Read Ntcham Jérémie 41 Bible Online

Jérémie 41 - Ntcham bible

Jérémie 41

¹Ama dibindi poon ŋmaluluútiuee ní Neetaniya jipɔɔn Isimaayeel, Eeliisama naantiiu dɔ́miń Miisipa Geedaliyasi cee. Isimaayeel nìn sá ubɔti dicaŋkun niliu ní ki nìn sá ubɔti kàliŋkpilib ubɔ. U nì bininjab saalaa di nìn táá ki dɔ́miń. Ŋyunti ŋun bi kā u-cee ki jīǹee,

²ní Neetaniya jipɔɔn Isimaayeel nì bininjab saalaa bin nóoń-uee yíkì dicilpu, ní ki dū bi-tàataajimmu ki gāatì ki kūū Ayiikaam jipɔɔn Geedaliyasi, Safan naantiiu. Unil un Babiloon bɔtiu nìn kāaǹ Juuda tiŋki pu gɔminee, bi nín kūū-u puee dee.

³Míǹ boonee ní Isimaayeel kūū Juuda yab bin kɔkɔ nìn bí Geedaliyasi cee Miisipa tiŋkinee. U nìn kūū ki kpáaǹ Babiloon janjaliibi bin nìn bí niinee.

⁴Bi kūū Geedaliyasi iwiin ili jítì báà ubɔ kaa gbìl̄ u-kúm pu.

⁵Bininjab imuŋku inaa nìn nyánní Siikeem nì Siiloo nì Samaarii timmun ki bāań. Bi nìn kōol̀ bi-nyimpuliŋ, ki pēē ikpalcati ki cáfì cáfì bi-wunti. Bi nìn tú tijimpin saraabi nì bitalaalutuukaabi kí cùú ŋá ti-Dindaan saraabi kunimbɔtidiin.

⁶Neetaniya jipɔɔn Isimaayeel nìn nyáń Miisipa tiŋkin ki túŋkì-bi nsanni ki sūǹ. U bàn̄ bi-ceeyee, ní ki bí-bi yii: «Dāam̄maan Ayiikaam jipɔɔn Geedaliyasi cee.»

⁷Ama ŋyunti ŋun bi kɔ́ kitiŋinee ní Isimaayeel nì u-yab kūū-bi ní ki dū-bi ki tɔ́ dinyimbɔbil diban.

⁸Bi-kansikinee binib saalaa nìn bí Isimaayeel yii: «Taa kpɔ̀-ti, di sá yii ti cáá bilee nì ɔɔji nì ŋkpam nì tisiil ki bál̀ tisatin.» Niinee ní Isimaayeel yāntì-bi kaa kūū-bi kii u nín kūū bi-jutiibi puee.

⁹Dinyimbɔbil din poon Isimaayeel nìn dū binib bin u kūūyee nìn sá dinyimbɔbil din ubɔti Asaa nìn yāntì bi gbìn̄ ŋyunti ŋun u nì Isirayeel bɔtiu Basaa nìn bí kujaaunee ní. Dinyimbɔbilee nìn sá dikpaandi. Dinyimbɔbil gbantin ní Neetaniya jipɔɔn nìn dū binib bin u kūūyee ki gbéeǹ.

¹⁰Míǹ boonee ní Isimaayeel cúú bin kɔkɔ nìn bí Miisipa tiŋkinee nì ubɔti sapɔmbi ki pīiǹ kudii. U nìn cúú bin kɔkɔ bijanjaliibi bin cí ubɔtee kpiliu Neebusaradan nìn dūu ŋúbiǹ Geedaliyasee. Míǹ boonee ní u kpáaǹ bisarkadambee ki búntì Amɔn yab cee.

¹¹Kareeya jipɔɔn Yoowanan nì ajanjakiti kpilib bin nìn bí u-ceeyee gbìl̄ nnikpaakoon ŋun Neetaya jipɔɔn Isimaayeel ŋée.

¹²Niinee ní bi kóoǹ bijanjaliibi kɔkɔ ki kpáfì kí cùú jáǹ-u. Bi nìn jìn̄ ki tin cúú-u Gabawɔn puuku caŋin.

¹³Binib bin Isimaayeel nìn cúúyee nín ká Yoowanan nì bijanjakpilib bin nìn nóó-uee, ní an mɔ́ɔkiǹ-bi.

¹⁴Niinee ní bin kɔkɔ Isimaayeel nìn cúú Miisipa tiŋkinee fātì ki nín cá Kareeya jipɔɔn Yoowanan cee.

¹⁵Ama Neetaniya jipɔɔn Isimaayeel nín ká Yoowanan tóobiń-bee ní u sáǹ ki nín cá Amɔn yab cee.

¹⁶Isimaayeel nín kūū Geedaliyasee, u nìn cúú binib biba Miisipa tiŋkin. Bi-kansikin bin nìn dáá bí dimaŋfalinee, Kareeya jipɔɔn Yoowanan nì bijanjakpilib bin nìn céeǹ-uee nìn kóoǹ-bi ki kpáfì. Bíǹ di sá bininjab - an dàkà yii bijanjaliibi -, nì binimpoobi nì mbiyaamu nì bifaabi, an dàkà yii bin kɔkɔ Yoowanan nì bijanjakpilib nìn yōoǹní Gabawɔn tiŋkin ki gíiǹnée.

¹⁷Bi nìn yíkìi kāl̀ nsan pu ki nín cá, ki bàn̄ ki yúl̀ anicandiin ŋin bí Kimeeyam, Beetileem tiŋki caŋinee. Bi nìn là kí nìkī kí nīn cá Eejipiti tiŋkin.

¹⁸Di sá yii Isimaayeel nín kūū Geedaliyasi un Babiloon bɔtiu nìn kāaǹ gɔmina ú nīn kpèé Juuda tiŋkee, bi nìn kíǹ ki fàŋkí Babiloon yab ní.