Read Ntcham Baruch 4 Bible Online

Baruch 4 - Ntcham bible

Baruch 4

¹Iciinee, Unimbɔti marab gbɔŋku dee, an sá marab bin bí kí nīn cá jaanjaanee ní. Bin ŋúb́ marab gbantee làá nīn bí dimaŋfalin, ama bin dū-bi ki fée làá kpú[23].

²Jaakɔb naantiibi, fàtīí gítiḿmaan i-cee kí cúú-i! Nín̄ còom̄ ki dīmaan i-walfiŋu nín ŋmíntí-ni puee.

³Ní taa dū ni-nyooti kí tīī biba, kí taa dū ni-yimɔɔl kí tīī ditimbuncandi diba.

⁴Timbi Isirayeel yab, ti bí mmɔnneeee! Kun puee an pú-ti tí ŋmā kí béé tin fáatiǹ Unimbɔtee!

⁵M-nibul, ká kunyannyaau, sii un pu bi gbíntìi téetí Isirayeel puee!

⁶Bi nìn dū-ni ki nyáfiǹ atimbun, ama an kaa nìn sá bí nàan̄-ni. Unimbɔti nìn dū-ni ki líiǹ ni-nannanliibi, kun puee ni nìn gbítì u-ŋuul.

⁷Ni nìn ŋá saraabi ki tīī arasiniibi kaa ŋá ki tīī Unimbɔti, ki kɔ́ǹ ni-náanliu diŋuul[24].

⁸Ni nìn súntì talku Nimbɔtiu un di nìn kpíiǹ-nee pu. Ni nìn kɔ́ǹ ni-na Jeerusaleem un di lōō-nee kunimbaau.

⁹Jeerusaleem nìn ká Unimbɔti ŋuul nín bíi jēetí ni-puee ní ki lī yii: «Pīlifìmaan, Siiyɔn kɔŋkɔnnaatɔb, Unimbɔti yāntì nnaabukpaan ŋubɔ jéetì m-pu[25].

¹⁰M ká ti-Dindaan Unimbɔti nín yāntì m-jipɔmbi nì m-bisalib búntì kuyuŋu puee.

¹¹M nìn lōō-bi mmɔnni ní, ama nì kunimbaau nì nsiim poon ní m yāntì bi búntì.

¹²M yaa kpántì ukpiipu ní tikpil dū-mi ki fée, báà ubɔ ń taa fàal̀. M-biyaamu kpitii pu ní m kíǹ m-baba, di sá yii bi fātì bi-boon ki tīī Unimbɔti Marau.

¹³Baa ŋúb́ u-bɔkpaaŋaaa, kaa nóó u-marabaaa, kaa tí dī deedee saŋŋu ŋun u dàkā-bee.

¹⁴Siiyɔn kɔŋkɔnnaatɔb, dāam̄maan! Ní téetí ti-Dindaan nín yāntì m-jipɔmbi nì m-bisalib búntì kuyuŋuee pu!

¹⁵U cáań ditimbundi din nyánní ndandatee ki tɔ́ bi-pu, ditimbundi din cáá inimbinaakulim ki sòoǹ isooncaanee. Dàa tɔ́ utikpilaaa, kaa sūǹ kibiki mun saai[26].

¹⁶Bi yōoǹ ukpiipu bineeŋkaamu ki búntì ní ki yāntì u kíǹ u-baba kaa ti cáá mbinimpubiyaamu.»

¹⁷M-biyaamu, mana ní m làá ŋmā kí jòoń-ni?

¹⁸Un di cáań nnaabu nee ki tɔ́ ni-puee, úǹ di làá nyāntí-ni ni-nannanliibi ŋaan.

¹⁹Nín̄ cámaan, m-biyaamu, nín̄ cámaan! Di sá yii mamee, bi dū-mi ki fá m kíǹ m-baba ní.

²⁰M cúú dijiŋaabɔkutil ki pēetì ki dū kpɔsata ki lōoǹ. M làá nīn kūuntí ki yíì ti-Dindaan ní m-maŋfal wiiŋyi kɔkɔ poon.

²¹Kámaan kunyannyaau, m-biyaamu! Kúuǹ kí yíiḿmaan Unimbɔti! U làá fīī-ni kí nyāntí bin wɔ́b́-nee ŋaan, u làá fīī-ni kí nyāntí ni-nannanliibi ŋaan.

²²Mamee, ti-Dindaan pu ní m máká yii u làá fīī-ni. Unimbɔti circirdaan tīī-mi mmɔn: ti-Dindaan un di sá ni-fiiliuee cee ní disaasɔl làá nyānní an kaa làá yúntí.

²³Di sá yii nì kunimbaau nì nsiim ní m yāntì ni búntì. Ama nì mmɔn nì dipɔɔpindi ní Unimbɔti làá fàtīí gíiǹní-ni kí tīī-mi kí nīn cá jaanjaan[27].

²⁴Díǹ nee, Siiyɔn kɔŋkɔnnaatɔb wāĺ ni nín bí kuyuŋunee. Ama an kaa làá yúntí, bi làá ká difiil nín làá nyānní ti-Nimbɔtiu cee puee. Difiil gbantee làá dāan̄ nì ti-Dindaan nyookpaanti nì u-nyaaŋku ní.

²⁵M-biyaamu, ní fōō Unimbɔti ŋuul din jéetì ni-puee nì kimɔtii. Ni-nannanliu yāntì ni jíń falaa, ama an kaa làá yúntí ni làá ká u-nàantam, ní ní tāā u-sil kí nákań kitiŋ[28].

²⁶Bi dū m-biyaamu mun pɔ̀fèe ki dī isan in cáá ataŋkpeeyee poon. Bi yōoǹ-mu kii kupicaŋkpuŋu kun binannanliibi fìkēe.

²⁷M-biyaamu, kámaan kunyannyaau, kí kúuǹ kí yíiń Unimbɔti. Di sá yii un di cūnnì-ni niinee làá téetí ni-pu.

²⁸Ni nìn ká nlandɔkɔ ki fātì ni-boon ki tīī Unimbɔti. Too kɔŋkɔnnee ní fàtīí gítiń u-cee, kí pɔ́ɔǹ míǹ saalaa pu kí nyàab̀-u.

²⁹Di sá yii un di cáań nnaabu nee ki tɔ́ ni-puee, úǹ di làá tí fàtīí fīī-ni. U làá tīī-ni mmɔn ŋun làá nīn bí ki cá talkuee.

³⁰Jeerusaleem, ká kunyannyaau! Unimbɔti un pú-si diyindee[29] di làá ŋméeǹ-si.

³¹Mbusu dɔ̄ ki cí ntimu mun sāaǹ-si ní ki fàal̄ a-lítitam puee!

³²Mbusu dɔ̄ ki cí ntimu mun di cúú a-biyaamu kuyuŋuee! Mbusu dɔ̄ ki cí kitiŋ kin di fōō a-jipɔmbee!

³³Kii a nín lítì an mɔ̄ǹ-kì kì fàal̄ a-nàantam pu puee, míǹ mbaantiim ní bi yaa láa nāaǹ ki muee, kì làá dāá nīn bí kunimbaaun.

³⁴M làá dāá yòon̄ ki-nib bin wīikí ki tìì-kì mmɔnee, ní ki-lambil ń dāá kpántí kunimbaau.

³⁵Ti-Dindaan làá dāá yàntī ŋŋmi ń fōō-kì iwiin kupaau, ní arasiniibi ń dāá kɔ́ ki-pu kí gíti yúntí[30].

³⁶Jeerusaleem, kpèè ŋwìiń nyalaŋki pú, a làá ká mmɔn ŋun Unimbɔti cāabìń-see!

³⁷Kpèè, a-jipɔmbi bin a nìn yāntì bi búntèe di dòońee! Unimbɔti circirdaan dū u-nyɔɔbundi ki kóoǹ-bi ŋwìiń nyalaŋki pú ki cáa sāā ŋwìiń jeetilaŋki pú ki kpáfì. Bíǹ di dòoń ki fàal̀ Unimbɔti nyooti puee[31].