Read Ntcham Jérémie 42 Bible Online

Jérémie 42 - Ntcham bible

Jérémie 42

¹Niinee bijanjakpilib kɔkɔ, cilinjee Kareeya jipɔɔn Yoowanan nì Oosaya jipɔɔn Asariya nì samaa kɔkɔ, bikpaambi nì ŋwaamu kɔkɔ cūtìi ká

²Unimbɔti bɔnaatiliu Yeereemii. Bi nìn bí-u yii: «Ti gbàam̄-si, fōō tin ti là kí mèè-si nee: Gbàam̀ ti-Dindaan a-Nimbɔtiu timbi bin ŋmátì ki kíǹ nee pu. Di sá yii taa ti náaǹ kii sii a-ba nín wāĺ pu nee.

³Míǹ puee bàlifì ti-Dindaan a-Nimbɔtiu ú dàkà-ti nsan ŋun sá tí dēe, nì kun ti máaǹ kí ŋée.»

⁴Ní Unimbɔti bɔnaatiliu Yeereemii kíí-bi yii: «M gbìl̄, m làá mèè ti-Dindaan ni-Nimbɔtiu kii ni nín bālifì-mi puee. Míǹ boonee, m làá tùkù-ni ti-Dindaan nín kíí puee, maa làá báĺ-ni báà tiba.»

⁵Ní bi kíí Yeereemii yii: «Ti pōoǹ kí ŋá tin ti-Dindaan làá tùkù-si á dūú nàatī-tee deedeedee. Ti-Dindaan ń nīn sá ibaamɔn seeradaaŋwu ki tīī-ti.

⁶Timbi di tú-si á bàlifì ti-Dindaan ti-Nimbɔtiu. Tin u yaa lēe yaa ŋān̄aaa, an yaa kaa ŋān̄aaa, ti làá ŋá míǹ. Niinee, án làá nīn ŋān̄ ki tīī-ti, di sá yii ti làá pīlifì ti-Dindaan ti-Nimbɔtiu nyɔkɔ.»

⁷Iwiin saalaa boonee, ní ti-Dindaan sòon̄ nì Yeereemii.

⁸Niinee ní u yíiń Kareeya jipɔɔn Yoowanan nì bijanjakpilib bin nìn bí u-ceeyee, nì samaa kɔkɔ, bikpaambi nì ŋwaamu.

⁹U nìn bí-bi yii: «Ni lēē-mi yii ḿ mèè ti-Dindaan, Isirayeel Nimbɔtiu ni-pu. U nín lī puee sèé:

¹⁰«<Ni yaa kíí kí nīn kā kitiŋ nee poonee, maa ti làá nàan̄-kì, ama m làá mā m-nibul. M làá cóoń-ni kii bi nín cōontí busubu puee, maa ti làá cóotí-ni dalba dalba. M làá ŋāŋkì tikpitil tin kɔkɔ m ŋá-nee.

¹¹Kɔŋkɔnnee, ní taa ti fàŋkì Babiloon bɔtiu un ni fàŋkí yɔ́kɔ́ yɔkɔ nee. Man ni-Dindaan di bí-ni yii ní taa ti fàŋkì-u. Di sá yii m bí ni-cee, kí fīī-ni kí nyāntí u-ŋaan kí líí.

¹²M làá yàntī ní ká diyimɔɔl u-cee, ní ú sɔ̄ ni-saai, kí yàntī ní gítiń ni-tiŋki pu.>»

¹³Ama ni yaa bí yii: «Taa làá kàl̄ kitiŋ nee poon! ní ki yíì kaa pílifì ti-Dindaan ni-Nimbɔtiu nyɔkɔ»,

¹⁴ní ki yaa lī yii: «Aayee! Ti làá cù Eejipiti tiŋkin ní. Niinee, taa làá ti ká kujaau, kaa làá ti gbìl̄ iyin in bi búǹ kí cù kujaauee pu, ní ŋkùm kaa làá ti nyā ti-pu. Niin ní ti là kí tin nín̄ bí.»

¹⁵Míǹ puee nimbi Juuda yab bin kíǹee, ní pīlifì ti-Dindaan nín sòon̄ puee. Ti-Dindaan Mpɔŋkɔdaan, Isirayeel yab Nimbɔtiu nín sòon̄ puee sɔ̀. Ni yaa gbíntìi cɔ́ yii ni làá cù Eejipiti, ni yaa lafun sáǹ ki cūtìi kɔ́ niinee,

¹⁶kujaau kun ni fàŋkée làá bàń-ni Eejipiti tiŋkin niin, ní ŋkùm min bɔti páb́-ni nee ń páań ni-boon niin, ní ní kpúń niin.

¹⁷Bin kɔkɔ làá lēē kí cùú nīn kóò Eejipiti tiŋkinee, kujaau nì ŋkùm nì bìlbil kúm di làá kpɔ̀-bi. Báà ubɔ kaa làá dāá ŋmátí kí nyā nnaabu ŋun m làá dāá dūú tɔ̄ bi-puee ni.

¹⁸Ní Yeereemii gíti bí yii: «Ti-Dindaan Mpɔŋkɔdaan, Isirayeel Nimbɔtiu nín sòon̄ puee sèé: <M kpáatì m-ŋuul nì mbum ki pɔ̀l̄ Jeerusaleem yab pu. Míǹ mbaantiim ní m làá dāá kpáatí m-ŋuul nì mbum kí pɔ̀l̄ nimbi bin làá cùú kɔ́ Eejipiti tiŋkinee pu. Niinee bi yaa làá dāá tɔ̄ ubɔ mbusu àá kí sòoǹ kubɔbiiu kubɔ pu àá tibɔti tin cáá tifaandee pu àá kí kɔ́ǹ ubɔ icooyee, bíǹ ní bi làá dāá yòon̄ ŋabika. Ni pée gíti kpá kí ká kitiŋ nee.>»

¹⁹Ní Yeereemii kútì ki lī yii: «Nimbi Juuda nibul din kíǹee, m bíi kpáafí-ni díǹ. Ti-Dindaan di bíi tìì-ni mara yii ní taa cù Eejipiti, ní béé míǹ.

²⁰Ni tīī-mi ditundi yii ḿ bàlifì ti-Dindaan ni-Nimbɔtiu dibalifil. Ni bí-mi yii: <Mèè ti-Dindaan ti-Nimbɔtiu kí tīī-ti. Tùkù-ti tin kɔkɔ u làá tùkù-see, ti làá ŋá míǹ.> Ŋwiin gbantee, an nìn sá nì bugbambu ní ni sòon̄ míǹ.

²¹Di sá yii díǹ nee, m bíi tùkù-ni tin ti-Dindaan ni-Nimbɔtiu kíí-nee. Ama naa bíi pílifí tin ti-Dindaan dī m-pu ki sòon̄ee.

²²Too, ní béé tiŋan yii kujaau nì ŋkùm nì bìlbil kúm di làá kpɔ̀-ni kitiŋ kin poon ni là kí sāǹ kí tin kɔ́ nee!»