Read Ntcham Jérémie 47 Bible Online

Jérémie 47 - Ntcham bible

Jérémie 47

¹Ti-Dindaan nìn sòon̄ nì u-bɔnaatiliu Yeereemii Fiiliistii yab[47] pu. An nìn sá kí wàatī Faaroo ń já nì Gaasaa yabee ní.

²Ti-Dindaan nín sòon̄ puee sèé: «Tinyiŋgbaŋkpaandi nyánní ŋgan pú. Tì kpántì mbuŋkpaan ki gbí ki páaǹ. Tì gbí ki léeǹ kitiŋee nì tin kɔkɔ bí ki-poonee, ntimu nì mu-nib pu. Binib gbáà ibiil ki nyàab̀ dijòońdi, kitiŋee nib bíi gà ikpiisilan.

³Bi gbìl̀ itaamu tagbíŋŋi pu. Janjatɔrɔkub wàkalìń, bi-taaŋi ŋáań kuwookpaaŋŋu. Bibaatiibi kaa ti wāĺ bi-biyaamu, bi-ŋalii kpíì.

⁴Di sá yii ŋwiin di bāań bí nàan̄ Fiiliistii yab. Ubɔ kaa ti bí kí tūtuǹ Tiir nì Siidɔn timmu. Án taa kíń báà uniseen. Ti-Dindaan bíi nàantí Fiiliistii yab kɔkɔ, bin kíǹ ki bí dimaŋfalin Kafitoor tiŋki kin nnyim māntìi túee poonee.

⁵Gaasaa yab kōol̀ abaakpan! Asikeelɔn yab ŋmíl̀ fɔ́ŋfɔŋ díkí diki. Nimbi tijawɔkɔl tin kíǹ kaa kpíìyee, ni làá nīn cáá njimu ki gífí ni-wunti pu yéè kí cáá sāā ŋyunti ŋulɔŋu ní?

⁶Ni lì yii: <Abàa, ti-Dindaan tàataajiki, kí cáá sāā ŋyunti ŋulɔŋu ní a làá ŋùŋfì ní? Kɔ́ a-jitookun! Kàl̄ niin soooo!>

⁷Mana ní kì ŋūǹ kí ŋùŋfì? Ti-Dindaan tīī-kì mara yii kí cù áli Asikeelɔn nì tiŋku gbandi. U nín síiǹ-kì kí ŋá puee dee.»