Read Ntcham Jérémie 35 Bible Online

Jérémie 35 - Ntcham bible

Jérémie 35

¹Ŋyunti ŋun Joosiyaasi jipɔɔn Yooyakiim sá Juuda bɔtiuee ní ti-Dindaan sòon̄ nì Yeereemii yii:

²«Cùú ká Reekaab maaliŋun yab[45], kí sòoǹ nì bi, kí cáań-bi kunimbɔtidii dibiyaamu kiba poon. Niinee á tīī-bi ndaam bí nyɔ̀.»

³Niinee ní m cūtìi nyàab̄ Yaasaniya, Irimeeya jipɔɔn Abasiniya naantiu nì u-nabiyaamu kɔkɔ nì u-jipɔmbi, an dàkà yii Reekaab maaliŋun yab kɔkɔ.

⁴M nìn cáá-bi ki kɔ́ǹ kunimbɔtidiin, Igidaliya jipɔɔn Anan, Unimbɔti niliu dibikin. Kidibiki gbanti nìn bí ki kɔ́ĺ abɔtibil dibiki, Saluum jipɔɔn Maaseeyawuu un sá usaraaŋal ki kpèé kunimbɔtidii punyɔkɔkee yaka yilpu pú ní.

⁵M nìn dū aboon ŋin poon ndaam gbée nì tidayuti ki yóoǹ Reekaab maaliŋun yab nimbiin ní ki bí-bi yii: «Bàtīmaan ndaam kí nyɔ̀.»

⁶Ama ní bi kíí yii: «Taa nyù ndaam. Ti-naanja Yoonadaab, Reekaab jipɔɔn yóoǹ-ti mara yii: <Nimbi nì ni-naantiibi, ní taa pée nyɔ̀ ndaam dalba dalba.

⁷Ní taa mā adiin, kí taa kpɔ̀ tikpaal, kí taa cóoń fiinyi sufii, ní kí taa nín̄ cáá an wanti báà tiba. Ama ní nīn kóò tantibin ni-maŋfal wiiŋyi kɔkɔ poon, ní kí ŋmā kí kàl̄ kitiŋ kin ni kóò kii binicambi nee pu kí yúntí.>»

⁸«Ti ŋúb́ Reekaab jipɔɔn Yoonadaab, ti-naanja marau un u yóoǹ-tee tiŋan, an puee ti nì ti-nimpoobi nì ti-jipɔmbi nì ti-bisalib kaa nyù ndaam jaanjaan.

⁹Taa māā adiin ki kóò, kaa cáá fiinyi kpaaŋŋi, kaa tí cáá tisati ki kù.

¹⁰Ti kóò tantibin ní. Ti-naanja Yoonadaab nín tīī-ti mara puee, míǹ ní ti ŋúb́.

¹¹Ama ŋyunti ŋun Babiloon bɔtiu Neebukadineesaar bíi jáà nì kitiŋ neeyee ní ti dākafì yii: <An sɔ́ tí sāǹ kí kɔ́ Jeerusaleem tiŋkin Babiloon janjakitil nì Siirii janjakitil ń taa cúú-ti. Ŋyunti gbantee ní ti dɔ́miń ki kíǹ ki kóò kitiŋin doo.>»

¹²Niinee ní ti-Dindaan sòon̄ nì Yeereemii yii:

¹³«Man ni-Dindaan Mpɔŋkɔdaan, Isirayeel Nimbɔtiu nín sòon̄ puee sɔ̀. Cùú tùkù Juuda yab nì Jeerusaleem yab yii: <Naa bàà máaǹ kí fōō m-bɔkpaafikaati kí pīlifì tin m sòoǹeeee?> Ti-Dindaan di lī míǹ.

¹⁴Reekaab jipɔɔn Yoonadaab tīī u-naantiibi mara yii bí taa pée nyɔ̀ ndaam, ní baa lafun nyùn̄ ndaam ki dāa sāā díǹ, kun puee bi tɔ́ bi-naanja marau. Ama man sòon̄ nì ni ki gíti sòon̄ nì ni ní naa pílifiǹ-mi.

¹⁵M túnní m-tɔntɔnliibi bibɔnaatiliibi ni-cee ŋfunyɔm kupaau kaa gbēeǹ bí tùkù-ni yii: <Báà ŋma ń dū u-saŋkiŋkpitil kí fá, kí ŋá min kítèe. Taa nín̄ jòó ki pámaan awaa boon ki tòotī-ŋi. Niinee ni làá ŋmā kí kàl̄ kitiŋ kin m tīī ni nì ni-naanjabee poon.> Ama naa kpōoǹ ni-tafal ní kaa nín pílifì.

¹⁶Reekaab jipɔɔn Yoonadaab naantiibi ŋúb́ marab bin bi-naanja nìn yóoǹ-bee, ama ní man nibul kaa pílifiǹ man.

¹⁷«An puee ti-Dindaan, Unimbɔti Mpɔŋkɔdaan, Isirayeel Nimbɔtiu nín sòon̄ puee sèé: <M làá cáań inaabu in bɔti m nìn sòon̄ee kí tɔ̄ Juuda yab nì Jeerusaleem yab pu. Di sá yii m sòon̄ nì bi, ama ní baa pílifiǹ-mi. M yíiń-bi, ama ní baa kíí-mi.>»

¹⁸Míǹ boonee ní Yeereemii bí Reekaab maaliŋun yab yii: «Ti-Dindaan Mpɔŋkɔdaan, Isirayeel Nimbɔtiu nín sòon̄ puee sèé: <Ni tɔ́ ni-naanja Yoonadaab marau, ki ŋúb́ tin kɔkɔ u tīī-ni mara ní ŋée.

¹⁹An puee Reekaab jipɔɔn Yoonadaab maaliŋun yab pée kpá kí lóó unil un làá nīn yú m-nimbiin ki tūǹ m-tundee.> «Ti-Dindaan Mpɔŋkɔdaan, Isirayeel Nimbɔtiu nín sòon̄ puee dee.»