Read Ntcham Jérémie 39 Bible Online

Jérémie 39 - Ntcham bible

Jérémie 39

¹Ubɔti Seedeesiyasi nín kpántì Juuda bɔtiu abin awa ŋmasaalaatiu poon ní Babiloon bɔtiu Neebukadineesaar nì u-janjaliibi kɔkɔ dɔ́miń ki māntìi tú Jeerusaleem tiŋki kí já nì kì.

²Abin ali boon uŋmananaati poon iwiin iwa dal ní Babiloon yab sāā ki cíl̀ digundi din bi máń ki tú Jeerusaleem tiŋkee.

³Niinee ní Babiloon bɔtiu janjakpilib kɔkɔ kɔ́ Jeerusaleem tiŋkin ní ki cūtìi kāl̀ Kansikin punyɔkɔki poon. Ujanjakpil Neergaal-Sareeseer nì ubɔti tɔntɔŋkpilib Samgaar-Neeboo nì Sarseekiim nì Babiloon bɔtiu janjakpilib bin kíǹee kɔkɔ nìn bí poon.

⁴Ŋyunti ŋun Juuda bɔtiu Seedeesiyasi nì u-janjaliibi ká-bee ní bi dū itaaci. Kunyeeu ní bi nìn sáǹ ki nyáń Jeerusaleem tiŋkin. Bi nìn dūu dī ubɔti kpaabun ki tin nyáń kipunyɔkɔ kin bí agun ali kansikinee ní ki fōō nsan ŋun cá Jɔɔdan tantakalinee.

⁵Ama Babiloon janjaliibi nìn kùl̄ ki bīiǹ bi-boon, ní ki tin cúú Seedeesiyasi Jeeriikoo tantakalin. Bi nìn cáá-u ki cūnnì Babiloon bɔtiu Neebukadineesaar cee, Riibila, Amati tiŋkin. Niin ní Neebukadineesaar sòon̄ Seedeesiyasi bɔti.

⁶Riibila niin ní Babiloon bɔtiu kūū Seedeesiyasi jipɔmbi bi-baa nimbilaaliyin ki kpáaǹ Juuda yab bɔtibiliŋ kɔkɔ.

⁷Míǹ boonee ní bi sāā ki cɔ́tì Seedeesiyasi nimbiliŋ, ní ki dū tasa kúti kusakai ki bóob́-u ki cáá-u ki cūnnì Babiloon tiŋkin.

⁸Ní Babiloon yab tūū dibeecindi nì binib diiŋŋi ŋŋmi. Bi nìn gbáń ki wīī Jeerusaleem gundi.

⁹Bijanjaliibi bin cí ubɔtee kpiliu Neebusaradan nìn cúú binib bin nìn kíǹ ki kā Jeerusaleem tiŋkinee ki cūnnì Babiloon tiŋkin kuyuŋu. U nìn cáá bin nìn dū bi-ba ki tīī Babiloon bɔtiuee nì ŋŋal pu tɔntɔnliibi bin kíǹee ki cūnnì.

¹⁰Ama u nìn yāntì bisoodambi nì bin kaa pée cáá tibee Juuda tiŋkin, ní ki nìn dū fiinyi kpaaŋŋi nì tisati ki yākatì-bi.

¹¹Ubɔti Neebukadineesaar nìn tīī bijanjaliibi bin cí ubɔtee kpiliu Neebusaradan mara Yeereemii pu yii:

¹²«Á cùú nyàab̀-u kí wúń u-pu ubɔ ń taa ŋá-u tikpitil tiba. U yaa bālifì-si tiŋyee, á ŋá míǹ kí tīī-u.»

¹³Niinee ní bijanjaliibi bin cí ubɔtee kpiliu Neebusaradan nì ubɔti tɔntɔnliibi kpiliu Neebusasban nì ujanjakpil Neergaal-Sareeseer nì Babiloon bɔtiu janjakpilib bin kíǹee kɔkɔ sòon̄ ki gbìlīǹ tɔb.

¹⁴Bi nìn tú binib bí cùú nyàabìń Yeereemii bijanjaliibi bin cí ubɔtee dumpu. Bi nìn dū-u ki ŋúbiǹ Ayiikaam jipɔɔn Geedaliyasi, Safan naantiiu. Geedaliyasi nìn pú-u nsan ú kpì u-dumpu. Míǹ ní Yeereemii nìn gbíntì samaa kansikin ki kóò.

¹⁵Ŋyunti ŋun Yeereemii nìn dáá pīī bijanjaliibi bin cí ubɔti dumpuee, ti-Dindaan nìn sòon̄ nì u yii:

¹⁶«Cùú tùkù ueetiiyoopiija Eebeedi-Meeleeki yii: <Ti-Dindaan Mpɔŋkɔdaan, Isirayeel Nimbɔtiu nín lī puee sèé: M nìn sòon̄ yii an kaa sá nnaam ní m làá cáań kí tɔ̄ Jeerusaleem yab pu ama nnaabu. Too, m nín nìn sòon̄ puee, m làá ŋá míǹ. An kaa làá sūŋkì, sii a-ba nimbil làá ká.

¹⁷Ama ŋwiin gbantee, m làá fīī-si, man ni-Dindaan di lī míǹ. Maa làá dū-si kí ŋá bin a fàŋkée ŋaan.

¹⁸Tiŋman, m làá fīī a-maŋfal. Aa làá kpú kujaaun. Kun a làá páatée dee, kun puee a dū a-mákal ki páaǹ m-pu. Ti-Dindaan di sòon̄ míǹ.>»