Read Ntcham Jérémie 43 Bible Online

Jérémie 43 - Ntcham bible

Jérémie 43

¹Yeereemii nìn dū tibɔti nee kɔkɔ ki nāatì binib bin kɔkɔ nìn bí niinee. An nìn sá tibɔti tin ti-Dindaan bi-Nimbɔtiu nìn dī u-pu ki sòon̄ee ní.

²Niinee ní Oosaya jipɔɔn Asariya nì Kareeya jipɔɔn Yoowanan nì bilambidambi gbanti kɔkɔ bí Yeereemii yii: «A mɔ́ntí ní! Ti-Dindaan ti-Nimbɔtiu kaa pée tùkū-si á nàatī-ti yii: <Ní taa cù Eejipiti tiŋkin kí kàl̄.>

³An sá Neeriya jipɔɔn Baruuki di bíi sàal̄-si á sòoǹ ti-pu míǹ. Di sá yii u là kí dū-ti kí ŋá Babiloon yab ŋaan bíǹ ń kpɔ̀-ti, àá kí cúú-ti kí cùnnì Babiloon tiŋkin kuyuŋu ní.»

⁴An puee Kareeya jipɔɔn Yoowanan nì bijanjakpilib nì samaa un nìn dī-bee nìn yíì kaa pílifì ti-Dindaan kí kàl̄ Juuda tiŋkin.

⁵Niinee Kareeya jipɔɔn Yoowanan nì bijanjakpilib yōoǹ Juuda yab bin kɔkɔ kíǹee. Bíǹ di nìn sá bin nìn yàl̄ ki bíń ntimu kɔkɔn ki fātìi gítìń Juuda tiŋkinee.

⁶Bininjab nì binimpoobi nì mbiyaamu nì ubɔti bisalib nì binib bin kɔkɔ bijanjaliibi bin cí ubɔtee kpiliu Neebusaradan nìn dūu kāaǹ Juuda tiŋkin Ayiikaam jipɔɔn Geedaliyasi, Safan naantiiu ń nīn kpèéyee. Bi nìn kpáaǹ Unimbɔti bɔnaatiliu Yeereemii nì Neeriya jipɔɔn Baruuki.

⁷Bi nìn yíì kaa tɔ́ ti-Dindaan nín lī puee. Bi nìn yíkì ki búntì Eejipiti tiŋkin, ki dūu bàn̄ Tapaneesi.

⁸Tapaneesi tiŋkin niinee ní ti-Dindaan sòon̄ nì Yeereemii yii:

⁹«Yòon̄ ataŋkpakpaan kí gbà kí síb́ kasarka un bí Eejipiti bɔtiu beecindi nyɔkɔpu Tapaneesee. Á ŋá míǹ Juuda yab nimbilaaliyin.»

¹⁰Míǹ boonee ní u bí-bi yii: <Ti-Dindaan Mpɔŋkɔdaan, Isirayeel Nimbɔtiu nín sòon̄ puee sɔ̀. M làá tɔ̄ bí cùú nyàabìń m-tɔntɔnliu Neebukadineesaar, Babiloon bɔtiu. M làá dū u-beejal kí tɔ́kɔń ataŋkpee ŋin a síb́ nee pu ní. Niin ní u làá cóoń u-beecindi tantiu.

¹¹U yaa láa bāańee, u làá dāá nà Eejipiti tiŋki ní dúsi dusi. U làá dāá kpɔ̀ bin máaǹ ŋkúmee, ní kí cúú bin máaǹ kí cù kuyuŋuee kí cùnnì kuyuŋu, ní kí dū kitàataajiki kí kpɔ̀ bin máaǹ bí dū kitàataajiki kí kpɔ̀ee.

¹²U làá tūū Eejipiti yab waadiiŋŋi ŋŋmi. U làá wà awaa ŋŋmi, àá u làá cáá-ŋi kí cùnnì Babiloon tiŋkin. U làá gbākal̀ Eejipiti gaajawanti kii upikpaal nín fíkití u-wampeeŋkaati kí lēē ikpɔkpɔb puee ní. Míǹ boonee ní ú yīkì kitiŋee nì ŋgbansɔŋfi.

¹³Eeliyoopooliisi tiŋkinee, u làá gbá kí wīī ataŋkpee kumpooŋi ní kí tūū Eejipiti yab waadiiŋŋi ŋŋmi.>