Read Ntcham Jérémie 4 Bible Online

Jérémie 4 - Ntcham bible

Jérémie 4

¹Ti-Dindaan bí yii: «Isirayeel yab, ni yaa làá fàtīí gítińee, man cee ní ní fàtīí gítiń. Ni yaa kākatì ni-timbiiliwaaŋi m-nimbiinee, naa làá ti nín̄ tú ki yìiǹ an kɔkɔ pu.

²Ni yaa pūtì man ni-Dindaan un bí dimaŋfalinee nì ibaamɔn nì dipɔbil diba nì deedee ki lī yii, <M pūtì ti-Dindaan un bí dimaŋfalinee,> anibul ŋin kíǹee làá mèè-mi yii ḿ bìin̄ ŋi-pu ní án làá nīn mɔ̄ǹ-bi man pu.»

³Ti-Dindaan nín tùkū Juuda yab nì Jeerusaleem yab tibɔti tiŋyee sèé: «Bēel̀maan kusapɔŋu, taa ti bɔ̄l̀maan ikuŋkumin[5].

⁴Ŋámaan ni-ba circir kí tīī man ni-Dindaan, kpántímaan ni-pɔbiliŋ, nimbi Juuda yab nì bin kóò Jeerusaleem tiŋkinee! An yaa sá fám ni-kpitii puee, m-ŋuul làá pōō kii ŋŋmee, kí wà tikɔkɔ ní ubɔ kaa làá ŋmā kí gbíntí-ŋu.»

⁵Ní bāakì tibɔti nee Juuda tiŋkin, ní yàntī tí gbìtī kí bà Jeerusaleem tiŋkin. Ní búń iyin kitiŋee poon, kúum̀maan mpɔn kí lì yii: «Kóom̀maan kí kpāfì ntimu mun bi máń digundi ki túee ni.

⁶Ní cóoń kudaaŋŋu ŋaabiki Siiyɔn watil pú! Ní sāǹ kí cùú báĺ! Ní taa yūĺ nsanni! M làá yàntī nnaabu ń nyānní ŋgan pú, án làá nīn sá asaluukpaan ní.

⁷Gbikinti nyánní u-bambaŋkun, un nàantí atimbunee dòoń. U nyáń u-balilaŋki kí nàan̄ ni-tiŋki. Ni-timmu làá kpántí adigbun ní ubɔ kaa làá ti nín̄ kóò mu-ni.

⁸An puee dūmaan kutukub kí pèen̄! Nín̄ sūm̀maan ki yáliŋkí. Di sá yii diŋuukpaandi din ti-Dindaan fōō ti-puee kaa sɔ̄ŋkì.»

⁹Ti-Dindaan bí yii: «Ŋyunti gbanti yaa láa bāańee, bibɔtiibi nì bikàliŋkpilib wunti làá dāá yɔ̀tī. Tifaandi làá dāá kɔ́ bisaraaŋaliibi, ní Unimbɔti bɔnaatiliibi pɔbiliŋ ń dāá bīil̀.

¹⁰Ní m lī yii: <Àaa, ti-Dindaan Unimbɔti, a nìn baasii kíil̀ dinibul nee nì Jeerusaleem yab, ŋyunti ŋun ní a nìn lī yii bi làá nīn bí ŋgbansɔŋfinee ní. Too njimu di kā ti-neeŋyinee.>»

¹¹Ŋyunti gbantee ti-Dindaan làá dāá lì Jeerusaleem yab yii: «Ŋgbantamu pu buŋku kun tùm̀ee làá nyānní kuteeun kí jītí m-nibul pu. Kubuŋu gbanti kaa dāa sá kun jītí bi càatī àá bi céefí tijimpinee.»

¹²An sá kubuŋu kun pɔ̄ɔ̄ tikpilee ní m yāntì ku nyánní niin pú. Kɔŋkɔnnee, ma mun di làá sòoǹ bi-bɔti.

¹³«Kpèè binannanliibi di dòońee. Bi tóotiń kii utaakpaan tagbaŋŋee, ní bi-taamui yáb̀ kii ukaabɔnee! Mbusu kɔ́-ti ní, ti kpíì ní!»

¹⁴«Jeerusaleem yab, ni yaa là kí ŋmátée, ní fíntí ni-pɔbiliŋ kí nyāntí ntoom kɔkɔ nì mi-bulifi. Ilandɔkɔkpiti làá nīn kā ni-ni ki tin cáá sāā ŋyunti ŋulɔŋu ní?

¹⁵Nneen ŋubɔ nyánní doooo Daani tiŋkin ki báakí, ŋu sòoǹ mbusu un làá nyānní Eefiraayiim jooŋŋi pu kí dāan̄ee.

¹⁶Ní kpāafìmaan atimbun nib, yàntīmaan Jeerusaleem yab ń gbìl̄. Binannanliibi tóobiń, bi nyánní kitiŋ kin dátèe ni. Bi fátí ijanjakuŋkuunti kí jáǹ Juuda yab.

¹⁷Ti-Dindaan bí yii: Bi māntìi tú Jeerusaleem kii biciitiliibi nín màntīí tū kusaau puee ní. Di sá yii bi yíkìi bíi jáà nì mi.

¹⁸Jeerusaleem, a-bimbim pu ní tin bí nee kɔkɔ bāań-si. Tiŋman, a-naabuŋuee lafun pɔ̄ɔ̄. Ŋu kɔ́-si fíŋfiŋ.»

¹⁹M-poonaaa! m-poon! Iwàlfi deeee! M-pɔbil máfí! M-poon kaam cɔ́tì, maa ŋūǹ kí nīn ŋmí. Di sá yii m gbìl̄ bijanjaliibi kantándi nì bi-janjakuŋkuuntii pu.

²⁰Bi gbáà ibiil ki sòoǹ yii asaluu ubɔ dī un kíǹee, bi nāaǹ kitiŋee kɔkɔ. Bi nāaǹ ti-tantib dibɔbil pu niin, ti-kɔŋkooŋyi kpītì dicilpu niin.

²¹Kí tin sāā ŋyunti ŋulɔŋu ní m làá nīn wāĺ kujaau daaŋku ní? Kí cáá sāā ŋyunti ŋulɔŋu ní m làá nīn gbìl̀ kujaau kantáŋŋi pu ní.

²²Ti-Dindaan bí yii: «M-nibul yab sá bigbaambi ní, baa nyí-mi. Bi sá mbiyaamu mun kaa cáá nlandɔkɔee ní, baa nyí tiba. Bi yáb̀ ikpiti pu, ama kaa yáb̀ tiŋan pu.»

²³M kpēē kitiŋ, kì dɔ̄ fám tiba kpá ki-pu. M kpēē kutagbɔŋu, ŋwalifi wáŋkì ku-pu.

²⁴M kpēē ajoon, ŋì bí ki cìŋkī ní ŋgbantamu jìkì màkà maka.

²⁵M kpēēyee, maa ti ká báà uniseen, ní inoon kɔkɔ sáǹ.

²⁶M kpēēyee ki ká yii kitiŋ kin nìn sɔ̀m̀ fílfilee kpántì kuteeu. Bi nāaǹ ki-timmu kɔkɔ. Ti-Dindaan nì u-ŋuukpaandi pu dee.

²⁷Ti-Dindaan nín sòon̄ puee sèé: «Kitiŋ kɔkɔ làá kpántí kuteeu,, ama maa làá nàan̄-kì nyíki nyiki.

²⁸An pu ní kitiŋ làá kɔ́ kunimbaaun, ní yilpu ń kpántí dibɔmbɔndi. Di sá yii m lī tin m lēē ki síiǹee, maa làá kpántí m-landɔkɔŋu, kaa làá gítí m-boon mun.»

²⁹Bi nín gbìl̄ bitanjakaliibi nì bipintɔliibi bintindi puee, ní ntimu kɔkɔ nib sáǹ ki kátì. Bi sáń ki kóò nsugboomun, ki dàb̀ ataŋkpee. Ntimu kɔkɔ kíǹ ki dɔ̄ fám, ní báà ubɔ kaa ti kóò mu-ni.

³⁰Ama sii Jeerusaleem, a làá nín ŋá mana dee? A pèentí abɔkutinyaan ki cáá sindaariya wannyɔkɔntikaati ki nyɔ̀kɔntī a-ba, ki bɔ̀ntī culoo. A nyāantí a-ba fám ní, a-bɔmbi bí ki bèel̄-si ki nyàab̀ kí kpɔ̀-si.

³¹M gbìl̄ ibiil iba pu kii unimpu di kā imatiŋween puee, a lì kii unimpusapɔɔn di làá màal̀ u-biseebikee. An sá Siiyɔn tiŋki biilii, kì bí ki yáliŋkí ki lábití iŋal ki lì yii: «M-falaau na! Binikpɔliibi làá gbá kí kpɔ̀-mi dee!»