Read Ntcham Jérémie 50 Bible Online

Jérémie 50 - Ntcham bible

Jérémie 50

¹Ti-Dindaan nín sòon̄ nì u-bɔnaatiliu Yeereemii Babiloon tiŋki, an dàkà yii Kaldee yab tiŋki pu puee sèé:

²«Bāakìmaan tibɔti nee kí tùkù atimbun kɔkɔ, ní cóoḿmaan tidaandi kí yàntī bí béé-tì. Yàntīmaan bí béé-tì, ní taa báĺ tiba. Lìmaan yii: <Bi jáń ki fōō Babiloon tiŋki, icoo cúú diwaal Beeli, diwaal Maarduuki lítì. Icoo cúú u-waaŋi gbanti, bi kúntì u-jɔkɔŋwanti gbanti.

³Di sá yii ditimbundi diba nyánní ŋgan pú ki dòoń kí já nì kì kí yàntī kí kpántí kunimbaau teeku. Ubɔ kaa ti làá kɔ́ ki-pu. Binibaaa, tiwaŋkutaaa, bi-kɔkɔ làá sāǹ kí wāŋkì.>»

⁴Ti-Dindaan bí yii: «Ŋyunti gbantee, Isirayeel yab nì Juuda yab làá dāá nóoń dicilpu kí dāan̄. Bi làá dāá nīn còom̄ ki sūǹ ki nyàab̀ man bi-Dindaan bi-Nimbɔtiu.

⁵Bi làá dāá bàlifì kí béé nsan ŋun bi dì ki cá Siiyɔn tiŋkinee. Bi làá dāá fàtī bi-nimbiin kí túĺ kitiŋee pú. Bi làá dāá dāan̄ ní bi nì man ń ŋá mpèé ŋun làá nīn bí ki cá jaanjaanee. Bi dāa pée kpá kí súntí ŋu-pu.

⁶M-nibul yab nìn bí kii ipii in wáŋkèe ní. Bi-kpàaliibi nìn yāntì bi wáŋkì ní ki yāntì bi tú ki yìiǹ ajoon pu. Bi nìn yìiǹ ajoon pu ki póotí ŋgbantamu pu, ní ki súntì bi-naabakati pu.

⁷Bin kɔkɔ yaa nìn ká-bee nìn cútí-bi ní kí tɔ̀ntī ní bi-nannanliibi lì yii: <Taa bíi ŋáań tikpitil tibaa! Tiŋman puee, binib gbanti yīntiǹ ti-Dindaan un di sá difiil kɔŋkooŋŋu, ní bi-naanjab nìn máká u-puee.>»

⁸Sām̀maan kí nyā Babiloon tiŋki[50], yīkìmaan Kaldee yab tiŋki! Lìntīmaan kupicaŋkpuŋu nyɔkɔpu kii iŋɔjaayee.

⁹Di sá yii m làá lùkutī atimbuŋkpaan dikitil ní kí tɔ̄-ŋi ŋí já nì Babiloon tiŋki. Atimbun gbanti làá nyānní ŋgan pú ní kí tàtīí gbàan̄ dikɔ̀ndi pu kí já kí fōō kitiŋ gbanti. Bi-piiŋyi bí kii ubaatandaan un kaa fàtīi gítí mmɔŋki iŋaŋkulimee ní.

¹⁰Bi làá fūkul̀ Kaldee yab tiŋki, ní bin kɔkɔ làá fūkul̀-bee làá kóoǹ tigaajawan kí báĺ, ti-Dindaan di lī míǹ.

¹¹Nín̄ fàal̀maan kí nīn bí dipɔɔpindin, nimbi bin dɔ́miń ki fúkúl̀ man gaajawantee. Nín̄ yùkufīmaan kii dinabil di yú kumɔsɔŋunee. Nín̄ sūm̀maan kii itaamuee!

¹²Icoo cúú ni-tiŋki kin sá kii ni-nee, un di màl̄-nee fá u-jilmau. Kɔŋkɔnnee, ni-tiŋki di sá kin lúŋkèe ntimu kɔkɔ kansikin. Kì kpántì kuteeu, kitiŋkuliŋŋi.

¹³Diŋuul din ti-Dindaan fōōyee puee, binib kaa ti kóò ni-tiŋkin, kì kpántì kuteekpaaŋŋu ní. An ŋáań bin kɔkɔ jītí Babiloon tiŋkinee bitii. Bi yaa ká nnaabu ŋun jéetì kitiŋee puee, bi fátí dipɔɔbiildi biilii ní.

¹⁴Nimbi bipintɔliibi kɔkɔ, màntīí tūmaan Babiloon tiŋki kí já nì kì. Ní tɔ̄maan ni-piiŋyi, ní taa mɔ̄tì i-pu, di sá yii kì yīntiǹ ti-Dindaan.

¹⁵Ijaan kɔkɔ puee, nín̄ kūuntímaan ki-pu ijanjakuŋkuunti! Bi yōoǹ bi-ŋalii yilpu ki sáǹ ki kɔ́ bi-nannanliibi. Digundi din bi máń ki tú kitiŋee lítì. Ti-Dindaan di bíi tɔ̀ ipɔntoon! Tɔ̀maan Babiloon tiŋki ipɔntoon, ŋámaan-kì kii kì nín ŋá bin kíǹee puee.

¹⁶Ní kúntímaan Babiloon tiŋkin, bin būul̀ee nì bin cēēyee. Báà ŋma ń sāǹ kujaau kun nàantí nee kí gítí u-nibul cee, báà ŋma ń sāǹ kí gítí u-tiŋkin.

¹⁷Isirayeel yab nìn bí kii dipibil din wáŋkì ní gbikintib sáń ki jèe ní. Gbikintipeepeekaa un cúú-bi ki ŋmɔ́ee di sá Asuur bɔtiu. Míǹ boonee ní Babiloon bɔtiu Neebukadineesaar mun dɔ́miń ki kɔ́fì bi-kpabiŋ.

¹⁸An pu ní ti-Dindaan Mpɔŋkɔdaan, Isirayeel Nimbɔtiu bí yii: «M làá jáǹ Babiloon bɔtiu nì u-tiŋki, kii m nín jáń nì Asuur bɔtiu puee ní.

¹⁹«M làá fàtīí gíiǹní Isirayeel yab bi-pikpaapɔɔkun. Bi làá ká kí jī Kaarmeel jool pu nì Baasan timpiliŋki pu, nì Eefiraayiim jooŋŋi pu nì Galaadi tiŋkin kí díkí.

²⁰Man ni-Dindaan di bíi sòoǹ yii ŋyunti gbantee, bi làá dāá nyàab̀ Isirayeel yìntitam ama baa làá dāá ká. Bi làá dāá nyàab̀ Juuda kpitii kaa làá dāá ká. Di sá yii m làá dāá dū bin kíǹ kaa kpíìyee kpitii kí pɔ̄-bi.

²¹«Bóob́maan dikɔ̀ndi kí cùú jáǹ Maratiim tiŋki. Ní cùú já kì nì Peekoodi yab! Ní pɔ̀fì-bi kí kpɔ̀ kí céetí bi-kɔkɔ múb. Man ni-Dindaan di lī míǹ. Á ŋá m nín tīī-si mara á ŋá puee deedee.

²²Ti gbìl̄ dikɔ̀ndi wooku nì dibintiŋkpaandi pu kitiŋee ni!

²³Babiloon tiŋki nìn bí kii dikújal din gbáà ki mátí kitiŋ kɔkɔee ní. Kin an dī mana ní bi gbáń ki wīil̀-kì kì kíǹ ki dɔ̄ akati akati míǹ? Babiloon tiŋki kpántì dinyoondi paaŋŋu atimbun kansikin.

²⁴Babiloon, m píĺ-si kutaliŋŋu ní a sàl̄ kaa kpáàa béè. Bi bīitì a-pu ki cúú-si, kun puee a jáń nì man ni-Dindaan»

²⁵Ti-Dindaan pīitì u-janjawanti diiku ní ki lēeń u-ŋuul janjawanti. Di sá yii ti-Dindaan Unimbɔti Mpɔŋkɔdaan cáá ditundi kí tɔ̄ Kaaldee yab tiŋkin.

²⁶Nyānnímaan ajan kɔkɔ pu kí dāan̄ kitiŋ nee ni! Ní pìitī ki-cakalaabi kí kóoǹ ki-gaajawanti kí kpúkuń ní kí nàan̄-kì. Tiba nì tiba kaa máaǹ kí kíń.

²⁷Kpɔ̀maan ki-janjaliibi bimɔntiibi kɔkɔ, cùnnìmaan-bi nnaŋkpɔpaan pu! Dinimbinaamandi kɔ́-bi, di sá yii ŋyunti bāań ti-Dindaan ń dáaĺ bi-tafal.

²⁸Pīlifìmaan, bin bíi sáń Babiloon tiŋkee, bin dáá gbíntìi bí dimaŋfalinee di dɔ́miń ki máafí Siiyɔn tibɔmɔntiil yii: «Ti-Dindaan ti-Nimbɔtiu tɔ̀n̄-ti, u tɔ̀n̄ u-diiku pɔntooŋyi.

²⁹Kóom̀maan bipintɔliibi, bin kɔkɔ pīil̀ itɔfee kí kpāfì bí jáǹ Babiloon tiŋki. Lùkù kí gíb́maan-kì ijaan kɔkɔ pu, ní taa yàntī báà ubɔ ń sāǹ kí ŋmátí. Ní pàmaan-kì kí nóó ki-tuŋkpitiŋ. Ŋámaan-kì kii kì nín ŋá bin kíǹee puee[51]. Di sá yii kì yōoǹ ki-ba yilpu ti-Dindaan Isirayeel circir Nimbɔtiu nimbiin.

³⁰«An pu ní bi-nipɔmbi làá lítí mpaan nee pu ŋwiin gbanti, ki-janjaliibi kɔkɔ làá kpú.» Ti-Dindaan di sòon̄ míǹ.

³¹«Babiloon ulambidaan, man nì sii dee, man ni-Dindaan Unimbɔti Mpɔŋkɔdaan di lī míǹ. A-wiiŋŋu bāań díǹ dee, ŋyunti ŋun m làá dáaĺ a-tafalee dee.

³²Kilambidaŋ gbéetì ki lítì, ubɔ kaa bí kí yòon̄-kì kí yóoń. M tūū ki-timmu ŋŋmi, an làá wà tin kɔkɔ māntìi tú-kèe.»

³³Ti-Dindaan Mpɔŋkɔdaan nín sòon̄ puee sèé: «Bi ŋúb́ Isirayeel yab nì Juuda yab ki sàantí. Bin cúú-bi kuyuŋuee ŋúb́-bi kaa là kí gíiǹ-bi kí líí.

³⁴Ama man un mɔ́tí bi-puee cáá mpɔn, man ní bi yíì ni-Dindaan Mpɔŋkɔdaan. M làá mɔ̄tì bi-pu nì tininjati. Míǹ ní m làá ŋá kí yàntī Babiloon yab ń nyɔ̀ ŋkpatim ní kí cáań ŋgbansɔŋfi kitiŋ kɔkɔ pu.»

³⁵Ti-Dindaan bí yii: «Bí já nì Kaaldee yab, bí já nì Babiloon yab, bí já nì Babiloon bɔtibiliŋ nì ki-ciŋfitiibi!

³⁶Bí já nì bibɔɔbi, bi-yiliŋ ń lábití! Bí já nì bibaatandambi, bi-wunti ń yɔ̀tī.

³⁷Bí já nì ki-taamui nì ki-janjatɔrɔkub, nì nyaaŋmaliŋku nib bin kóò bi-kansikinee, bí kpántí kii binimpoobee! Bí já nì laakin ki kpáafí ki-gaajatee.

³⁸Bí já nì ki-buŋyi í kpā! Di sá yii kì sá awaa tiŋki ní. Ntimbiil wanti gbanti yāntì bi-yiliŋ lábitì.

³⁹An pu ní alambuntilaŋkpan làá dāá nīn kóò Babiloon tiŋkin nì isaakpan, ní taataabi ń dāá kàl̄ niin. Ubɔ kaa ti làá kɔ́ niin dalba dalba, kitiŋ nee làá dāá dòon̄ fám abin abin[52].»

⁴⁰Ti-Dindaan bí yii: «Kii m nín nìn nāaǹ Soodoom nì Goomoora[53] timmu nì ntimu mun māntìi tú-muee puee, míǹ ní ubɔ kaa ti làá kɔ́ Babiloon tiŋkin, uniseen kaa làá ti kàl̄ niin.

⁴¹Dinibul diba nyánní ŋgan pú, an sá ditimbuŋkpaandi ní. Atimbun kupaau nyánní doooo kitiŋgbeennyɔkɔ ki dòoń.

⁴²Bi-janjaliibi ŋúb́ itɔfi nì ŋkpamu. Bi cáá nnimbinaakulim kaa sūǹ isaa. Dibintindi din bi gèe náań nì tiŋku nín ŋáań kuwoou puee ní. Bi jɔ́m̀ ki kā itaamu pu. Bi páaǹ ipɔ̀n pu tiŋan kí já nì sii Babiloon tiŋki.

⁴³Babiloon bɔtiu gbìl̄ bi-pu. U-wunti yɔ̄tì ní dinyoondi cúú-u, ní u bíi gbìl̀ tiweendi pu kii imatiŋween di cúú upɔdaanee.

⁴⁴Ti-Dindaan bí yii: M làá nīn bí kii gbikinti un di nyánní kimɔgbaayin ki kpàkaǹ Jɔɔdan buŋŋu ki cá kumɔsɔŋu laŋkee ní. Kii dinimbil nín kábití puee, míǹ ní m làá yàntī ki-nib ń yīkì. Míǹ boonee ní ḿ kàan̄ Babiloon tiŋkin ubɔti un m lēēyee. Di sá yii ŋma di bí kii mamee? Ŋma di ŋūǹ kí yíiń-mi tibuul? Uyidaan ulɔu di ŋūǹ kí já nì mi?»

⁴⁵Ní pīlifìmaan tin ti-Dindaan bɔ́ntì kí ŋá Babiloon tiŋkee, tin u lēē kí ŋá Kaaldee yabee. Tiŋman, bi làá dāá dàtī-bi mpɔn ki kpáaǹ bi-biyaamu kii tiwaŋkutee. Bi-puee, bi làá nàan̄ bi-naabakati, an kaa cáá digbíntil.

⁴⁶Bi nín gbìl̄ yii: «Bi jáń ki fōō Babiloon tiŋkee», kitiŋ cīŋkì ní, ní ibiil fōō ki píĺ dàii atimbun kɔkɔn.