Read Ntcham Jérémie 37 Bible Online

Jérémie 37 - Ntcham bible

Jérémie 37

¹Babiloon bɔtiu Neebukadineesaar nìn dū Joosiyaasi jipɔɔn Seedeesiyasi ki kāaǹ Juuda beel pu ubɔti. Seedeesiyasi di nìn fōō Yooyakiim jipɔɔn Kooniya yil.

²Ama bi-kansikin báà ubɔ kaa nìn pílifì tibɔti tin ti-Dindaan nìn dī Yeereemii pu ki kpáafì-bee. Ubɔti u-baaa, u-kàliŋkpilibaaa, Juuda yabaaa, ubɔ kaa nìn fōotì ki yīkiǹ.

³Nì míǹ kɔkɔee, ubɔti Seedeesiyasi nìn tú Seeleemiya jipɔɔn Yukaal nì usaraaŋakpil Seefaniya, Maaseeyawuu jipɔɔn Yeereemii cee. Bi nìn bí-u yii: «Mèè ti-Dindaan ti-Nimbɔtiu ti-pu.»

⁴Ŋyunti gbantee baa nìn dáá cúú Yeereemii ki pīiǹ kudii, an puee u nìn tɔ́ u-ba kí cù samaa cee kí gítiń.

⁵Faaroo janjaliibi nìn nyáń Eejipiti tiŋkin. Babiloon yab bin nìn māntìi tú Jeerusaleem tiŋki kí já nì kèe nín gbìl̄ mimmee ní bi sútì ki wāatì-kì.

⁶Niinee ní ti-Dindaan sòon̄ nì u-bɔnaatiliu Yeereemii yii:

⁷«Ti-Dindaan, Isirayeel Nimbɔtiu nín sòon̄ puee sèé: <Ní cùú tùkù Juuda bɔtiu un túnní-ni ní dāan̄ kí bàlifèe yii: Faaroo janjaliibi bin nìn nyáń ki tútúǹ-nee fātìi nín gítí bi-tiŋkin Eejipiti.

⁸Babiloon yab làá fàtīí gítiń kí dāá já nì kitiŋ nee. Bi làá fōō-kì kí wà-kì ŋŋmi.

⁹Man ni-Dindaan nín sòon̄ puee sɔ̀. Ní taa mɔ̄ntì ni-ba kí lì yii Babiloon yab yíkì ti-cee ki búntì. Baa búntì.

¹⁰Tí lì yii ni ŋúń ki jáń ki pɔ́ɔkiǹ Babiloon yab janjaliibi bin bí ki jáà nì nee kɔkɔ ní an kíǹ bin fōō tiweendee. Bíǹ gbanti làá nyānní bi-tantibin kí tūū kitiŋ nee ŋŋmi.>»

¹¹Ubɔti Faaroo janjaliibi pu ní Babiloon janjaliibi sútì ki wāatì Jeerusaleem tiŋki.

¹²Yeereemii nìn là kí nyā Jeerusaleem tiŋkin kí cù Beenjameen tiŋkin kí fōō bi nín yākatì yākatì atinjan u-dicaŋkunee u-jandi.

¹³Ama u nín bàn̄ Beenjameen tiŋki punyɔkɔpuee ní u ká bijanjaliibi bin cīití kipunyɔkɔee kpiliu ubɔ. Bi nìn yíì-u Yiiriya, u sá Seeleemiya jipɔɔn nì Ananiya naantiiu. Úǹ nìn cúú Unimbɔti bɔnaatiliu Yeereemii ní ki bí-u yii: «A cáǹ a-ba kí tīī Babiloon yabaa!»

¹⁴Ní Yeereemii kíí-u yii: «Aayee, maa cáǹ m-ba kí tīī Babiloon yab.» Ama Yiiriya kaa nìn pīlifiǹ-u. U nìn cúú-u ki cáa cūnnì u-kpilib cee.

¹⁵Bíǹ nìn gíí Yeereemii pu diŋuul ŋkpitim pu ní ki gbáń-u ní ki dū-u ki pīiǹ kudii ugbaŋŋmal Joonatan diiku kun bi nìn dūu kpántì kusarkadiiyee poon.

¹⁶Bi nìn dū Yeereemii ki tɔ́ dinyimbɔbil din poon an bɔ̀ǹ kpìmmee. U nìn kāl̀ niin ki yúntì.

¹⁷Dalbee ní ubɔti Seedeesiyasi tú unil ú cùú cáań-u. U nìn là kí bàlifì-u tiba dibalin u-beecindin. Ubɔti nìn bālifì-u yii: «Mimmee ti-Dindaan sòon̄ nì si tiba m-pu á tùkù-maaa?» Ní Yeereemii kíí yii: «Iiin! Bi làá dū-si kí ŋá Babiloon bɔtiu ŋaan.»

¹⁸Ní Yeereemii gíti bí ubɔti Seedeesiyasi yii: «Ba ní m yīntiǹ sii nì a-kàliŋkpilib nì dinibul nee ní ni cúú-mi ki pīiǹ sarka ní?

¹⁹Ni-bɔnaatiliibi nìn tùkū-ni yii Babiloon bɔtiu kaa làá dāan̄ kí já ni nì ni-tiŋki kujaau. Bibɔnaatiliibi gbanti bí la díǹ?»

²⁰Ní Yeereemii kútì ki lī yii: «Kɔŋkɔnnee, ti-baa ubɔti, pīlifiǹ-mi. Yàntī m-gbaamii ń kɔ́-si fíŋfiŋ. Taa ti gíiǹ-mi a-gbaŋŋmaliu Yoonatan dumpu, yaa sá fám m làá kpú.»

²¹Niinee ní ubɔti Seedeesiyasi tīī mara yii bí dū Yeereemii kí pìin̄ bijanjaliibi bin cí ubɔtee dumpu kudii. Bí nīn tìì-u ŋwiin kamaa kikpɔnɔkatii. Bí nīn cāabìń kpɔnɔ gbanti kpɔnɔb bin bi kāntí bikpɔnɔpuliliibi daŋŋi puee kí tin sāā ŋyunti ŋun ní kpɔnɔ làá dóó kitiŋee nee. Míǹ ní Yeereemii nìn gbíntì bijanjaliibi bin cí ubɔtee dumpu.