Read Ntcham Baruch 5 Bible Online

Baruch 5 - Ntcham bible

Baruch 5

¹Jeerusaleem, pèetī a-falaau nì a-nandaŋku bɔkutil, ní kí dū Unimbɔti nyooti wannyɔkɔntikaati kí pèen̄ kí nīn cá jaanjaan.

²Dū deedee un di nyánní Unimbɔti ceeyee kí pèen̄ kii dibɔkutilee. Dū ti-Dindaan nyooti kí cíkiń a-yil kii kibeefuuliiyee[32].

³Tiŋman, Unimbɔti làá lēē a-nyaaŋku kí dàkà kitiŋ kɔkɔ.

⁴Kpèè, diyindi din Unimbɔti làá tīī-si kí nīn cá talkuee sèé: «Difiil gbansɔŋfiŋu nì deedee nyooti[33]».

⁵Yīkìm̄, Jeerusaleem! Jɔ̄m̀ kí tɔ́kɔń dijool yilpu kí kpèè ŋwìiń nyalaŋki pú. Kpèè ti-Dindaan nyɔɔbundi nín kóoǹ a-biyaamu ŋwìiń jeetilaŋki pú ki cáa sāā ŋwìiń nyalaŋki pú ki kpáfì puee. Mu bí mmɔnni yii Unimbɔti téetì mu-pu.

⁶Mu nìn cōom̀ ní ki nyáń ní mu-nannanliibi téekí-mu. Ama Unimbɔti làá yàntī bí túń-mu tinyool poon kii ubɔtee kí fàtīí gíiǹní a-cee.

⁷Di sá yii Unimbɔti tīī mara yii bí gbá ki kpìtī ajoon ŋin fɔ̀kɔ̀ee kɔkɔ nì cannaaku gbantammu. U gbíŋkì atantaka ní kitiŋ tāntì párrr[34]. U ŋá míǹ Isirayeel yab ń ŋmā kí còom̀ nì dimákal Unimbɔti nyooti poon.

⁸Úǹ di tí tīī mara ní kupɔɔu nì isufi in sɔ́fèe bɔ́ntì i-booŋyi ki tīī Isirayeel yab.

⁹Tiŋman, Unimbɔti làá fàtīí gíiǹní Isirayeel yab nì dipɔɔpindi, kí dū u-nyooti kí ŋmíntí-bi. U làá dāá dàkà-bi u-poommɔŋŋu ní kí fīī-bi.