Read Ntcham Jérémie 5 Bible Online

Jérémie 5 - Ntcham bible

Jérémie 5

¹Yìim̀maan Jeerusaleem daŋŋi kɔkɔ pu kí kpèè, bàlifìmaan kí béé. Nyàab̀maan imɔŋkijaa pu. Ni yaa ká unibambaanti bí deedee ki sòoǹ ibaamɔnee, m làá dū Jeerusaleem tiŋki kpitii kí pɔ̄-kì.

²Bi pée pùtī ki lì yii: «Nì ti-Dindaan yindi puee...» Ama bi-pùtitam gbanti kaa sá mbaamɔn.

³Ti-Dindaan, an sá ibaamɔn ní a là. A gbáń-bi, ama an kaa píĺ-bi, a bàà nìn lēē kí kúntí-bi, ama an kaa cíikì-bi. Bi wíiḿ bi-nimbiin an pɔ̄ɔ̄ kiŋkiŋ kii ditaŋkpalee, bi yíì kaa gítìń a-cee.

⁴M nìn dākafì yii: «Binib bin kaa bí tibanee di ŋáań míǹ. Bi ŋáań kaa dàkafī. Di sá yii baa nyí tin ti-Dindaan lèe, kaa nyí tin Unimbɔti bālifì bí ŋée.

⁵M làá cùú sòoǹ nì bikpootiliibi. Bíǹ nyí tin ti-Dindaan lèe, nì tin Unimbɔti bàlifī bí ŋée.» Ama bi-kɔkɔ sá bibaantiibi ní, bi yíkì kaa kíí bi-ba pu, ní ki gbáń ki kpītì mpèé ŋun bí bi nì Unimbɔti kansikinee.

⁶An pu ní gbikintib nyēeń kubambaŋŋun ki cútí-bi ní kuteeun gbiŋgbiliŋ tɔ̀ntī-bi. Igbii làá màntī kí tū bi-timmu, ní kí ŋmɔ́ bin kɔkɔ làá nyānnée.

⁷«Jeerusaleem, mana ní m ŋūǹ kí dū a-kpitii kí pɔ̄-si? A-jipɔmbi dū-mi ki fá, ki pùtī awaa ŋin kaa sá Unimbɔtee. M tīī-bi tin kɔkɔ máaǹee, ama ní bi ŋá tilaakpaal, ní ki kpákà kinimpulaakpaai pu.

⁸Bi bí kii itaamu in bí màlmal ki pútèe ní. Báà ŋma fèefī ki nyàab̀ u-juti nimpuu.

⁹Ti-Dindaan bí yii: Maa cáá nsan kí ŋá binib nee tibaaa? Maa máaǹ kí tɔ̀ ditimbundi din bí kii di neeyee ipɔntoonaaa?

¹⁰Dàb̄maan agun ŋin bi máń ki tú bufiinyikpaa nee kí kɔ́ kí bīil̀-bu, ama ní taa bīil̀-bu kɔkɔ. Gàatìmaan fiinyee paŋŋi, di sá yii ŋaa ti sá ti-Dindaan wanti.

¹¹Isirayeel beel yab nì Juuda beel yab nyáń m-boon an kaa cáá bí lì.» Ti-Dindaan di lī míǹ.

¹²Juuda yab fātì bi-boon ki tīī ti-Dindaan, ní ki lì yii: «Ti-Dindaan kpá, nnaabu ŋubɔ kaa làá bàn̄-ti. Taa làá ká kujaauaaa, ŋkùm mun kaa làá nyā ti-pu.

¹³Unimbɔti bɔnaatiliibi sá kii kubuŋuee ní, Unimbɔti ubɔ kaa sòon̄ nì bi. Bi nín sòoǹ nnaabu ŋun puee ń gítí bi-pu!»

¹⁴An puee, ti-Dindaan Mpɔŋkɔdaan nín lī puee sèé: «Yeereemii, kii bi nín bí ki sòoǹ míǹ puee, m làá yàntī tibɔti tin m dūu ŋá a-nyɔkɔnee ń kpántí kii ŋŋmee ní. Dinibul nee làá kpántí kii idɔee, ní ŋŋmi ń dāá wà-i.

¹⁵Ti-Dindaan bí yii: <Isirayeel yab, m làá cáań ditimbundi din nyánní ndanee kí tɔ̄ ni-pu. An sá ditimbundi din ubɔ kaa ŋūǹ kí já kí pɔ̄ɔkiǹee ní, ditimbundi din sá dikpiŋkpikilee, ditimbundi din sooŋyi naa nyí kaa gbìl̀ee.

¹⁶Di-piiŋyi cāabìń ŋkúm ní, di-nib kɔkɔ sá bibaatandambi ní.

¹⁷Bi làá dāá jī kí céetí ni-kpaajinti nì ni-jikaati, kí kpɔ̀ ni-jipɔmbi nì ni-bisalib, kí làntì ni-naai nì ni-piii nì ni-ŋoobui, kí nàan̄ ni-fiinyi nì ni-fiigi sufii. Bi làá dāá kpēelikì ni-timmu mun ni máń agun ki tú ki dàkafī yii tiba kaa ŋūǹ kí ŋá-nee kujaau poon.»

¹⁸Ti-Dindaan bí yii: «Nì míǹ kɔkɔee, maa làá dāá kúntí-ni nyíki nyiki.

¹⁹Binib yaa láa bālifì yii: <Ba ní ti-Dindaan ti-Nimbɔtiu ŋá-ti mimmee?>, sii Yeereemii, á dāá kíí-bi yii: <Ni dū-u ki fá ki nóó anicaŋwaa ni-tiŋki poon. Míǹ mbaantiim ní ni làá cù kinicantiŋin kí cùú tɔ̄ ditundi kí tīī binicambi.>»

²⁰Ti-Dindaan bí yii: «Ní sòoǹ tibɔti nee kí tùkù Jaakɔb yab, ní bāakì-tì Juuda tiŋkin.

²¹Ní pīlifìmaan tibɔti nee, nimbi dinibul din kaa nyí tiba, kaa cáá nlandɔkɔee. Ni cáá animbil, ama ní kaa wāĺ, ki cáá atafal, ama ní kaa gbìl̀[6].»

²²Ti-Dindaan bí yii: «Naa fàŋkí-maaa? Naa yɔ́tifí m-nimbiinaaa? Man di kaa dū dibul ki bíl̀ án nīn sá tiŋku kpaanyɔkɔki, kikpaanyɔkɔ kin waa máaǹ kí lákatéeee? U-nyiŋgbanti ŋūǹ kí yīkì, ama tàa cáá mpɔn, tì gà kuwoou, nì míǹ kɔkɔee tàa ŋūǹ kí jītí[7].

²³Ama nimbi dinibul nee pɔbil nyìm̀ ki gáatì, ni fātì ni-boon ki tīī-mi ki búntì.

²⁴Baa lì bi-pɔbilin yii: <Tí fàŋkìmaan ti-Dindaan ti-Nimbɔtiu. Úǹ di tìì-ti utaa ŋyunti ŋun an máaǹee, utaapeekaa nì ujoolkaa. Dibindi kamaayee, u síiǹ-ti nnyɔmu mun ti làá nīn cēē tikpaajinee.>

²⁵An sá ni-kpitii di pìkil̄ tin Unimbɔti bɔ́ntì ki síiǹee, ni-yìntitam di pìintí tiŋan gbanti nsan.

²⁶Di sá yii m-nibul kansikinee, binikpitib bí. Kii un kpáŋkí inoonee nín bí puee, míǹ ní bi bāal̀ ki cí. Bi píĺ titalindi ki sātì binib.

²⁷Kii inoon nín gbí anɔndiinni puee, míǹ ní tiwan tin bi fìkēe gbí bi-diiŋŋin. Bi nín dī pu ki kpántì binikpaambi nì bigaajab,

²⁸ki gbīfiǹ ki ŋá ŋkpamee dee. Bi ŋá ikpiti an lákatì. Baa sòoǹ tibɔti ti-pú, kaa mɔ́tí ditaŋkpiibil pu, ama ní an bútí-bi. Baa pɔ̀ uwɔfi.

²⁹Maa cáá nsan kí ŋá binib nee tibaaa? Ti-Dindaan di lī míǹ. Maa máaǹ kí tɔ̀ ditimbundi din bí kii di neeyee ipɔntoonaaa?

³⁰«Ntimbiil nì atulim bɔti bíi jītí kitiŋ nee pu.

³¹Unimbɔti bɔnaatiliibi nàatī tinyimɔmbɔti, ní bisaraaŋaliibi kāntí ipaati, ní m-nibul ká yii míǹ ŋān̄[8]! Mimmee tin bí nee kɔkɔ yaa láa kúntèe, ni làá dāá ŋá mana dee?»