Babiloon bɔtiu nì u-janjakitil nìn bíi jáà nì Jeerusaleem nì u-timmu nì Juuda timmu mun bi nìn máń agun ki túee, múǹ di sá Lakiisi nì Aseeka timmu, ntimu muli gbanti di nìn pɔ̄ɔ̄.

⁸Tíǹ gbanti kɔkɔ boonee, ti-Dindaan gíti sòon̄ nì Yeereemii. Ubɔti Seedeesiyasi nìn ŋá mpèé nì Jeerusaleem yab kɔkɔ yii bí tīī iyumbu dibatɔl.

⁹An nìn sá yii un sá kamaa ń tīī u-yumbuu, uninja àá unimpu un sá eebru niliuee dibatɔl. Ubɔ kaa ti cáá nsan kí dū u-nabiki ujudanil kí kpántí uyumbu.

¹⁰Niinee ní biyidambi kɔkɔ nì samaa kɔkɔ ŋá mpèé yii bi làá tīī bi-yumbui bininjab nì binimpoobi dibatɔl, kí taa ti yàntī bí tɔ̄ ditundi kii iyumbuee.

¹¹Ama míǹ boonee ní bi kpántì nlandɔkɔ ki fātìi fōō iyumbu bininjab nì binimpoobi bin bi nìn tīī dibatɔlee, ki fātìi yāntì bi kpántì iyumbu.

¹²Niinee ní ti-Dindaan sòon̄ nì Yeereemii yii:

¹³«Man ni-Dindaan Isirayeel Nimbɔtiu nín sòon̄ puee sɔ̀. M nìn ŋá mpèé ŋubɔ nì ni-naanjab ŋyunti ŋun m nìn nyántìń-bi Eejipiti tiŋkin laakin bi nìn bí ki sá iyumbuee.

¹⁴M nìn tùkū-bi yii: <Abin aluli yaa sāāyee, báà ŋma ń gíiǹ u-nabiki eebru yɔu un cáań u-ba ki nyáfiǹ-uee kí líí ú tɔ̄ u-ba. U làá nīn sá u-yumbuu kí tɔ̄ u-tuuŋŋi abin aluu, dibinluluútiilee ú gíiǹ-u kí líí ú tɔ̄ u-ba[44]. Ama ni-naanjab kaa nìn pílifì tibɔti gbanti kaa nìn tí dūu túń nì ditundi.

¹⁵Ama nimbee, ni bàà kpántì mbimbim ki ŋá tin kítì m-ceeyee. Di sá yii báà ŋma bàà lī u-juti cee yii u tɔ́ u-ba. Áli gba ni ŋá mpèé nì man kudii kun bi dūu sú-mee poon.

¹⁶Ama míǹ boonee ní ni kpántì nlandɔkɔ ki kpēē-mi fám. Báà ŋma fātìi cūtìi gíiǹní u-yumbuu uninja àá unimpu un u tīī dibatɔlee. Ni ŋá-bi mpɔn bí fàtīí kpántí ni-yumbui.»

¹⁷Ní Yeereemii gíti kútì ki lī yii: «Too, ti-Dindaan nín sòon̄ puee sɔ̀. An bàà sá yii báà ŋma ń tīī u-yumbuu eebru niliu un sá u-nabiki nì u-jutee dibatɔl ní. Ama naa ŋá kii m nín bí yii ní ŋá puee. An pu ní man ni-Dindaan sòon̄ yii m làá cáań kujaau nì bìlbil kúm nì ŋkùm kí tɔ̄ ni-pu. Niinee kitiŋ pu beeŋi nib yaa láa ká mimmee, bi làá dāá kɔ́ dinyoondin.

¹⁸«Binib gbanti nyáń mpèé ŋun bi ŋée boon. Baa ŋá kii bi nín yúl̀ m-nimbiin ki pōoǹ puee. M làá ŋá-bi kii dinabil din bi gíí ki nābitì mili ki cōom̀ ki jítì ajan alee kansikinee ní.

¹⁹Juuda yidambi nì Jeerusaleem yab nì bikàliŋkpilib bigaakaabi nì bisaraaŋaliibi nì bitindaŋkpilib kɔkɔ, an dàkà yii bin kɔkɔ pée cōom̀ ki jítì dinabil din bi gíí ki nābitì milee kansikinee,

²⁰m làá dū-bi kí ŋá bi-nannanliibi nì bin nyàab̀ kí kpɔ̀-bee ŋaan. Bi-nikpiliŋ làá kpántí inoon nì ipeel jikaati.

²¹Míǹ mbaantiim ní m làá dū Juuda bɔtiu nì u-kàliŋkpilib kí ŋá bi-nannanliibi nì bin nyàab̀ kí kpɔ̀-bee ŋaan. M làá dū-bi kí ŋá Babiloon bɔtiu janjaliibi ŋaan. Bijanjaliibi gbanti dá láá búntì ki wāatì-ni.

²²Ama m làá tīī-bi mara bí gítiń kí jáǹ Jeerusaleem tiŋki. Bi làá fōō kitiŋ nee ní kí wà-kì ŋŋmi. M làá yàntī Juuda timmu ń kpántí kii kuteeuee ubɔ ń taa ti nín̄ kóò mu-ni.» Ti-Dindaan di lī míǹ.