Read Ntcham Baruch 1 Bible Online

Baruch 1 - Ntcham bible

Baruch 1

¹Baruuki nín ŋmàn̄ tibɔti tin kugbɔŋu nee poon Babiloon tiŋkinee sɔ̀. Baruuki gbanti nìn sá Neeriya jipɔɔn ní ki sá Maseeyasi naantiiu. Maseeyasi[1] nìn sá Sideesiyasi jipɔɔn ní ki sá Asadiyaasi naantiiu ní Asadiyaasi sá Eelikiyasi jipɔɔn.

²Babiloon yab nín nìn jáń ki fōō Jeerusaleem tiŋki ki tūū-kì ŋŋmee biŋŋmooŋmootiil uŋmaŋmooŋmooti[2] winluluútiŋu dal ní bi ŋmàn̄ kugbɔŋu gbanti.

³Baruuki nìn kàan̄ kugbɔŋu nee Yooyakiim jipɔɔn Yeekooniya[3], Juuda bɔtiu nì samaa un kɔkɔ nìn pée dɔ́miń kí pīlifì tin ŋmàn̄ ki kā kugbɔŋu gbantinee nimbiin.

⁴Bin kɔkɔ nìn pée kóò Babiloon tiŋkin, Suudi mɔɔgbaŋŋi caŋinee kɔkɔ nìn dɔ́miń, kí yòon̄ ŋwaamu kí cáá sāā bikpaambi, an dàkà yii bikàliŋkpilib nì bɔtiijab nì bikpilib nì samaa kɔkɔ.

⁵Binib gbanti nìn sūǹ, ki bōob̀ kinyɔkɔ ní ki nìn mèé ti-Dindaan.

⁶Míǹ boonee, bi nìn tɔ́ animbil. Báà ŋma nìn tɔ́ ki nóó nì u-ŋmam ní.

⁷Bi nìn cáá animbilee ki cūnnì Jeerusaleem ki tīī usaraaŋakpil Yooyakiim, Eelikiyasi jipɔɔn nì Saluum naantiiu. Animbilee nìn sá ki tīī bisaraaŋaliibi bin kíǹee mun nì samaa un kɔkɔ nìn bí u-cee Jeerusaleemee.

⁸Kí wàatēe, uŋmal un bi yíì Siifanee iwiin saalaa dalee, Baruuki nìn yōoǹ tiwan tin nìn bí ti-Dindaan Diikun bi nìn yōoǹní circir kɔŋkooŋŋu poonee kí gíiǹ Juuda tiŋkin. Joosiyaasi jipɔɔn Sideesiyasi, Juuda bɔtiu di nìn yāntì bi dū animbil kúti ki mɔ́ɔ́ tiwan gbanti.

⁹Nì mimmee, Babiloon bɔtiu Neebukadineesaar nìn cúú Yeekooniya nì bikpilib nì ŋŋal pu tɔntɔnliibi nì bikàliŋkpilib nì samaa kɔkɔ Jeerusaleem tiŋkin ki cūnnì kuyuŋu Babiloon tiŋkin.

¹⁰Bin bínní Babiloon tiŋkin kuyuŋuee nín nìn ŋmàn̄ tibɔti tin ki tīī Jeerusaleem yabee di sá yii: «Ti tú bí cáań-ni animbil. Ní dū animbil gbanti kí dā tiwaŋkuti kí ŋá bisaraawɔkaabi nì ikpiti pɔ̄tam saraabi, ní kí lēē kí dā talaalutuukaa mun. Ní ŋá saraabi gbanti ti-Dindaan ti-Nimbɔtiu saraafaŋŋu pu.

¹¹Ní mèè kí tīī Babiloon bɔtiu Neebukadineesaar nì u-jipɔɔn Baltasaar[4]. Ní mèè Unimbɔti yii ú yàntī bí kàl̄ kitiŋ pu kí yúntí kii kutaa kun dàn̄ kitiŋ pu nee nín làá yúntí puee.

¹²Niinee ti-Dindaan làá tīī-ti mpɔn, ní kí ŋúbití ti-nimbiliŋ, án nín làá ŋá pu Babiloon bɔtiu Neebukadineesaar nì u-jipɔɔn Baltasaar ń nīn wúń ti-puee. Ti làá nīn bí bi-ŋaan an yúntí ní bí dàkà-ti kulaŋŋaŋfitiiu.

¹³Ní mèè ti-Dindaan ti-Nimbɔtiu kí tīī ti-mun. Di sá yii ti yīntiǹ ti-Dindaan ti-Nimbɔtiu. Ki dāa sāā nì díǹ nee, diŋuul nì mbum min u fōō ti-puee dáá gbíntìi dàn̄ ti-pu.

¹⁴Ní kàaǹ kugbɔŋu kun ti tú bí cáań-ni nee, kí bìitī ni-kpitii pu ti-Dindaan Diikun. Ní kàaǹ-ku tibìń jiŋaaliu yuntiŋu, nì ŋyunti ŋun an yaa kítì ní kàaǹ-kuee».

¹⁵Ní lì yii: «Ti-Dindaan ti-Nimbɔtiu sá deedeedaan ní, ama timbee, icoo di máaǹ kí cúú-ti, kii an nín bí pu díǹ nan ní! Tiŋman icoo sá ki tīī timbi Juuda yab nì bin kóò Jeerusaleem tiŋkinee,

¹⁶nì ti-bɔtiibi nì ti-kpilib nì ti-saraaŋaliibi nì ti-bɔnaatiliibi nì ti-baabi.

¹⁷Di sá yii ti yīntiǹ ti-Dindaan.

¹⁸U nín bí yii tí nīn nóó marab bin u tīī-tee, taa yúliǹ-u deedee ní kaa pílifì úǹ ti-Dindaan ti-Nimbɔtiu nyɔkɔ.

¹⁹Kí yòon̄ ŋwiin ŋun ti-Dindaan nyántìń ti-naanjab Eejipiti tiŋkin ki dāa sāā díǹ nee, taa yúliǹ ti-Dindaan ti-Nimbɔtiu deedee. Tin ti pée ŋáańee, taa dàkafī ní kaa pílifí tin u sòoǹee[5].

²⁰An pu ní nnaabu nì mbusu dū bi-ba ki yá ki nákáǹ-ti kii ti nín wāĺ an bí-ti díǹ pu nan ní. Ŋwiin ŋun u nyántìń ti-naanjab Eejipiti tiŋkin kí dū kitiŋ kin poon ní nnaabiim nì tisiil còol̀ee kí tīī-tee, ti-Dindaan tɔntɔnliu Mooyiisi nìn sòon̄ mbusub gbanti pu[6].

²¹U nìn dū u-bɔnaatiliibi ki túnní ti-cee, ama taa nìn pílifì tin ti-Dindaan ti-Nimbɔtiu nìn dī bi-pu ki sòon̄ nì tee.

²²Ama báà ŋma nìn nóó u-pɔɔkpitil landɔkɔi ní, ki tòotī awaa. Báà ŋma nìn pée ŋáań tin kaa kítèe ní ti-Dindaan ti-Nimbɔtiu cee[7].»