Read Ntcham Baruch 3 Bible Online

Baruch 3 - Ntcham bible

Baruch 3

¹«Ti-Dindaan Mpɔŋkɔdaan, Isirayeel Nimbɔtiu, an sá nì kinaŋ kin bí kunimbaaunee nì dipɔbil din bíil̀ee ní ti bíi kūuntí ki yíì-si nee.

²Ti-Dindaan, sɔ̄ ti-saai kí pīlifiǹ-ti, di sá yii ti yīntiǹ-si.

³Siiyee, a sá un pée bée ní jaanjaan, ama timbee, ti pée wáŋkì ní kɔkɔ!

⁴Míǹ puee ti-Dindaan Mpɔŋkɔdaan, Isirayeel Nimbɔtiu, pīlifì timbi Isirayeel yab bin bí kii bitaŋkpiibi nee wimmeem. Ti-Dindaan ti-Nimbɔtiu, ti sá bin yīntiǹ-si kaa pílifiǹ-see biyaamu ní. An pu ní inaabu dū i-ba ki yá ki nákáǹ-ti.

⁵Á taa ti téetí ti-naanjab yìntitam pu, ama ŋyunti nee poonee, á téetí a-pɔŋŋu nì a-yindi pu.

⁶Tiŋman, sii di sá ti-Dindaan ti-Nimbɔtiu, ní ti làá nīn nyɔ́ŋkí-si, ti-Dindaan.

⁷An pu ní a dū tifaandi ki ŋá ti-pɔbiliŋin tí ŋmā kí yíiń-si. Ti nín bí kuyuŋu kun poon nee, ti làá nyɔ̄ŋkì-si, di sá yii ti cúú atuŋkpiti ŋin ti-naanjab nìn ŋá ki yīntiǹ-see ki lēē ti-pɔbiliŋin ki wāatì ti-ba.

⁸Díǹ pu nee, ti bí kuyuŋun, ntimu mun a jìn̄-ti ti yàl̄ ki kɔ́ kɔ́ee poon, ní bi ŋúb́-ti ki sìí ki tòó-ti mbusu. Ti-Dindaan ti-Nimbɔtiu, ti bíi fòol̄ ti-naanjab bin nìn fātì bi-boon ki tīī-see yìntitam tafadaaldi dee.»

⁹Isirayeel yab, pīlifìmaan marab bin tìì dimaŋfalee. Kpòom̄maan ni-tafaliŋ kí pīlifì kí béé kí nīn gàntī tibɔti.

¹⁰Isirayeel yab, an dī mana ní ni bí ni-nannanliibi tiŋkin ní? An dī mana ní ni kā kinicantiŋin ki púĺ ní?

¹¹Ba pu ní ni gbēē anikpil ki kɔ́ tijɔkɔndin ní? Ba pu ní ni kútì bin còom̄ ki cá ditaŋkpiilinee pu ní?

¹²Kun yì-tèe di sá yii ni dū iciin nyeel ki fá.

¹³Ni yaa bàà nóó Unimbɔti saŋŋuee, ni bàà làá nīn bí ŋgbansɔŋfin ki nīn cá jaanjaan.

¹⁴Ní bīfì kí béé laakin ní dinyil nì mpɔn nì dinimbiŋubitil bée. Niin ní ni làá béé laakin mmaŋfafɔkɔn nì dimaŋfal bée, laakin dipɔɔpindi nì ŋgbansɔŋfi bée[15].

¹⁵Ŋma di ká laakin Iciin kóòyee? Ŋma di kɔ́ laakin i kpáafí i-gaajawantee?

¹⁶Atimbun bɔtiibi bí la? Bin nìn tìì ipeel marabee bí la?

¹⁷Bin nì inoon nìn gbíiĺee bí la? Bin nìn cáá tigaajati an kaa cáá kigbèenlaŋ, ki nìn kpáafí animbil kúti nì sindaariya bin pu binib nìn mákée bí la?

¹⁸Bin nìn cáá animbil ki mɔ́ɔ̀ tiwan, ní bi-landɔkɔŋu kā an pu, ama ní baa ti kāntí bi-tuuŋŋi gbanti tabɔbiliŋee bí la?

¹⁹Bi wáŋkì, bi nín sìntī ditaŋkpiilin, ní biba mun fōō bi-paaŋŋu.

²⁰Bi màl̄ binipɔmbi ní bíǹ kāl̀ kitiŋ pu, ama baa ká Iciin saŋŋu.

²¹Baa ŋúń ki ká Iciin saŋyi ní kaa dū i-bɔti ki páb́ bi-ba. Mbiyaamu kākatì mu-ba ki wāatì mu-baabi saŋŋu.

²²Ubɔ kaa gbìl̄ bi sòon̄ Iciin pu Kanaan tiŋkinaaa, kaa tí wál̀-i Teeman tiŋkin mun[16].

²³Ki kpáaǹ Agaar[17] naantiibi bin nìn nyàab̀ Iciin kitiŋ puee, Maran nì Teeman yab nyampoobi bin tìiǹ itiin ki nyàab̀ dinyilee kaa ŋúń ki ká Iciin saŋŋu ki dāa nín téetí i-sàmbiyaamu pu.

²⁴Isirayeel yab, kpèèmaan ti-Dindaan diiku nín wāā puee! Duulinya un sá u-yɔuee wāā ní!

²⁵U wāā ní kaa cáá kigbèenlaŋ, u cáá mpúun ní ubɔ kaa ŋūǹ kí ŋmàntī-u.

²⁶U-pu ní bi màl̄ tijawɔkɔl, tin nìn nyáń diyindi njamin ki nìn yáà ki nyí kujaau bɔti tiŋanee[18].

²⁷Ama an kaa sá bíǹ ní Unimbɔti lēē kí dū Iciin saŋŋu kí dàkà.

²⁸An puee bi kpíì, di sá yii bi nìn lóò dinyil. Bi nìn kpíì bi-gbaandi pu.

²⁹Ŋma di ŋúń ki jɔ́m̀ yilpu ki cúuń Iciin ki yōoǹní-i doooo yilpu ki kpákatìń ní?

³⁰Ŋma di ŋúń ki dūtì dimɔɔl ki ká-i ki cáań-i ki kpántì sindaariyamɔnti?

³¹Báà ubɔ kaa nyí Iciin saŋŋu àá ki dākafì ki túuǹ nsan ŋun di cáǹ i-laŋkee[19].

³²Ama Unimbɔti un nyí tikɔkɔee cáá Iciin, u dū u-nyil ní ki ká-i[20]. U bɔ́ntì kitiŋ dibaba pu ní kí nīn cá jaanjaan ní ki dū tiwaŋkuti tin cáá ataa anaayee ki gbéeǹ-kì.

³³Úǹ di tūǹ ŋwalifi ní ŋú búntí. U yaa yíiń-ŋuee, ŋu tɔ́-u ní ŋu-wunti jìkì.

³⁴Iŋmalbi bí i-paaŋyi pu ní ki ŋmíntí nì dipɔɔpindi[21].

³⁵Unimbɔti yaa yíiń-iee, i kíikí ní yii: «Ti sèé!» I ŋmíntí nì mmɔn ní ki tìì un di náań-iee.

³⁶Úǹ di sá ti-Nimbɔtiu, waa cáá juti.

³⁷U ká kisàmbiki kin cáǹ Iciin ceeyee ní ki dūu dàkā Jaakɔb u-tɔntɔnliu nì Isirayeel un u néeń tikpilee.

³⁸Míǹ boon ní Iciin dɔ́miń kitiŋ pu ní ki kāl̀ binib kansikin[22].