Read Ntcham Jérémie 46 Bible Online

Jérémie 46 - Ntcham bible

Jérémie 46

¹Ti-Dindaan nín sòon̄ nì Yeereemii atimbun pu puee sɔ̀.

²U sòon̄ Eejipiti tiŋki nì Eejipiti bɔtiu Faaroo Neekoo janjakitil pu. Joosiyaasi jipɔɔn Yooyakiim nín kpántì Juuda bɔtiu dibinnanaatiilee, Eejipiti bɔtiu nìn bí Kaarkeemiisi, Eefiraati mɔɔgbandi. Ŋyunti gbantee, Babiloon bɔtiu Neebukadineesaar nìn jáń ki pɔ́ɔkiǹ-u.

³Bijanjakpilib nìn kūuntí yii: «Bɔ́ntímaan agbampɔɔ akpaan nì ŋwaamu. Ní cùú jámaan kujaau.

⁴Ní kpàl̄maan itaamu! Bitanjakaliibi, máĺmaan ni-taamui! Dūmaan ni-janjafuulimmu kí cíkiń! Ní páaḿmaan ipɔ̀n pu! Bɔ́ntímaan ni-kpammu! Dūmaan ni-gbampɔɔŋi kí pèen̄!»

⁵Ti-Dindaan bí yii: «Ama ba bíi jītí ní? Ba ní m wāĺ nan ní? Tifaandi kɔ́-bi, bi bíi nɔ̀tī ki gítí boon! Bi jáń ki pɔ́ɔkiǹ bijanjaliibi bimɔntiibi sɔ́kɔ sɔkɔ. Dinyoondi kɔ́-bi bi sáń kaa fàtī, tifaandi bí an kɔkɔ pu.

⁶Un ŋūǹ ki yáb̀ee kaa ŋúń ki sáǹ ki ŋmátì, ubaatandaan kaa ŋūǹ kí fīī u-ba. Ŋgan pú Eefiraati mɔɔgbaŋŋee, bi gbéetì ki lítì.

⁷«Ŋma náań nì Niil mɔɔl din gbée, a lì kii dimɔɔl din nyim gbí ki páaǹee?

⁸An sá Eejipiti di jɔ́ḿ kii Niil mɔɔlee. Kì nìn lì yii: <Kii Niil mɔɔl nín gbí puee, a lì kii di-nyim nín gbí ki páaǹ puee, míǹ ní m làá gbí kí léeń kitiŋ pu ní kí nàan̄ kitiŋ kí kpáaǹ mu-timmu.

⁹Itaamu, kpàtīí líímaan! Janjatɔrɔkub, dūmaan ni-yil kí bɔ̄! Bijanjaliibi ń dū bi-ba kí bíĺ, an dàkà yii Eetiiyoopii yab nì Puuti yab, bin tūntí agbampɔɔyee nì Luudi yab bin bàl̀ abaatanee!

¹⁰Ama ti-Dindaan un sá Unimbɔti Mpɔŋkɔdaan ceeyee, an sá ipɔntoon wiiŋŋu ní. U làá tɔ̀ u-nannanliibi ipɔntoon. Kitàataajiki làá ŋmɔ́ bi-nanti kí díkí, ní kí nyɔ̀ bi-fatikuu kí gbí. Di sá yii an dāa sá saraa ní ki tīī ti-Dindaan Mpɔŋkɔdaan ŋgan pú tiŋkin, Eefiraati mɔɔgbaŋŋi.

¹¹Eejipiti tiŋki kinyannyaaŋŋi, jɔ̄m̀ Galaadi tiŋkin kí nyàab̀ a-buuŋyi kpam. Ama a bíi kpántí inyɔkɔfi fám ní, tiweendi tin a fōōyee kaa làá kpú.

¹²Atimbun gbìl̄ a-cooi pu, bi gbìl̀ a-yaliŋkii pu an kɔkɔ pu. Di sá yii ubaatandaan kpéetì ubaatandaan, ní bi-liitil gbéetì ki lítì dicilpu.>»

¹³Ŋyunti ŋun Babiloon bɔtiu Neebukadineesaar dɔ́miń kí já nì Eejipiti tiŋkee ní ti-Dindaan sòon̄ nì u-bɔnaatiliu Yeereemii yii:

¹⁴«Ní bāakì tibɔtee Eejipiti tiŋkin, ní yàntī bí gbìl̄-tì Miigidool tiŋkin, bí gbìl̄-tì Meemifiisi nì Tapaneesi timmun. Lìmaan yii: Yīkìí yūĺmaan kí bɔ́ntí ni-ba, di sá yii kujaau bíi nà ni-kɔŋkɔnnaatɔb.

¹⁵Ba pu ní a-waal din sá unajee lítì kaa ŋúń ki yúl̀ ní? Ti-Dindaan nín kpìb̄-dèe,

¹⁶dì kpīntì ní ŋkpitim pu. Bijanjaliibi lítì ki dɔ̄ tɔb pu. Bi lì tɔb cee yii: <Tí yīkì kí kpì ti-tiŋkin kí sāǹ kí wàatī kujaau kun nàantí nee.

¹⁷Diyindi din bi làá pɔ̄ Eejipiti bɔtiu Faarooyee sɔ̀. Kufuu, kufuu, ama kufuu fám!

¹⁸«Ubɔti un bi yíì ti-Dindaan Mpɔŋkɔdaanee nín sòon̄ puee sèé: <M pūtì m-ba maŋfal yii unannanli làá dāan̄.> Kii Tabɔɔr nín sá dijool ní Kaarmeel jool bí tiŋku caŋinee, míǹ ní u làá dāan̄.

¹⁹«Eejipiti yab, bɔ́ntímaan ni-wanti kí nīn cá kuyuŋu. Meemifiisi tiŋki làá kpántí kuteeu. Bi làá nàan̄-kì ní báà uniseen kaa ti làá nīn kóò ki-ni.

²⁰«Eejipiti nìn sá unasal un ŋān̄ee ní! Ama dinaagandi diba nyánní ŋgan pú ki dɔ́miń ki báaǹ u-pu.

²¹Bijanjaliibi bin kì nìn dée nìn bí ní màlmal kii dinajapɔmbilee. Ama bi mun fātì bi-boon ki tīī-kì, bi-kɔkɔ sáǹ dicilpu, baa ŋúń ki yúl̀. Di sá yii nnaabu wiiŋŋu dòoń bi-pu, ŋwiin ŋun m làá dáaĺ bi-tafalee.

²²Binannanliibi fāā mɔ̀ɔɔ ki dòoń kí léeń Eejipiti tiŋki pu kii bidɔgaaliibi di ŋúb́ ncɔkɔmu kí dāá gāā isufee. Niinee Eejipiti yab janjaliibi sáń kii ukoobu nín sáń pu kaa ŋáań kuwoouee ní.

²³Ti-Dindaan bí yii: <Bi bíi gà ki-bambaŋku, kubambaŋŋu kun poon ubɔ kaa nìn ŋūǹ kí kɔ́ee. Di sá yii bi nìn wīikí ki jítiǹ inaakitoon, ubɔ kaa ŋūǹ kí kàaǹ-bi.

²⁴Icoo kɔ́ Eejipiti kitinnyanyaaŋŋi, bi dū-kì ki ŋá ŋgan pú nibuliŋ ŋaan.>»

²⁵Ti-Dindaan Mpɔŋkɔdaan, Isirayeel yab Nimbɔtiu bí yii: «M làá dáaĺ Tabeesi yab waal Amɔn nì Eejipiti yab nì bi-waaŋi nì bi-bɔtiibi ní Faaroo nì bin kɔkɔ máká u-puee tafal.

²⁶M làá dū-bi kí ŋá bin nyàab̀ kí kpɔ̀-bee ŋaan, an dàkà yii Babiloon bɔtiu Neebukadineesaar nì u-janjaliibi ŋaan. «Ama boonee, binib làá dāá fàtīí kɔ́ Eejipiti tiŋki kii dooooyee.» Ti-Dindaan di sòon̄ míǹ.

²⁷«Sii m-tɔntɔnliu Jaakɔb, taa fàŋkì, Isirayeel, taa yàntī a-pɔbil ń bīil̀. M làá fīī-si kí nyāntí ntindandatimun, ní kí gíiǹní a-biyaamu mun bí kuyuŋunee. Jaakɔb, a làá fàtīí gítiń nì dimákal kí nīn bí ŋgbansɔŋfin. Ubɔ kaa dāa gíti páb̀-si.

²⁸Sii Jaakɔb m-tɔntɔnliu, taa fàŋkì. Man a-Dindaan di lī yii m bí a-cee. M làá kúntí atimbun ŋin poon m nìn jìn̄-si a yàl̄ ki kɔ́ee. Ama siiyee, maa làá kúntí-si. An sá tiŋman yii m dáaĺ a-tafal, ama an sá kí sāŋkì-si ní. Di sá yii maa ŋūǹ kí yàntī-si kii a sá maanyiibee.»