Read Ntcham Jérémie 7 Bible Online

Jérémie 7 - Ntcham bible

Jérémie 7

¹Tibɔti tin Unimbɔti nìn sòon̄ ki tùkū Yeereemiiyee sèé:

²Cùú yūĺ kunimbɔtidii punyɔkɔpu kí bāakì tibɔti nee: «Ní pīlifìmaan ti-Dindaan bɔti nee, nimbi Juuda yab bin dì kipunyɔkɔ nee ki kóò ki jáaḿ ti-Dindaanee.

³Ti-Dindaan Mpɔŋkɔdaan, Isirayeel yab Nimbɔtiu nín sòon̄ puee sɔ̀. Kpántímaan ni-bimbim nì ni-ŋáaǹtam, án nín làá ŋá pu ḿ nīn kóò ni-cee kitiŋ nee poonee.

⁴Ní taa nín̄ kùbitī ki lì yii: <Doo di sá ti-Dindaan Diiku, doo di sá ti-Dindaan Diiku, doo di sá ti-Dindaan Diiku.> Ní taa dū ni-mákal kí páań anyɔɔbuŋkiilkaa gbanti pu.

⁵Ní kpántí ni-bimbim nì ni-ŋáaǹtam. Ni nì ni-jutiibi kansikinee, ubɔ ń taa mùul̀ u-juti.

⁶Ní taa mùul̀ unicaan nì ditaŋkpiibil nì ukpiipu. Ní taa kpɔ̀ maanyiiba kitiŋ nee pu. Ní taa nín̄ jòó ki pá awaa ŋin làá cáá-ni kí kɔ́ǹ mbusunee boon.

⁷Niinee ní ḿ yàntī ní kàl̄ kitiŋ kin m nìn tīī ni-naanjab kí nīn cá abin abinee pu.

⁸«Ama ní ni dū ni-mákal ki ŋá tinyimɔmbɔti tin kaa bí tiba nee ni.

⁹Baaa! Ni yù, ki kù binib, ki ŋáań tilaakpaal, ki pùtī fám, ki tùutī talaalu ki tìì diwaal Baal, ki sáń ki pá awaa ŋin ni nì ŋi kaa cáá mpèé ŋubɔee boon.

¹⁰Míǹ boonee ní ní dāan̄ kí gbàan̄ m-nimbiin, kudii kun bi dūu sú-mee poon ki lì yii: <Ti ká difiil!> ní boonee ki gbíntìi nìkì ki tūǹ ntimbiil tuuŋŋi.

¹¹Kunimbɔtidii kun bi dūu sú-mee ní ni dūu kpántì kunaayudii naaa[11]? Too man nín wāĺ-ku puee dee.» Ti-Dindaan di lī míǹ.

¹²«Cùmaan Siiloo[12] circir paaŋŋu pu kí kpèè. Dooooyee, niin ní m nìn kóò. Ní kpèè, Isirayeel m-nibul toom puee, m nín ŋá mpaan gbanti puee.

¹³Too, man ni-Dindaan nín sòon̄ puee sɔ̀. Ni mun yīntì kii bimbee. M yōoǹ ŋyunti ki kpáafì-ni, ama ní naa pílifì, m yíiń-ni ní naa kíí-mi.

¹⁴Kpèè ni dū ni-mákal ki páaǹ kunimbɔtidii nee pu. Bi dū-ku ki sú-mi, ní man dū-ku ki tīī ni nì ni-naanjab. Too, m làá ŋá-ku kii m nín nìn ŋá Siiloo circir paaŋŋu puee ní.

¹⁵M làá dū-ni kí fá ndan kii m nín fá ni-nabiyaamu Eefiraayiim naantiibi puee ní.»

¹⁶«An puee sii Yeereemii, á taa gbàam̀-mi dinibul nee pu. Á taa ti mèè-mi bi-pu, kí taa ti tīminsì bi-pu. Á taa nīn kā m-pu, maa làá pīlifiǹ-si.

¹⁷Saa wāĺ tin kɔkɔ bi bí ki ŋáań Juuda timmun nì Jeerusaleem daŋŋi pueeee?

¹⁸Mbiyaamu là idɔ ní bibaatiibi kpà ŋŋmi, ní binaatiibi nùkù ŋyim kí ŋá kalaabi kí tīī yilpu Nimpubɔtiu. Ni féeń awaa nnyim ki gbítí m-ŋuul.

¹⁹Ti-Dindaan bālifì yii: <Mimmee man ní bi dàkafī yii bi ŋáań ikpitaaa? Bi ŋáań bi-ba ní, ní an sá bi-cooi!>»

²⁰«Too, m làá kpáatí m-ŋuukpaandi kí sìtī mpaan nee nì binib nì ipeel nì tisatin sufii nì tikpaajin pu. Di làá nīn bí kii ŋŋmi ŋun kaa kúùyee ní.»

²¹Ti-Dindaan Mpɔŋkɔdaan, Isirayeel Nimbɔtiu nín lī puee sèé: «Dūmaan ni-saraawɔkaabi nanti kí kūtì saraafantantiibi nanti pu kí ŋmɔ́maan ni-ba.

²²M nín nìn nyántì ni-naanjab kuyuŋun Eejipiti tiŋkinee, maa nìn tùkū-bi yii bí ŋá tiba. Maa nìn bí-bi yii bí ŋá bisaraawɔkaabi àá saraabi biba kí tīī-mi.

²³Ama m nìn kpáafì-bi yii: <Ní pīlifìmaan m-nyɔkɔ. Ni yaa ŋá míǹ, m làá nīn sá ni-Nimbɔtiu, ní nimbi ń nīn sá man nibul. Nóómaan nsan ŋun m cátì ki bíl̀-nee ní án nīn ŋān̄ ki tīī-ni.

²⁴Ama baa nìn pílifiǹ-mi, kaa kpōoǹ bi-tafal ki pílifì. Bi lēē kí nóó bi-landɔkɔkpitii. An nìn bàà sá bí fàtī bi-nimbiin kí túĺ-mee, ní bi fātì bi-boon ki tīī-mi.

²⁵Kí yòon̄ ŋwiin ŋun m nyántì ni-naanjab Eejipiti tiŋkin kí dāá sāā díǹee, m pée tūǹ baabadal m-tɔntɔnliibi bibɔnaatiliibi ni-cee ní kaa gbèentí.

²⁶Ama ní naa pílifiǹ-mi. Naa kpōoǹ ni-tafal kí pīlifì. Ni ŋá ŋyipɔn, ki ŋá tin jítiǹ ni-naanjabee.>

²⁷«Sii Yeereemii, a làá tùkù-bi tibɔti gbanti, ama baa làá pīlifiǹ-si. A làá dāá téeń kí yíiń-bi, ama baa làá kíí-si.

²⁸Tùkù-bi yii: <Kpèèmaan, ni sá ditimbundi din kaa pílifí di-Dindaan di-Nimbɔtiu nyɔkɔ, ní kaa fòol̄ u-saŋkiiyee ní. Tin bí deedeeyee kpíì ni-cee, ní ubɔ kaa ti sòoǹ ti-pu.>»

²⁹Ti-Dindaan bí yii: «Juuda nibul, Cā a-yikpiti tin dàkà yii a dū a-ba ki sú-mee kí fá, kí tóoń ŋkpiisilan ajoon ŋin yilpu kaa cáá timoolee pu. Di sá yii a sá dinibul din kɔ́ǹ man ni-Dindaan diŋuulee ní. An pu ní maa ti là kí wāl̀-si ki dū-si ki fá.»

³⁰Ti-Dindaan bí yii: «Juuda yab ŋá tin kaa ŋān̄ee m-nimbiin. Bi cáá bi-waaŋi ŋin sá ntimbiilee ki kɔ́ǹ Kudii kun bi dūu sú-mee poon ki kɔ́ǹ-ku tijɔkɔndi.

³¹Been-Inɔɔm tantakalinee, bi bɔ́ntì ŋwaapaan ŋun bi yíì Toofeetee. Niin ní bi cáá bi-jipɔmbi nì bi-bisalib ki tòotī ki wù ŋŋmi ki ŋáań saraabi[13]. Maa pée tīī-bi mara yii bí ŋá míǹ dalba dalba, kaa kpáàa dākafì an pu ŋwindal.»

³²Ti-Dindaan bí yii: «Iwiin bí ki dòoń, baa dāa gíti yíì mpaan gbanti yii: <Toofeeti> àá <Been-Inɔɔm tantakal>, ama <dipɔ̀fil tantakal>. Niin ní bi làá dāá síb́ anikpil, di sá yii mpaan kaa dāa gíti bí laaba bí síb́-ŋi.

³³Inoon nì ipeel làá dāá gbáb́ kí bìin̄ anikpil gbanti pu ki jīǹ, ní ubɔ dāa kpá kí jà-i.

³⁴M làá dāá yàntī Juuda timmun nì Jeerusaleem daŋŋi pu ifaal nì dipɔɔpindi laŋyi ń ŋmīĺ. Ubɔ kaa dāa gíti gbìl̀ animpucaŋgbiil pu. Di sá yii kitiŋ làá dāá kpántí adigbuŋkati ŋma ní[14].