Read Ntcham Ezéchiel 10 Bible Online

Ezéchiel 10 - Ntcham bible

Ezéchiel 10

¹M bí yii ḿ kpèèyee, kugbɔŋu kubɔ bí keerubimbi yilpu. Kugbɔŋuee puee, Safiir taŋkpal bí ki náań nì dibeejal.

²Unimbɔti bí unil un pēē dibɔkutipindee yii: «Kɔ́ ataa ŋin bí keerubimbi taapuee. Yáfí amɔsiŋkoon ŋin bí keerubimbi kansikinee kí gbéeǹ a-ŋaan kí cáá cùnnì kí yàaǹ kitiŋee pu.» M-nimbilaaliyin ní uninjee nín cá.

³Ŋyunti ŋun u nín cée, keerubimbee nìn bí kunimbɔtidii ŋŋaŋgiil pú ní ditagbandi diba gbí dicindi poon pú yalin.

⁴Niinee ti-Dindaan nyooti yíkì ki dāntì keerubimbee yilpu ki nín cá kunimbɔtidii punyɔkɔpu. Ditagbandee nìn gbí kunimbɔtidii ní ti-Dindaan nyooti nìn ŋmíntí dicindi kɔkɔ.

⁵A yaa nìn bí dicindi boon púee, a nìn gbìl̀ keerubimbi feeŋyi nín nìn ŋáań kuwoou kuŋyee pu. An nìn bí kii Unimbɔti Mpɔŋkɔdaan yaa bíi sòoǹ u-neel nín bí puee ní.

⁶Uninja un nìn pēē ŋŋaapiin bɔkutilee nìn yú ki kɔ́ĺ ditaal diba. Ŋyunti ŋun Unimbɔti nìn tīī-u mara yii ú lēē ŋŋmi ŋun bí ataayee kansikin keerubimbee kansikinee ní u cūtìi yúl̀ ki kɔ́ĺ ditaal gbanti.

⁷Keerubimbee kansikinee, unil ubɔ nìn tāntì u-ŋal ki túĺ ŋŋmi ŋun bí bi-kansikinee. U lēē amɔsiŋkoon ki gbéeǹ uninjee ŋaaŋyi ní úǹ cáa búntì.

⁸Niinee tiba nyáń keerubimbee feeŋyi taapu ki náań nì nniŋal.

⁹M gíti bí yii ḿ kpèèyee, ataa anaa dee, ditaal diba bí ki kɔ́ĺ keerubimbee ubɔ. Ataayee nìn jìl̀ kii ditaŋkpamɔntiil din bi yíì Kriistooliitee ní.

¹⁰Ataayee nìn náań ní ki bí kii ŋi kɔ́ tɔbinee.

¹¹Ŋi nìn ŋūǹ kí cù ajannaatil pú kaa māntì. Keerubimbee yaa fātì bi-nimbiiŋyi ki túĺ laakiŋyee, niin ní ŋi cá kaa fàtī ŋi-ba.

¹²Keerubimbee wunti kɔkɔ nì bi-boon nì bi-ŋalii nì bi-feeŋyi nìn sá animbil ŋma ní ki jìl̀, míǹ mbaantiim ní ataayee mun nìn bí.

¹³M nìn gbìl̄ bi yíiń ataayee yii «kunaakpaabuŋŋu.»

¹⁴Keerubim kamaa nìn cáá inimbiin inaa: Mpeekaa nìn sá Keerubim nimbiin, ní nliliiti sá unil nimbiin, ní ntataati sá gbikinti nimbiin ní nnanaati sá ukaalun nimbiin.

¹⁵Keerubimbee nìn ŋūǹ kí yīkì kí dàntī kutaa. Bi náań nì tiwan tin cáá kufoou m nìn ká Keebaar mɔɔgbandee ní.

¹⁶Bi yaa nìn còom̄ ki cée, ataayee nìn táá-bi ní ki còom̄ ki cá. Bi yaa nìn kpátì bi-feeŋyi kí yīkì kí ŋàaǹee, ataayee nìn táá-bi ní.

¹⁷Bi yaa nìn yúl̀ee, ataayee mun nìn yūlifí ní. Bi yaa nìn yíkì ki dāntèe, ŋi mun nìn yíkí kí dàntī ní, di sá yii tiwan tin cáá kufoouee di nìn kpāantí-ŋi ki còom̄.

¹⁸Ti-Dindaan nyooti nìn yíkì kunimbɔtidii punyɔkɔpu ní ki cūtì ki kíǹ ki bí keerubimbi pu.

¹⁹Niinee keerubimbi kpátì bi-feeŋyi ní m ká bi yíkì kitiŋ, bi nì ataayee dicilpu ki nín cá. Bi cūtìi yúl̀ ki kɔ́ĺ kunimbɔtidii punyɔkɔki kin bí ŋwìiń nyalaŋki púee. Isirayeel Nimbɔtiu nyooti nìn bí bi-pu ki jìl̀.

²⁰Keebaar mɔɔgbaŋŋi puee, m nìn ká tiwannáaŋkaal tibaantiil gbanti yú Isirayeel Nimbɔtiu taapu. Niinee ní m béè yii an sá keerubimbi.

²¹Bi-kɔkɔ nìn cáá inimbiin inaa ní ki cáá ifeen inaa ní ki cáá iŋal, iba náań nì unil ŋalii ki bí bi-feeŋyi taapu.

²²Bi-nimbiiŋyi nìn náań nì bin m bàà ká Keebaar mɔɔl caŋinee. Keerubimbee nìn còom̄ ní ki túĺ bi-nimbiin cáaa.