Read Ntcham Lamentations 1 Bible Online

Lamentations 1 - Ntcham bible

Lamentations 1

¹Ba di yì-tì ní kitiŋ kin poon binib nìn nyìkēe ŋá kii ukpiipu un bi dūu fée. Kíǹ di nìn nyáń diyindi atimbun kɔkɔ kansikin, kpèè, kì kpántì uyumbu. Kíǹ di nìn sá kii bɔtiisal ki tɔ́kɔ́ ntimu kɔkɔ pu.

²Kì cáá tinyati kɔkɔ ki sūǹ ní, ní nnyinnyim pùub̀ ki-taŋkpunti. Bin nìn néeń-kèe kansikin báà ubɔ kaa ŋméeǹ-kì. Ki-bɔɔbi kɔkɔ dū-kì ki fá ní ki kpántì ki-nannanliibi.

³Bi cúú Juuda tiŋki yab kɔkɔ ki cūnnì kuyuŋu kinicantiŋin, isaa jíń-bi tikpil niin. Bi cūtìi kɔ́ dinibul diba pu ní kaa ká laaba kí kàl̄. Bin bí ki jì bi-boonee tin cúú-bi nsanni bi bí kunimbaau poon.

⁴Isan in bi dì ki cá Siiyɔn tiŋkinee kā dikpool, kun puee báà ubɔ kaa ti cá ki jīǹ jiŋaalib. Ki-punyɔmmu bíil̀, ní ki-saraaŋaliibi bí iyaliŋki poon. Ki-sapɔmbi bin kaa nyí uninjee bí kunimbaaun. Tíǹ gbanti kɔkɔ kpántì ntuntun ní ki tīī Siiyɔn yab.

⁵Bi-nannanliibi jáń ki pɔ́ɔkiǹ-bi, bi-pulincɔntiibi kā nì ŋgbansɔŋfi. Bi-kpitii wíiŋŋu puee, ti-Dindaan yāntì takaasi bíi jīǹ-bi. Bi cúú bi-biyaamu ki cūnnì unannanli nimbiin kuyuŋu ní ki wɔ́b́-bi.

⁶Siiyɔn kā ki wāĺ ní bi yōoǹ tin sá u-nyootee ki cáa búntì. U-kàliŋkpilib kpántì kii ipeel in kaa ti kāntí kumoou kí ŋmɔ́ee. Baa ti ŋūǹ kí sāǹ kí ŋmátí bikpambi bin bíi jì-bee ŋaan.

⁷Nnaabu jéetì Jeerusaleem pu ní kàa ti nyí laakin kì làá cùee, ní ki téetí tigaajawan tin kɔkɔ kì nìn cáá dooooyee pu. Ŋyunti ŋun ki-niwul kɔ́ binannanliibi ŋaanee, báà ubɔ kaa dɔ́miń kí jòoń-kì. U-nannanliibi nín ká kì lítì míǹ kaa ti bí tibanee ní bi bí ki lāā.

⁸Jeerusaleem yab ŋá ikpitikpaan ní, an pu ní kì kpántì titampummool. Bin kɔkɔ nìn tīī-kì disíndee kíǹ ki kpèé-kì fám, kun puee bi ká ki-cooi. Ní kíǹ ki-ba sūǹ ki yáliŋkí ki fātì ki-boon ki tīī.

⁹Ikpiti jɔkɔnti táká ki-bɔkutil, kaa dākafì kun ní an làá cáań boonee. An ŋá-kì maamaaci kì nín lítì miŋyee pu, ní ubɔ kaa bí kí ŋméeǹ-kì. U bí yii: «M-Dindaan, kpèè isaa in poon m bée, m-nannanliu bí ki gà u-bindi u-pɔŋŋu pu.»

¹⁰Binannanliibi fúkúl̀ Jeerusaleem gaajawanti kɔkɔ pílpil. Jeerusaleem yab ká anibul aba yab dɔ́miń ki kɔ́ circir kɔŋkooŋŋun. Ama ti-Dindaan, a nìn yíì an nibuliŋee bí taa kɔ́ a-nikitil kansikin.

¹¹Ki-nib bí ki yáliŋkí ki nyàab̀ tijin. Bi ŋúb́ bi-gaajawammɔntiiti kí kpántí tijin kí jī kí ŋmátí. «M-Dindaan kpèè takaasi un poon m bée.»

¹²Nimbi bin còom̄ ki jītí dooyee, kpèèmaan ubɔ naabuŋu bàn̄ man yɔu nee jutaaa? Ubɔ naabuŋu bàn̄ ŋun poon ti-Dindaan kɔ́ǹ-mi u-ŋuul wiiŋŋu dal naaa?

¹³Yilpu ní u tɔ́ń ŋŋmi, ní an kɔ́-mi ki tin bàn̄ m-kpabiŋ. U píĺ kutaliŋŋu m-saŋŋu pu, u gíiǹ-mi boon. U nyántì-mi m kíǹ ki bí m-baba, baabadalee m bí iween poon ní.

¹⁴U kpáfì m-kpitii ki dūu bóob́ kpancikil, nì u-ŋalii ní u dūu bóob́, ní ki dūu léeǹ m-neen. Ti-Dindaan bātì m-pɔŋŋu pu, ní ki dū-mi ki líiǹ binib bin nimbiin maa ŋūǹ kí fālifèe ŋaan.

¹⁵Ti-Dindaan nyántì bibaatandambi bin nìn bí m-ceeyee. U bɔ́ntì dijanjakitil ki tɔ́ m-pu bí dāá nà m-nipɔmbi kunaau. Ní bi dɔ́miń ki nàn̄-bi kii bi nín nà asubil ki còol̀ ŋkpam puee. Míǹ ní ti-Dindaan nàn̄ Juuda yab bin bí kii usapɔɔn un kaa nyí uninjee.

¹⁶Tí nee kɔkɔ pu ní m bí ki sūǹ m-nimbiliŋ dēē nnyinnyimin. Kun puee un bàà làá ŋméeǹ-mi, kí tīī-mi dimaŋfalee dū-mi ki fá. M-biyaamu wáŋkì m-ŋaan, kun puee m-nannanliu pɔ́ɔkiǹ-mi.

¹⁷Siiyɔn tāntì u-ŋalii ki gbāam̀ ki gīī, ama ubɔ kaa bí kí cúú-u kí sɔ̄ŋkì u-pɔbil. Ti-Dindaan tīī mara yii Jaakɔb nannanliibi ń màntīí gíb́-u ajan kɔkɔ pu. Jeerusaleem kpántì kii titampummoolee binib kansikin.

¹⁸Ti-Dindaan nín ŋá puee sá deedee, di sá yii bi-marab ní waa là. Anibul kɔkɔ pīlifìmaan! Kpèèmaan iween in poon m bée. Bi cúú m-naacimpɔmbi nì m-bisalib ki cūnnì kuyuŋu.

¹⁹M bàà yíiń bin m nìn néeńee, ní bíǹ kaa ti là m-bɔti. M-saraaŋaliibi nì m-kpilib kpíì kitiŋin, ŋyunti ŋun bi nìn bíi nyàab̀ tijin kí jī kí ŋmátée.

²⁰M-Dindaan, kpèè mbusu un kɔ́-mee, an cúú m-poon nai ki kūtì. M-naŋki nyáń nì m-ba, kun puee m jáń nì si an gíti lákatì. Kitàataajiki kūū m-biyaamu mmɔŋki ní kudiinee, a lì kii bitaŋkpiibi dumpuee.

²¹Bi gbìl̄ m nín dùǹee, ama ubɔ kaa dòoń kí sɔ̀ŋkì m-pɔbil. M-nannanliibi kɔkɔ gbìl̄ nnaabu ŋun jéetì m-puee, ní an mɔ́ɔkiǹ-bi a nín ŋá-mi puee pu. A yāntì ŋwiin ŋun a yóoǹee bāań[1], yàntī tin poon m bí nee ń bàń bi mun pu míǹ.

²²Kpèè ntoom min kɔkɔ bi ŋée, kí ŋá-bi kii man kpitii puee, a nín ŋá-mi puee! Di sá yii m bí iyaliŋki poon ní an kaa cáá digbèendi.