Read Ntcham Jérémie 38 Bible Online

Jérémie 38 - Ntcham bible

Jérémie 38

¹Matan jipɔɔn Seefatiyawuu nì Geedaliyawuu jipɔɔn Paseewuur nì Seeleemiyawuu jipɔɔn Yukaal nì Maalkiya jipɔɔn Paseewuur nìn gbìl̄ tibɔti tin Yeereemii sòon̄ ki tùkū samaa kɔkɔ yii:

²«Ti-Dindaan nín sòon̄ puee sèé: <Un làá gbíntí kitiŋ nee poonee, kujaau nì ŋkùm nì bìlbil kúm di làá kpɔ̀-u. Ama un yaa nyáń kí cáá u-ba ki tīī Babiloon yabee làá ŋmátí. Tin an niliuee páatèe di sá u nín kaa kpíìyee.>»

³Ti-Dindaan nín sòon̄ puee sèé: «M làá dū kitiŋ nee kí ŋá Babiloon janjaliibi ŋaan ní bí fōō-kì.»

⁴Niinee ní bikàliŋkpilib bí ubɔti yii: «Bí kpɔ̀ kijapaai nee, di sá yii tin u sòon̄ee yɔ̀tī bijanjaliibi nì bin kíǹ ki bí kitiŋ nee poonee wunti. Waa nyàab̀ samaa ŋanti, ama u-naabuŋu ní u nyàab̀.»

⁵Ní ubɔti Seedeesiyasi kíí yii: «U bí ni-ŋaan, m sá ubɔti, ama maa cáá mpɔn kí pìin̄-ni nsan ni ŋá ni nín là puee.»

⁶Bikàliŋkpilibee nìn cúú Yeereemii ki cáá-u ki tɔ́ ubɔti jipɔɔn Maalkiya nyimbɔbilin. Bi nìn dū iŋmii ní ki cúú Yeereemii ki cáa sīntì dinyimbɔbilin. Dinyimbɔbil gbanti nìn bí bijanjaliibi bin cí ubɔtee dumpu ní, ama nnyim nìn kpá di-poon, asee tikpati. An puee bi nín nìn dū Yeereemii ki tɔ́ee, u nìn nín sìntī tikpatin ní.

⁷Too, ueetiiyoopiija ubɔ nìn bí bi yíì-u Eebeedi-Meeleeki. U nìn sá ukàliŋkpil ní ki nìn bí ubɔti cindin. U nìn gbìl̄ yii bi dū Yeereemii ki tɔ́ dinyimbɔbilin. Ubɔti mun nìn kā Beenjameen punyɔkɔki nyɔkɔpu.

⁸Niinee ní Eebeedi-Meeleeki nyáń dibeecindin ki cūtìi ká ubɔti ki bí-u yii:

⁹«Ti-baa ubɔti, binib nee nín ŋá Unimbɔti bɔnaatiliu Yeereemii puee kaa ŋān̄. Bi dū-u ki tɔ́ dinyimbɔbilin. U làá kpú ŋkùm dinyimbɔbil gbantin, di sá yii tijin kaa ti bí kitiŋin.»

¹⁰Niinee ní ubɔti tīī ueetiiyoopiija Eebeedi-Meeleeki mara yii: «Si nì bininjab mmuŋku nì saalaa ń cù kí nyāntiń Unimbɔti bɔnaatiliu Yeereemii dinyimbɔbilin ú taa kpú.»

¹¹Eebeedi-Meeleeki nìn yōoǹ bininjab mmuŋku nì saalaa. U nìn kɔ́ dibeecindin kudii kun bí kunimbikpaafidii taapuee. Niinee ní u yōoǹ ticaliŋkpun. U nìn dūu kúĺ iŋmii pu ki cáa lāaǹ Yeereemii dinyimbɔbilin.

¹²Ní ueetiiyoopiija Eebeedi-Meeleeki bí Yeereemii yii: «Á dū ticaliŋkpunee kí fìn̄ a-ŋmɔŋŋmɔnti ní kí dū iŋmii kí cúú.» Ní Yeereemii ŋá míǹ.

¹³Ní bi dáaĺ iŋmiiyee ki nyántìń-u dinyimbɔbilin. Míǹ boonee ní Yeereemii gbíntì bijanjaliibi bin cí ubɔtee cee.

¹⁴Ubɔti Seedeesiyasi nìn tú bi yíiń Unimbɔti bɔnaatiliu Yeereemii, ní u cáá-u ki cūnnì kunimbɔtidii punyɔkɔki kitataatii poon. U nìn bí-u yii: «M làá bàlifì-si tibɔti, á taa báĺ-mi báà tiba.»

¹⁵Ní Yeereemii kíí Seedeesiyasi yii: «M yaa tùkū-si ibaamɔn, a làá yàntī bí kpɔ̀-mi. M yaa tí tīī-si isaŋkaaa, aa làá dū-i kí tɔ̄ ditundi.»

¹⁶Niinee ní ubɔti Seedeesiyasi pūtì ki pōoǹ Yeereemii dibalin yii: «Nì ti-Dindaan un bí dimaŋfalin nee, m pūtì yii maa làá kpɔ̀-si, kaa làá tí dū-si kí tīī bin nyàab̀ kí kpɔ̀-see.»

¹⁷Ní Yeereemii bí Seedeesiyasi yii: «Ti-Dindaan Unimbɔti Mpɔŋkɔdaan, Isirayeel Nimbɔtiu nín sòon̄ puee sèé: <A yaa nyáń ki dū a-ba ki tīī Babiloon bɔtiu janjakpilibee, si nì a-dicaŋkun yab làá ŋmátí, ní baa làá wà Jeerusaleem tiŋki ŋŋmi.

¹⁸Ama a yaa kaa nyáń ki dū a-ba ki tīī Babiloon bɔtiu janjakpilibee, Jeerusaleem tiŋki làá kɔ́ Babiloon yab ŋaan. Bi làá sēē-kì ŋŋmi, ní siiyee, aa làá ŋmátí bi-ŋaan.>»

¹⁹Ubɔti Seedeesiyasi bí Yeereemii yii: «M fàŋkí Juuda yab bin kɔ́ Babiloon yab ŋaanee. Babiloon yab ŋūǹ kí dū-mi kí ŋá bi-ŋaan bíǹ ń sàaǹ-mi.»

²⁰Ama ní Yeereemii kíí-u yii: «Baa làá dū-si kí ŋá bi-ŋaan. Pīlifì tin ti-Dindaan dī m-pu ki sòon̄ nì see. A yaa ŋá míǹ, án làá nīn ŋān̄ ki tīī-si ní á ŋmátí.

²¹Ama a yaa yíì kaa cáá a-ba ki tīīyee, ti-Dindaan nín lēē tin làá bàń a-pu ki dàkā-mee sɔ̀.

²²Binimpoobi bin kɔkɔ kíǹ ki bí a-beecindinee, bi làá cúú-bi kí cùnnì kí tīī Babiloon bɔtiu janjakpilib. Bi làá dāá gāā-si nlan yii: «<A-bɔɔmɔmmɔntiibi baasii kíil̀-si ní! A cáá a-taaŋi ki múĺ tikpatin, ní bíǹ sáǹ ki fá-si!>

²³Bi làá dāá cúú a-nimpoobi nì a-jipɔmbi kí cùnnì kí tīī Babiloon yab. Sii a-ba kaa làá dāá ŋmátí kí nyā bi-ŋaan. Di sá yii Babiloon bɔtiu làá dāá cúú-si ní kí sēē a-tiŋki ŋŋmi.»

²⁴Ní ubɔti Seedeesiyasi bí Yeereemii yii: «Ubɔ yaa pée gbìl̄ tibɔti nee, see m kūū-si.

²⁵Bikàlinjakpilib yaa gbìl̄ yii m sòon̄ nì si, ní ki dɔ́miń a-cee kí bí-si yii: <Tùkù-ti tin a sòon̄ nì ubɔtee! Á taa báĺ-ti báà tiba, an yaa sá fám ti làá kpɔ̀-si. Ubɔti bí-si yii ba ní?>

²⁶Á kíí-bi yii: <M gbāam̀ ubɔti yii ú taa gíiǹ-mi Joonatan dumpu ḿ tin kpú niin.>»

²⁷Míǹ ní bikàliŋkpilib kɔkɔ lafun dɔ́miń Yeereemii cee ki bālifì-u tibɔti. Ama Yeereemii kíí-bi kii ubɔti nín tīī-u mara yii ú kíí puee ní. Niinee ní bi yāntì-u soooo kaa ŋá-u tiba, kun puee báà ubɔ kaa gbìl̄ tin u nì ubɔti sòon̄ee.

²⁸Niinee Yeereemii gbíntì bijanjaliibi bin cí ubɔtee dumpu ki tin sāā ŋyunti ŋun bi jáń ki fōō Jeerusaleem tiŋkee[46]. Bi nín jáń ki fōō Jeerusaleem tiŋkee, tin jítèe sèé: