Read Ntcham Baruch 2 Bible Online

Baruch 2 - Ntcham bible

Baruch 2

¹«Niinee, ti-Dindaan nín nìn sòon̄ nì timbi nì ti-tiŋki Isirayeel bɔsoonliibi nì ti-bɔtiibi nì ti-kpilib nì Isirayeel yab nì Juuda yab puee, an ŋá míǹ.

²U nìn yāntì nnaabukpaan jéetì Jeerusaleem tiŋki pu. Nnaabu gbanti juti kaa nìn pée jítì kitiŋ pu laaba ki ká. Ama an nìn ŋmàn̄ ki kā Mooyiisi Marau gbɔŋku poon.

³Nnaabuee nìn pɔ̄ɔ̄ áli gba ti dāa ŋmɔ́ ti-jipɔmbi nì ti-bisalib[8].

⁴Ti-Dindaan nìn dū-ti ki líiǹ abee ŋin kɔkɔ māntìi tú-tee. Míǹ ní anibul ŋin māntìi tú-ti ti-Dindaan dū-ti ki tɔ́ bi-kansikinee nìn sīī-ti ki kɔ́ǹ-ti icoo.

⁵An nín bàà sá tí nīn sá bikpilibee, timbi di kpántì iyumbu, kun puee ti yīntiǹ ti-Dindaan kaa pílifì u-nyɔkɔ.

⁶«Ti-Dindaan ti-Nimbɔtiu sá deedeedaan ní, ama timbi nì ti-naanjab di máaǹ kí jī icoo kii an nín bí-ti díǹ pu nan ní!

⁷Ti-Dindaan nín nìn sòon̄ yii inaabu in kɔkɔ làá jēetí ti-puee lafun jéetì ti-pu.

⁸Taa nìn mēē ti-Dindaan ú tūtuǹ-ti báà ŋma ń fàtī u-boon kí tīī u-pɔɔkpitil landɔkɔi.

⁹Ti-Dindaan mun nìn bɔ́ntì inaabu gbanti ki tɔ́ ti-pu, di sá yii ti-Dindaan nín nìn tīī-ti mara yii tí ŋá puee nìn sá deedee ní.

¹⁰Ama taa nìn pílifiǹ-u ŋyunti ŋun u nìn bíi tùkù-ti yii tí nóó marab bin u tīī-tee.»

¹¹«Ti-Dindaan, Isirayeel Nimbɔtiu, a dū a-ŋal pɔŋŋu nì tidaandi nì maamaacib nì mpɔŋkpaan nì atuŋkpaan ní ki nyántìń a-nibul Eejipiti tiŋkin. A nìn dàkā un ní a sée, kii ti nín wāĺ an bí díǹ pu nan ní.

¹²Ti-Dindaan ti-Nimbɔtiu, ti béè yii ti ŋá ikpiti, ti ŋá tin kaa bí deedeeyee, ki yīntiǹ a-marab kɔkɔ.

¹³Yàntī a-ŋuul ń sɔ̀ŋkì ti-pu, di sá yii taa ti náaǹ atimbun ŋin a jìn̄-ti ti yàl̄ ki kɔ́ kɔ́ee kansikin.

¹⁴Ti-Dindaan, pīlifì ti-wimmeem nì ti-gbaamii. Sii a-ba puee, fīī-ti ní kí yàntī bin cúú-ti kuyuŋuee ń dàkà-ti kulaŋŋaŋfitiiu.

¹⁵An yaa ŋá mimmee, kitiŋ pu nib kɔkɔ làá béé yii sii di sá ti-Dindaan ti-Nimbɔtiu, ní timbi Isirayeel nibul sá a-yab[9].

¹⁶Ti-Dindaan, kpèeń-ti doooo a-circir kɔŋkooŋŋun kí dàkafì ti-pu. Kpòon̄ a-tafal kí gítí ti-watil pú kí pīlifiǹ-ti.

¹⁷Ŋúbití a-nimbiliŋ kí kpèè-ti. Ti-Dindaan, an kaa sá bin kpíì ki dɔ̄ ditaŋkpiilinee, bíǹ bin kaa ti cáá kufoouee di ŋūǹ kí nyɔ̄ŋkì-si kí béé a nín sá deedeedaan puee[10].

¹⁸Ama bin ŋūǹ kí nyɔ̄ŋkì-si kí béé a nín sá deedeedaan puee di sá bin bí kunimbaaun, ki còom̄ ki bōō kaa ti cáá mpɔnee, bin kpèé pùuu ní ŋkùm cáá bi-nammuee.

¹⁹«An puee, ti-Dindaan ti-Nimbɔtiu, ti yaa dɔ́miń a-cee ki mèé ki gbàam̄-see, an kaa sá ti-baabi àá ti-bɔtiibi deedee tuuŋŋi pu.

²⁰Di sá yii timbi pu ní a-bum nì a-ŋuul jéetì. A nìn dūu dī a-tɔntɔnliibi bibɔnaatiliibi pu ki sòon̄-tì ki lī yii:

²¹<Man ni-Dindaan nín sòon̄ puee sèé. Ní sìntī ni-ba taapu kí tɔ̄ ditundi kí tīī Babiloon bɔtiu. Niinee ni làá ŋmā kí kàl̄ kitiŋ kin m tīī ni-naanjabee ni[11].

²²Ama ni yaa yíì kaa sīntiǹ ni-ba ki tīī Babiloon bɔtiu, kii m nín bí yii ní ŋá pueeyee,

²³m làá yàntī ní taa ti gbìl̄ Juuda nì Jeerusaleem timmun dipɔɔpindi nì jiŋaal laŋyi nì dipɔɔpindi kuŋkuuntii nì inimpucanlan pu. Kitiŋ kɔkɔ làá dāá kpántí ataŋkpakpuku ŋma, ní báà ubɔ kaa ti làá nīn kóò ki-pu[12].>

²⁴«Ama taa nìn pílifiǹ-si ŋyunti ŋun ní a nìn bíi tùkù-ti yii tí sìntīǹ ti-ba taapu kí tīī Babiloon bɔtiuee. Niinee ní a yāntì tin a nìn dī a-tɔntɔnliibi bibɔnaatiliibi pu ki sòon̄ee yii: <Bi làá nyāntí ti-bɔtiibi nì ti-naanjab kpabiŋ bi-kaakuliŋinee>, an ŋá míǹ.

²⁵Ti-naanjab nì ti-baabi nìn kpíì falaakpaan poon ní. Ŋkùm nì kujaaun nì kuyuŋun ní bi nìn kpíì. Ní bi nyántì bi-wunti bi-kaakuliŋin ŋwìiń gbáà-tì ŋwiimpu ní tiwool kóò-tì kunyeeu[13].

²⁶Ní kudii kun bi nìn dūu sú-see, a yāntì ku kpántì adigbuŋkati ŋma kii ti nín wāĺ-ku díǹ pu nan ní. Isirayeel nì Juuda nib kpitii pu ní a ŋá míǹ.

²⁷«Ama ti-Dindaan ti-Nimbɔtiu, a dàkā-ti a-laŋŋaŋfitiiku nì a-poommɔŋŋu.

²⁸A nìn dī a-tɔntɔnliu Mooyiisi pu ki sòon̄ tin bí nee, ŋwiin ŋun a nìn bí-u yii ú ŋmà a-Marau Isirayeel yab nimbiinee. A nìn lī yii:

²⁹<Ni yaa kaa pílifiǹ-mee, ni nín wīikí pu tikpil díǹ nee, ni làá dāá kíń fiii ní atimbun ŋin m làá dāa jà-ni ní yàl̄ kí kɔ́ kɔ́ee kansikin.

³⁰Di sá yii m nyí ni nín kaa làá pīlifiǹ-mee, kun puee ni sá pɔɔgaatib ní. Ama laakin bi làá dāá cùnnì-ni kuyuŋuee, ni làá dāá dàkafì,

³¹ní kí béé yii man di sá ni-Dindaan ni-Nimbɔtiu. M làá dāá tīī-ni dipɔbil din pɔ̀fèe nì atafal ŋin gbìl̀ tibɔtee.

³²Kitiŋ kin poon bi làá dāá cùnnì-ni kuyuŋuee, ni làá dāá gāā ilan kí nyɔ̄ŋkì-mi ní kí téetí m-pu.

³³Ni làá dāá téetí tin bāań ni-naanjab bin nìn yíkì ki jáń nì man ni-Dindaanee pu. Naa làá dāá nīn gíti sá pɔɔgaatib, ni làá dāá fá ni-tuŋkpitiŋ.

³⁴Niinee ní ḿ dāá gíiǹní-ni kitiŋ kin m nìn pūtì ki pōoǹ ni-naanjab Abraam nì Isaaki nì Jaakɔbee pu, kí dāá fàtīí kpántí ni-yaka. Maa làá dāá gíti bàtī ni-wíiŋŋu pu, ama m làá dāá yàntī ní bùtī.

³⁵M làá dāá pòon̄-ni dipoondi din làá nīn bí ki cá talkuee. M làá dāá nīn sá ni-Nimbɔtiu, ní nimbi ń nīn sá m-nibul. Maa làá dāá gíti nyāntí m-nibul Isirayeel yab kitiŋ kin m tīī-bee poon kí cùnnì-bi kuyuŋu[14].>