Read Ntcham Jérémie 49 Bible Online

Jérémie 49 - Ntcham bible

Jérémie 49

¹Ti-Dindaan sòon̄ Amɔn yab[48] pu. Ti-Dindaan nín sòon̄ puee sèé: «Ba pu ní diwaal Mooleeki jíń Gaadi tiŋki mpaan míǹ? Ba pu ní Amɔn yab fōō Isirayeel timmu míǹ? Isirayeel kaa cáá jipɔɔn un làá fōō ntimu gbanti difakaleeee?»

²An puee ti-Dindaan bí yii: «Iwiin iba bí ki dòoń m làá yàntī bí gbìl̄ Amɔn yab tiŋyil Raaba poon ijanjakuŋkuunti. Kitiŋ gbanti làá dāá kpántí adigbun, bi làá wà ntimbilimu mun māntìi tú-kèe ŋŋmi. Ŋyunti gbantee Isirayeel yab làá fàtīí fōō bin nìn jìn̄-bee cee bi-wanti.»

³Eesbɔn yab, nín yáliŋkímaan! Di sá yii bi nāaǹ Ayi tiŋki. Ntimbilimu mun māntìi tú Raaba tiŋkee, gbámaan ibiil bí jòò-ni. Dūmaan kpɔsatab kí pèen̄, gāāmaan ikpiisilan! Yìim̀maan tinaabakalin. Bi cúú diwaal Mooleeki ki cáǹ kuyuŋu, ki kpáaǹ di-tandambi nì di-kpilib dicilpu.

⁴Raaba tiŋki, kisapɔmbiki kin gáatèe, ba pu ní a nìn dàkà a-ba a-tantakal nì a-kpaaŋŋi ŋin lòoǹ tiŋanee pu míǹ? A nìn máká a-gaajati pu. A nìn bàlifī a-ba yii: «Ŋma di sá-u ní kí já nì mi?»

⁵«M làá cáań dinyoondi kí tɔ̄ ni-kɔŋkɔnnaatɔb kɔkɔ pu, ti-Dindaan di lī míǹ. M làá jà ni-kɔkɔ ní sāǹ báà ŋma ń nīn pée túĺ u-nimbiin cáaa, ní báà ubɔ dāa kpá kí kóoǹ bin bíi sáńee kí kpāfì.

⁶«Míǹ boonee, m làá fàtīí gíiǹní Amɔn yab bin bi cúú ki cūnnì kuyuŋuee.» Ti-Dindaan nín sòon̄ puee dee.

⁷Ti-Dindaan sòon̄ Eedoom yab pu. Ti-Dindaan Mpɔŋkɔdaan nín sòon̄ puee sèé: «Biciŋfitiibi kaa ti bí Teeman tiŋkin níii? Binyiliibi kaa ti nyí níii? Bi-ciiŋyi wáŋkì níii?

⁸Deedan yab, sām̀maan! Fàtīmaan ni-boon kí tīī. Sām̀maan kí báĺ itaŋkpalɔkɔn! M làá cáań dinàandi kí tɔ̄ Eesayuu naantiibi pu, di sá yii ŋyunti bāań bí dáaĺ bi-tafal.

⁹Bin kìtī fiinyi subiliŋee yaa láa bāań ni-ceeyee, baa làá dāá kíǹ disubil dibaba. Binaayub yaa láa dɔ́miń ni-cee kunyeeuee, bi làá dāá nàan̄ tin kɔkɔ bi dāa ŋūǹee.

¹⁰Di sá yii man di làá fūkul̀ Eesayuu naantiibi. M làá nyāntí ni-balilammu kí páań mpaampiin pu. Naa dāa gíti ŋūǹ kí cù kí báĺ niin. Ni-naantiibi nì ni-nabiyaamu nì ni-kɔŋkɔnnaatɔb làá nàan̄. Ubɔ dāa kpá kí tùkù-ni yii:

¹¹<Yàntīmaan ni-taŋkpiibiliŋ, ti làá kpèè-ŋi kí tīī-ni, ní ni-kpiipoobi ŋūǹ kí nīn máká m-pu.>»

¹²Di sá yii ti-Dindaan nín sòon̄ puee sèé: «Pīlifì, bin maa nìn páb́ yii bí nyɔ̀ m-ŋuul kɔŋkɔnnyɔkaaunee nyùn̄ kaa là. Ní sii Eedoom, a dàkafī yii baa làá dáaĺ a-tafalaaa? A làá nyɔ̀ m-ŋuul kɔŋkɔnnyɔkaaun kaa bál̀.

¹³Man ni-Dindaan di pūtì yii m sá Unimbɔti ní ki làá yàntī a-tiŋyil Boosiraa ń kpántí adigbun ŋma, ntimbiil paaŋŋu. Bi yaa làá dāá tɔ̄ ubɔ mbusu àá kí kɔ́ǹ ubɔ icooyee, kíǹ ní bi làá dāá yòon̄ ŋabika. Ki-timmu kɔkɔ làá dāá kpántí adigbun ŋma kí nīn cá jaanjaan.» Ti-Dindaan di sòon̄ míǹ.

¹⁴Ti-Dindaan sòon̄ nì mi tibɔti tiba, ní ntuun ŋubɔ cáań-tì ki nāatì atimbun kɔkɔ: «Kóom̀maan kí kpāfì! Cùú jámaan Eedoom tiŋki. Yīkìmaan! Jámaan-kì!»

¹⁵«Tiŋman, m làá yàntī sii Eedoom ń kpántí uluŋkikaa anibul kansikin, kitiŋ kin ní báà ŋma làá nīn kpèé ki sìŋkīǹee.

¹⁶A nìn fàantí báà ŋma, a nìn dàkafī yii a tɔ́kɔ́ bin kíǹee kɔkɔ pu, ama a nìn bíi kíiĺ a-ba ní. A kóò itaŋkpalɔkɔn ki lúń yilpu yilpu. Ama báà a yaa máń a-diiku ki tɔ́kɔǹ yilpu kii ukaabɔnee, m làá dū-si kí tɔ̄ń taapu.» Ti-Dindaan di lī míǹ.

¹⁷«Eedoom tiŋki làá kpántí adigbun ŋma ní. Bisanjitiliibi kɔkɔ yaa láa ká bi nín nāaǹ-si puee, án làá dāá ŋá-bi bitii ní bí nīn búǹ ifoon.

¹⁸An dāa bí kii Soodoom nì Goomoora timmu nì ntimu mun nìn māntìi tú-muee nín nìn nāaǹ puee ní, ti-Dindaan di lī míǹ[49]. Ubɔ kaa làá dāá gíti kɔ́ niin, uniseen kaa dāa gíti kíikí kí kàl̄ niin.»

¹⁹Ti-Dindaan bí yii: «M làá dāá nīn bí kii gbikinti nín nyēē kimɔgbaayin Jɔɔdan buŋgbandi ki cá laakin timɔsɔn bée puee ní. Kii dinimbil nín kábití puee, m làá yàntī báà ŋma ń búntí. Míǹ boonee ní ḿ lēē un m lèe kí kàan̄ Eedoom tiŋki pu ubɔti. Di sá yii ŋma di bí kii mamee? Ŋma di ŋūǹ kí yíiń-mi tibuul? Uyidaan ulɔu di ŋūǹ kí yūĺ m-nimbiin?»

²⁰Ní pīlifì tin ti-Dindaan bɔ́ntì kí ŋá Eedoom tiŋkee, nì tin u lēē kí ŋá Teeman yabee. Bi làá dāá cúú-bi mpɔn ki dàtī kii tiwaŋkutee, áli uluŋkikaa, án kpá kí gbíntí. Bi-puee, bi làá nàan̄ bi-naakpaapɔɔku, án kaa cáá yii án kpántí.

²¹Bi nín lítì puee wooku yāntì kitiŋ cīŋkì. Bi gbìl̀ bi-biilii pu áli Tikati mɔɔl.

²²Unannanli bí kii ukaabɔn nín jɔ́ḿ kutaa pu, ki ŋàaǹ ki kpátí u-feeŋyi Boosiraa tiŋki puee ní. Yaadalee, Eedoom yab baatandambi pɔbiliŋ làá dāá bīil̀ kii imatiŋween nín cútí upɔdaan puee ní.

²³Ti-Dindaan nín sòon̄ tibɔti tin Damaasi yab puee sèé. «Amaati nì Aripaadi timmu nín gbìl̄ kubɔbiiu gbanti puee, ní icoo cúú-mu. Bi-pɔbil yíkì kii tiŋku un pu kubuŋkpaaŋŋu jītí waa ŋūǹ kí dòon̄ sooooyee ní.

²⁴Damaasi yab wunti yɔ̄tì ní bi bíi bɔ́ntí kí sāǹ. Tifaandi cúú-bi. Dinyoondi kɔ́-bi ní bi bíi yáliŋkí kii imatiŋween di cúú upɔdaanee.

²⁵An ŋá mana ní bi dū kitiŋ kin nyáń diyindee ki fá míǹ, kitiŋ kin nìn tīī-mi dipɔɔpindee.

²⁶Ti-Dindaan Mpɔŋkɔdaan nín sòon̄ puee sɔ̀. An pu ní ŋwiin gbantee, bi-nipɔmbi làá lítí mpaan nee pu ní bijanjaliibi kɔkɔ ń kpú.

²⁷M làá tūū digundi din māntìi tú Damaasi tiŋkee ŋŋmi ní ŋú wà ubɔti Been-Adaadi beecindi.

²⁸Ti-Dindaan nín sòon̄ tibɔti tin bilaalibub nì Asɔɔr beeŋi ŋin Babiloon bɔtiu Neebukadineesaar nìn jáń ki pɔ́ɔkiǹee sèé: «Yīkìmaan kí cùú jáǹ Keedaar yab! Ní nàan̄ bin kóò kuteeunee wanti kɔkɔ.

²⁹Ní fōōmaan bi-tantib nì bi-waŋkuti, nì bi-kɔŋkooŋyi nì tin kɔkɔ bi cááyee. Ní kpáaǹ bi-gutaamui, ní kí nīn kūuntí mpɔn bi-pu yii: Dinyoondi bí an kɔkɔ pu.»

³⁰Ti-Dindaan bí yii: «Asɔɔr yab, sām̀maan, yīkìmaan malaa kí fīī ni-ba Ní sāǹ kí báĺ itaŋkpalɔkɔn. Di sá yii Babiloon bɔtiu Neebukadineesaar bɔ́ntì ni-pu min u làá ŋá-nee.»

³¹Ti-Dindaan bí yii: «Yīkìmaan kí cùú jáǹ ditimbundi din kā ŋgbansɔŋfin kaa dàkafī yii tiba ŋūǹ kí ŋá-dèe. Bi-punyɔmmu kaa cáá punuubi, kaa cáá tikpàlkaal, ní ki kóò bi-baba ŋkpaanceeti.

³²Binannanliibi làá yɔ̀ bi-gutaamui, ní kí fūkul̀ bi-picaŋkpunti tin náaǹ nee. Ti-Dindaan bí yii: M làá jà binib bin kōol̀ jamba nee. M làá cáań nnaabu kí tɔ̄ bi-pu laakin kamaa bi yaa pée bée.

³³Asɔɔr tiŋki làá kpántí iŋɔkɔ kɔŋkooŋŋu, kunimbaau teeku kí nīn cá jaanjaan. Ubɔ kaa làá nīn gíti kóò ki-ni, báà uniseen.»

³⁴Ti-Dindaan sòon̄ nì u-bɔnaatiliu Yeereemii Eelam yab pu. Ŋyunti gbantee Seedeesiyasi kpántì Juuda bɔtiu an kaa yúntì.

³⁵Ti-Dindaan Mpɔŋkɔdaan nín sòon̄ puee sèé: «M làá kóoĺ Eelam yab tɔbu bun pu bi pɔ̄ɔ̄yee.

³⁶M làá yàntī kubuŋu ń nyānní ŋgan pú nì ŋgiil pú, ŋwìiń nyalaŋki pú nì ŋu-jeetilaŋki pú, an dàkà yii kitiŋ jannaatiliŋ pú kí túĺ Eelam tiŋki watil. «M làá jà Eelam yab, bí yàl̄ kí kɔ́ an kɔkɔ pu. Bi làá dāá ká Eelam yab ntimu kɔkɔn.

³⁷«M làá yàntī Eelam yab wunti ń nīn gbáà kpàkpa bi-nannanliibi nì bin nyàab̀ kí kpɔ̀-bee nimbiin. Ti-Dindaan bí yii: <M làá cáań nnaabu kí tɔ̄ bi-pu m-ŋuukpaandi poon. M làá dū kujaau kí tɔ̄ bi-pu kí tin kúntí-bi.

³⁸M làá kúntí Eelam tiŋkin ubɔti nì u-kàliŋkpilib, ní kí cáań m-beejal kí yóoń kitiŋ gbantin.>» Ti-Dindaan di lī míǹ.

³⁹Ama míǹ boonee, m làá fàtīí gíiǹní Eelam yab bin bi nìn cūnnì kuyuŋuee bi-tiŋkin. Ti-Dindaan di lī míǹ.