Read Ntcham Jérémie 6 Bible Online

Jérémie 6 - Ntcham bible

Jérémie 6

¹Beenjameen yab, sām̀maan kí nyā Jeerusaleem tiŋkin. Ní cùú báĺmaan laaba. Búḿmaan ŋyin Teekoowa tiŋkin, kí cóoḿmaan kudaaŋŋu ŋaabiki Beeti-Keereem tiŋkin, di sá yii mbusu ubɔ, nnaabukpaan ŋubɔ làá nyānní ŋgan pú kí dāan̄.

²Siiyɔn tiŋki kin ŋān̄ dándanee, bi nāaǹ-kì ní nee.

³Binib làá dāan̄ kí bìin̄ ki-pu, kii bipikpaaliibi nì bi-picaŋkpuntee. Bi làá gāā bi-bìńti kí màntīí tū-kì. Báà ŋma làá nīn cáá u-jandi.

⁴Bi téeń yii: «Yīkìmaan! Tí bɔ́ntímaan kujaau. Tí cùú já nì Jeerusaleem tiŋki diwiŋkaŋkambil pu. Timbi bɔlii na! Ŋwìiń bíi jēetí, njooboon bíi lítí.

⁵Yīkìmaan tí cùú jáǹ-bi kunyeeu nee, tí wīīmaan bi-dinyaaŋŋi!»

⁶Ti-Dindaan Mpɔŋkɔdaan nín lī puee sèé: «Gàatìmaan isufi kí kpúkuń kí nákáǹ Jeerusaleem gundi.» M làá dáaĺ kitiŋ gbanti tafal, kun puee tipɔmbɔti ŋma di gbí ki-poon.

⁷Kii nnyimbul nín tòoń di-nyim puee, míǹ ní kì tòó ki-toom ki yàantí. Ki-ceeyee, bi pée sòoǹ tipɔmbɔti nì dinàandi pu ní. Falaabi nì tiweendi di pée dɔ̄ m-nimbiin baabadal.

⁸«Jeerusaleem, kpèè tiŋan, an yaa kaa sá míǹ, m làá cúú m-ba kí nákatí kí wàatī-si, kí nàan̄-si á kpántí kuteeu, kitiŋ kin báà ubɔ kaa ti kóòyee.»

⁹Ti-Dindaan Mpɔŋkɔdaan nín lī puee sèé. «Kóom̀maan bin kɔkɔ kíǹ ki bí Isirayeel tiŋkinee kii bi nín kōontí fiinyi subiliŋ sakaŋ bukpaan puee. Fàtīí dūmaan ni-ŋalii kí máań máań afiinyipan pu ŋfunyɔm kupaau, kii bufiinyikpaa dindaan nín ŋáań puee.»

¹⁰Tibɔti nee, ŋma cee ní m làá sòoǹ-tì? Ŋma ní m làá kpāafì ní ú gbìl̄ ní? Bi-tafaliŋ kpáá baa ŋūǹ kí gbìl̄. Ti-Dindaan bɔti kpántì bi-cee ibeel ní, baa pée là kí gbìl̄-tì.

¹¹Ti-Dindaan ŋuul fòol̄ m-ni lìblib, maa ti ŋūǹ kí ŋmèè. «Kpáatí diŋuul gbanti kí sìtī mbiyaamu mun còom̄ adan puee nì binipɔmbi kɔkɔ pu. Bi-kɔkɔ làá kpántí bisarkadambi, bininjab nì binimpoobi, bijaŋkpilib nì bin púĺ sɔ́kɔ sɔkɔee.

¹²Biba di làá dāá jī bi-diiŋŋi nì bi-sati nì bi-nimpoobi. M làá tàntī m-ŋal kí gbēē kitiŋ nee nib, ti-Dindaan di lī míǹ!

¹³Di sá yii kí yòon̄ bikpaambi kí tin sāā ŋwaamuee, bi-kɔkɔ bìǹ ki nyàab̀ njim ní. Kí yòon̄ Unimbɔti bɔnaatiliibi kí cáá sāā bisaraaŋaliibee, bi-kɔkɔ cáá inaamuul ní.

¹⁴Bi cáá m-nibul naabuŋu ki ŋáań bugbambu ní ki lì yii: <Ŋgbansɔŋfi bí! Ŋgbansɔŋfi bí!> Ama ní ŋgbansɔŋfi kpá[9].

¹⁵Ntimbiil tuuŋŋi ŋin bi tūǹee, an kɔ́ǹ-bi icoooo? Aayee, kpataaa! Baa kpáàa nyí gba yii bi ŋá tiba. Ti-Dindaan bí yii: An pu ní bi làá kūtì bin bíi lítée pu bí lítí. M yaa láa tāā ki bíikì bi-puee, bi làá dāá ká yii bi dɔ̄ kitiŋ ní.

¹⁶Ti-Dindaan nín sòon̄ puee sèé: Gbèem̄maan nsan ŋun ni dēe pu kí dàkafì. Bàlifìmaan bí tùkù-ni njamin saŋyi bɔti. Nyàab̀maan nsammɔnti kí nóó-ŋu. Niin ní ni ŋūǹ kí ká dipɔɔsɔŋkil kí ŋùŋfì. Ama ní bi kíí yii: <Taa làá nóó-ŋu.>

¹⁷M yóoǹ binib sintil bí kpāafì-bi yii: <Ni yaa gbìl̄ bi búń ŋyinee, ní nīn nyí nì ni-ba!> Ama ní bi kíí yii: <Taa làá nīn nyí nì ti-ba.>

¹⁸An puee nimbi atimbun, pīlifìmaan! Báà ŋma ń béé tin làá bàń bi-puee.

¹⁹Anibul ŋin kɔkɔ bí duulinyanee, pīlifìmaan. M làá cáań nnaabu kí tɔ̄ binib nee pu. Án làá nīn sá bi-tuŋkpitiŋ paati. Baa dū m-bɔti ki yíiń tiba, ní ki kpèé m-marab fám.

²⁰Ba ní ni làá ŋá nì talaalutuukaa un ni cāabìń Seeba tiŋkin, nì kukaluu kun sɔ́fì ni cáań kitiŋ kin dátèe poonee? Maa là bisaraawɔkaabi bin ni ŋáań ki tìì-mee. Ni-saraabi kaa fáatì-mi.

²¹An pu ní ti-Dindaan bí yii: M làá dū tiwaŋgbeetikaal kí bíĺ dinibul nee nyɔkɔpu dí gbéetí kí lítí. Bibaatiibi nì bi-jipɔmbi, bi-kɔŋkɔnnaatɔb nì bi-bɔɔbi kɔkɔ làá kpú dicilpu.»

²²Ti-Dindaan nín lī puee sèé. «Dinibul diba làá nyānní ŋgan pú kí dāan̄. Ditimbuŋkpaandi diba kālìń nsan pu ki nyánní kitiŋ gbeennyɔkɔ ki dòoń.

²³Bi-bijanjaliibi ŋúb́ itɔfi nì ŋkpamu. Bi cáá ntoom kaa cáá disaasɔl. Bi-bìntindi bí kii tiŋku wookuee ní. Bi kā itaamu pu, ki lūtì mpɔn pu kí já nì sii Siiyɔn tiŋki.»

²⁴«Ti nín gbìl̄ an bɔtee, ti-wunti yɔ̄tì. Dinimbinaamandi kɔ́-ti fíŋfiŋ ní ti bíi jīǹ falaa kii unimpu un kā imatiŋween puee.

²⁵Ní taa nyā kí cù tisatin, kí taa nyā kí còom̀ adan pu, di sá yii unannanli bí ki kù binib. Dinyoondi bí an kɔkɔ pu[10].»

²⁶«Sii man nibul, dū kpɔsata kí pèen̄ kí nīn dɔ̄ ŋfantam poon ki bíntí. Kíĺ kí nīn bíi ŋáań dikpool koobiliŋ kii bi nín ŋáań dijipɔmbaabil kpool puee. Nín̄ gà ikpiisilan ki yáliŋkí. Di sá yii unannanli un làá nàan̄-see làá páatí kí jēetí a-pu dicilpu dicilpu.»

²⁷Yeereemii, m kāaǹ-si á nīn sá kii un cɔ́ŋkí tikútee kí ŋmā kí cɔ̄ŋkì m-nibul. A máaǹ kí cɔ̄ŋkì kí béé bi-bimbim.

²⁸Bi-kɔkɔ gáatì, baa ti ŋūǹ kí gíiǹní-bi, bi kúŋfí bi-jutiibi boon. Bi pɔ̄ɔ̄ kii tasa kúti àá kii tikúbɔnee ní. Bi-kɔkɔ sá binàanliibi ní.

²⁹Ŋfukum bíi fùkum̄ tikúti ń mántí tijɔkɔndi ń nyā. Ucaa bíi pɔ̄ɔntí kí gbá kí lēē tijɔkɔndi tin bí animbil puee, ama waa ŋúń. Tijɔkɔndi kaa là kí nyā.

³⁰Bi yíì binib gbanti yii, <Animbil ŋin kaa ti bí tibanee.> Tiŋman, ti-Dindaan dū-bi ki fá.