Read Ntcham Jérémie 48 Bible Online

Jérémie 48 - Ntcham bible

Jérémie 48

¹Ti-Dindaan Mpɔŋkɔdaan, Isirayeel Nimbɔtiu nín sòon̄ Moowaab pu puee sèé: «Ba naabuŋu di jéetì Neeboo tiŋki pu míǹ? Bi nāaǹ-kì múb! Icoo cúú Kiiriyatayiim tiŋki, bi jáń ki fōō-kì! Kitiŋ kin bi máń digundi ki túee, ba cooi íǹ bulifi dee, kì lítì.

²Kun nìn sá Moowaab nyootee kúntì. Binib bɔ́ntì kí cáań nnaabu kí tɔ̄ Eesbɔn tiŋki pu ki lì yii: <Tí cùmaan kí kúntí kitiŋ nee atimbun kansikin!> Si mun Madimeeni, bi làá pée nàan̄-si ní, kujaau jìn̄ ki cúú-si dee.

³Bi gbìl̀ ibiil pu doooo Ooroonayiim tiŋkin yii: <Bi nāaǹ tikɔkɔ. Ba naabukpaaŋŋu ŋúǹ dee!>

⁴Bi wīī Moowaab tiŋki. Bi gbìl̀ ki-biyaamu biilii pu.

⁵Binib dàb̀ Luwiiti gbantaŋki ki sūǹ. A yaa sìntī Ooroonayiimee, a gbìl̀ kunimbaau biilii pu.

⁶Sām̀maan kí fīī ni-ba! Ní gbíntí kuteeun kii kumooun maŋkee.

⁷Moowaab, a nìn máká a-tuuŋŋi nì a-gaajati pu ní. Ama bi làá já kí fōō si mun. Bi làá cúú a-waal Keemoosi nì a-tandambi nì a-kpilib kí cùnnì kuyuŋu dicilpu.

⁸Un nàantí tikɔkɔee làá yìiǹ ntimu kɔkɔn, waa làá súntí báà kibaba pu. Bi làá nàan̄ ditantakal, ní kí bīil̀ laakin tɔ́kɔ́ee,» kii ti-Dindaan nín sòon̄ pu ki síiǹee.

⁹Tīīmaan Moowaab tiŋki ifeen, kí ŋmā kí yīkì kí ŋàaǹ! Ki-timmu làá kpántí kuteeu ubɔ kaa ti làá nīn kóò mu-ni.

¹⁰An sá mbusu ní ki tīī un tūǹ ti-Dindaan tundi nì bugbambuee. Mbusu sá ki tīī un kaa là fatiku ń táká u-tàataajikee.

¹¹Doooo Moowaab biyatin ní u bí ŋgbansɔŋfin. Baa cúú-u ki cūnnì kuyuŋu ki ká. U nìn pée dɔ̄ soooo kii ndaam min baa tóoń ki lēē tidacaal, kaa kpáatì-mì ki ŋá dibool diban ki kpáal̀ee ní. An puee ní u-mɔŋŋu nì u-sɔnsɔfiŋu kaa kpántì.

¹²An pu ní ti-Dindaan bí yii: «Ŋyunti bí ki dòoń, m làá tɔ̄ń binib bí dāá kpáatí-mì kí ŋá aboon aban. Bi làá kpáatí ndaam min kā tidabuti poonee kí fá ní kí wīī-tì.

¹³Bi làá dāá nīn cáá diwaal Keemoosi pu icoo. Kii Isirayeel yab nín nìn cáá diwaal Beeteel din pu bi nìn mákée pu puee.

¹⁴«Moowaab yab, mana ní ni ŋūǹ kí lì yii: <Ti sá bibaatandambi, bijanjaliibi bimɔmmɔntiibi.>

¹⁵Bi nāaǹ Moowaab tiŋki, bi dàb̄ kí jáǹ ki-timmu. Bi cúú ki-nipɔmbi bin cáá laafiyee ki cáǹ kí kpɔ̀.» Ubɔti un bi yíì ti-Dindaan Mpɔŋkɔdaanee di sòon̄ míǹ.

¹⁶An kaa làá sūŋkì, bi làá nàan̄ Moowaab tiŋki, nnaabu làá jēetí ki-pu kpalaa.

¹⁷Nimbi ki-kɔŋkɔnnaatɔb bin nyí-kì tiŋanee, ní cùú ŋámaan-kì fɔ̀ɔ́. Baa! Mpɔn ŋun kaa cáá juti nee, mbɔtikpandɔ ŋun cáá tinyool nee cúu kɔ́fàa!

¹⁸Diibɔn nibul, kpákatí a-nyooti beejal pu, kí dāá kàl̄ titampummool pu. Un nāaǹ Moowaab tiŋkee dòoń kí já nì si, u bíi wìil̄ digundi din māntìi tú-see.

¹⁹Arooweer nibul, cùú yūĺ didandi pu kí nīn cɔ́ŋkí ki kpèé. Ní bàlifì bin sáń kí ŋmátée yii: «Ba di ŋá ní?»

²⁰Bi làá kíí yii: Bi nàn̄ Moowaab tiŋki dúsi dusi! An puee icoo kɔ́-kì. Ní fáámaan ibiil bí jòò-ni. Ní bāakìmaan Arinɔn buŋgbandi pu yii bi nāaǹ Moowaab tiŋki.

²¹Ditafadaaldi lítì ditantakal timmu pu nì Oolɔn nì Yaasa nì Meefaati

²²nì Diibɔn nì Neeboo nì Beeti-Dibilatayiim timmu pu,

²³nì Kiiriyatayiim nì Beeti-Gamuul nì Beeti-Meeyɔn timmu pu

²⁴nì Keeriyooti nì Boosiraa nì Moowaab timmu mun pìl̄ee nì mun bí ndandatee pu.

²⁵«Moowaab pɔŋŋu wáŋkì, u-kpabil kɔ́fì», ti-Dindaan di lī míǹ.

²⁶Moowaab dākafì yii u sá ukpaan ki jítiǹ ti-Dindaan ní! Bí nyùntī-u ndaam ú gbí áli kí wùliŋkì. Ŋyunti bāań bí bèel̀ u mun dee!

²⁷Moowaab, kéè a nìn bèel̄ Isirayeel naa! Isirayeel mun kaa nìn sá unaayuuyaa! Kin ba pu ní a nìn gbákafí diyil ki bèel̄-u ŋyunti ŋun kamaa a yaa nìn sòoǹ u-puee ní.

²⁸Moowaab yab, yīkìí fámaan ni-timmu. Ní cùú nīn kóòmaan itaŋkpalɔkɔn! Nín̄ bímaan kii dibeenanjilee. Di pāantí di-diiku nsitim watil pú laakin unil kaa ŋūǹ kí bèe ní.

²⁹Ti gbìl̄ bi sòoǹ Moowaab yab lambil pu. Bi yòontí bi-ba yilpu an kaa cáá bí lì! Ba lambil díǹ dee! Ba badàkatam dee! Ba bayoondi dee! Ba mɔnti dee!

³⁰«M nyí u-lambil pu, ti-Dindaan nín sòon̄ míǹ. U càfī tibɔti ní an kaa cáá taapu, ní tin u ŋáańee kaa túĺ nsan.»

³¹An pu ní m bíi yáliŋkí Moowaab pu. M gbáà ibiil bí jòò Moowaab tiŋki kɔkɔ. M bíi tíminsí Kiiri-Eereesi yab pu.

³²M sūǹ sii Sibima nibul pu ki jítiǹ Yaseer yab nín sūǹ a-pu puee. A nìn sá kii fiinyi subuee ní. A nìn tɔ́ apan an lákatì Ŋyaam mɔɔl pu, ŋi nìn lālim̀ ki tin bàn̄ Yaseer tiŋki. Ama unàanli páatìi jéetì a-fiinyi biliŋ nì a-kpaajinti pu.

³³Ifaal nì dipɔɔpindi kúntì asubiŋmɔkaa kpaaŋŋi nì Moowaab tiŋkin. Ndaam dóò tilɔn poon, bininjab bin tà ki fɔ́bití fiinyi biliŋ ki nyāntí ndaamee kaa ti bí. Dipɔɔpindi kuŋkuuntii kúntì.

³⁴Eesbɔn yab bíi gbáà ibiil bí jòò-bi. Bi gbìl̀ bi-pu Eeleeyalee nì Yaasa, ní kí yòon̄ Soowaar kí tin sāā Ooroonayiim nì Eegilati-Seelisiya. Áli gba Niimriim buŋŋu fóotì.

³⁵Ti-Dindaan bí yii: «M làá kúntí Moowaab tiŋkin bin di cá ŋgbantamu pu ki ŋáań bisaraawɔkaabi ki tùutī talaalub ki tìì awaayee.»

³⁶M bí ki sūǹ Moowaab yab nì Kiiri-Eeseesi yab pu. M-yaliŋkii bí kii kiwulii nín sūǹ puee ní, kun puee tigaajawan tin kɔkɔ bi nìn kóoǹ ki kpúkuǹee wáŋkì.

³⁷Bininjab kɔkɔ kōol̀ abaakpan, ki cáń bi-nyimpuliŋ. Bi gífì gífì bi-ŋalii njimu ki dū kutukub ki gbìn̄ bi-cammu.

³⁸Moowaab diiŋŋi yilpu bi nín bɔ̀b̄ puee nì kpacantib kɔkɔ puee, bi gbìl̀ ikpiisilan pu ní. «M wīī Moowaab kii bi nín wìil̄ dibool din kaa ti bí tibanee puee ní.» Ti-Dindaan di lī míǹ.

³⁹Baa! Bi nùkū Moowaab tiŋki púb! Nín̄ yáliŋkímaan! Moowaab sáǹ ki kátì, ba cooi dee! Ki-kɔŋkɔnnaatɔb kɔkɔ bèel̄-kì ní kì kɔ́ dinyoondin.

⁴⁰Ti-Dindaan nín sòon̄ puee sèé: «Binannanliibi kpántì kii kaajiikuee ki ŋàaǹ ki kpátí u-feeŋyi Moowaab tiŋki pu.»

⁴¹Bi jáń ki fōō ntimu, ki gbáń ki wīī sintil difɔkɔŋi. Yaadalee, Moowaab baatandambi fāŋkì kii unimpu un kā imatiŋween puee ní.

⁴²Bi nāaǹ Moowaab tiŋki, an kaa ti sá dinibul. U nìn dākafì yii u sá ukpaan ki jítiǹ ti-Dindaan ní.

⁴³Dinyoondi nì mbòó nì kulaaŋŋu dɔ̄ ki cí nimbi Moowaab yab. Ti-Dindaan di lī míǹ.

⁴⁴Un yaa láa bíi sáń dinyoondee làá dāá jēetí mboon. Un yaa láa nyáń mboonee làá cùú kɔ́ kulaaŋŋun. Tiŋman, dibindi din m làá dāá dáaĺ bi-tafalee, m làá dāá yàntī tíǹ gbanti ń jēetí Moowaab yab pu. Man ni-Dindaan di lī míǹ.

⁴⁵Bin bíi sáńee kaa ti cáá mpɔn. Bi sáǹ ki kɔ́ Eesbɔn tiŋkin. Ama ŋŋmi ŋubɔ nyánní Eesbɔn tiŋkin, Siiwɔn bɔtiu beecindin. Ŋu dɔ́miń ki wùn̄ dinibul din cáá kufuu nee tiŋki kí yòon̄ ki-kpaanyɔkɔ kí cáá sāā ki-kansikin.

⁴⁶Moowaab, an sá nnaabu ní ki tīī-si! Keemoosi nibul, an dóò a-pu dee! Bi cúú a-jipɔmbi nì a-bisalib ki cūnnì kuyuŋu.

⁴⁷Ama iwiin bí ki dòoń, m làá gíiǹní Moowaab yab bin bi cúú ki cūnnì kuyuŋuee. Ti-Dindaan di lī míǹ. Ti-Dindaan nín sòon̄ Moowaab bɔti pu puee nín gbèentí laakiŋyee dee.