Read Ntcham Lamentations 4 Bible Online

Lamentations 4 - Ntcham bible

Lamentations 4

¹Ba pu ní sindaariya bɔ̄ntì míǹ kaa ti jìl̀? Ba pu ní sindaariyamɔnti gáń míǹ? Ba pu ní ataŋkpee ŋin bi dūu sú Unimbɔtee dɔ̄ ki yàl̄ an kɔkɔ pu míǹ?

²Ba pu ní Siiyɔn bɔtiijab bin náań nì sindaariyamɔntee kpántì kii kuyɔkɔu booŋŋi ŋin uyɔɔmaati dū u-ŋalii ki máńee míǹ?

³Kpèèmaan iŋɔkɔ, i tìì i-biyaamu dibiil i ŋáaḿ. Ama man nibul sá ubinaati un cáá ntoomee, àá kii taataabi bin bí kuteeunee ní.

⁴Nnyinnyoo cúú kinaŋgbammaŋ ki-limbil nákáǹ ki-nyɔkɔ poon ki kūń. M-biyaamu bàlifī tijin pu ubɔ kaa tìì-mu.

⁵Bin nìn jīǹ tijimmɔntiilee bí ki kúù ŋkùm adan pu. Bin bi nìn lōō nì bisatamɔntiibee dɔ̄ titampummoolin.

⁶M-nibul yab kpitii wīikí ki jítiǹ Soodoom yab yai. Bi nìn nāaǹ kitiŋ gbanti dicilpu dicilpu ní ubɔ kaa ŋúń ki ŋá tiba[5].

⁷Siiyɔn yab bɔtiijab nìn jìl̀ kii ntaayimee ní, ní bi-wuŋgbaŋŋu pīiǹ káŋkaŋ kii nnaabiimee. Bi-wunti nìn jɔ̀m̀ kii ataŋkpanyaan ŋin bi yíì kɔrayee ní bi-nimbiiŋyi jìl̀ kii ataŋkpanyaan ŋin bi yíì safiiree.

⁸Ama kɔŋkɔnnee bi-nimbiiŋyi bɔ̄ntì kútí kuti kii dinaŋkansimbɔndee. Bi yaa ká-bi adan puee baa ti nyí-bi, bi-wuŋgbaŋŋu kūń kii ndɔee ní.

⁹Á kpú dikɔ̀ndin sɔ́ǹ ŋkùm ń kpɔ̀-si, á páĺ tijin kpátam pu.

¹⁰Dinimbinaamandi din jéetì m-nibul puee yāntì binimpoobi bin kaa mɔ̄ bi-biyaamu puee tɔ́kɔǹ-mu ki ŋmɔ́[6].

¹¹Ti-Dindaan kpáatì u-ŋuukpaandi kɔkɔ, ki tūū Siiyɔn tiŋkin ŋŋmi ní an wùn̄ ki tin kpáaǹ ki-nyeel.

¹²Ubɔti ubɔ àá unil ubɔ kitiŋ pu kaa fōō ki kíí yii unannanli ŋūǹ kí dī Jeerusaleem punyɔmmu pu kí kɔ́.

¹³Unimbɔti bɔnaatiliibi kpitii nì bisaraaŋaliibi yìntitam di yì nnaabu gbanti, kun puee bi kūū bi-timmun maanyiibab.

¹⁴Ama kɔŋkɔnnee, bi còom̄ ki táfí kii bijɔfubee, fatiku táká-bi. An puee ubɔ kaa máaǹ kí gbēē bi-wampeeŋkaati.

¹⁵Bi tátí ki sòoǹ bi-pu yii: «Kàkatīmaan kí wàatī-bi, bi kɔ́ tijɔkɔndi! Kàkatīmaan! Kàkatīmaan! Ní taa gbēēmaan-bi[7].» Bi bíi sáń kaa nyí laakin bi cée. Ama ní atimbun ŋíǹ kíǹee lì yii: «Baa ŋūǹ kí kàl̄ timbi cee doo!»

¹⁶Ti-Dindaan u-ba kaa ti là kí wāl̀-bi ní ki jìn̄-bi ki yàl̄ an kɔkɔ. Niinee baa ti dū bisaraaŋaliibi ki yíiń tiba, kaa súń bijaŋkpilib mun saai.

¹⁷Ti kpēē a-pu á dāá jòoń-ti ti-nimbiliŋ lóoĺ. Ti gāā isupaa ki kāl̀ ki cíitì ditimbundi din kaa ŋūǹ kí fīī-tee ń bàà dāan̄[8].

¹⁸Ti-nannanliibi cɔ́ŋkí ki kpèé ti-tabɔbiliŋ, taa ti ŋūǹ kí nyā ti-mɔŋkijaai pu. Ti-kúntitam tóobiń tiŋman, ti-wiiŋŋu sāā.

¹⁹Bin jì-tee yáb̀ ki jítiǹ ukaabu un ŋàaǹ yilpuee. Bi pá ti-boon ki jì-ti ajoon pu, ki cūtìi nɔ̄kɔǹ kuteeun ki cí-ti.

²⁰Un ti-Dindaan lēē ki kāaǹ ú nīn sá ti-bɔtiuee, un di yì ti-maŋfalee, bi cúú-u. Úǹ pu ní ti nìn sòoǹ yii: «Un pu ti làá ŋùŋfì atimbun kansikinee sèé.»

²¹Eedoom yab, nimbi bin kóò Uusi tiŋkinee, ni ŋūǹ kí nīn fàal̀ ki ŋōō! Ama ni mun làá nyɔ̀ ti-Dindaan ŋuul kɔŋkɔnnyɔkaau poon. Ni làá gbí ní kí lòotī ki dɔ̄ dicancaŋgbeel.

²²Siiyɔn tiŋki, a-tafadaaldi kúntì, baa làá ti cùnnì-si kuyuŋu. Ama nimbi Eedoom yab, ti-Dindaan làá dáaĺ ni-tafal ni-yìntitam pu, ní kí nyāntí ni-kpitii kí páań mpaampiin pu.