Read Ntcham Ezéchiel 12 Bible Online

Ezéchiel 12 - Ntcham bible

Ezéchiel 12

¹Ti-Dindaan sòon̄ nì mi yii:

²«Nisaaleen, a kóò pɔɔgaatib kansikin ní. Bi cáá animbil ní kaa wāĺ, ní ki cáá atafal kaa gbìl̀. Di sá yii bi sá pɔɔgaatib ní[6].

³Sii, nisaaleen, bɔ́ntí a-tɔkɔl kii a cá kuyuŋuee ní kí búntí kuyuŋu ŋwiimpu bi-nimbilaaliyin! Yīkì laakin a bée kí nīn cá laaba kuyuŋu bi-nimbilin. An yaa yíì bi làá gbìl̄ taapu yii bi sá pɔɔgaatib.

⁴Nyāntí a-tɔkɔl din a bɔ́ntì ki cáa cá kuyuŋuee mmɔŋki ŋwiimpu báà ŋma ń wāl̀. Kujoou yaa jóotèe, á nyā kii bin bi cúú kuyuŋuee nín nyēē puee bi-nimbilaaliyin.

⁵Á lùkù kí cíĺ digundi din bi máń ki tú kitiŋee bi-nimbilaaliyin ní kí dī niin kí nyā.

⁶Á yòon̄ ditɔkɔl kí páań a-gbigbipeeu pu bí nīn wāĺ-si ní á nyāntí-dì dibɔmbɔndin. Á dū tiwan kí bìin̄ a-nimbiin kí taa kpèè kitiŋ nee. Di sá yii a làá nīn sá kii kudaaŋŋuee ní ki tīī Isirayeel yab.»

⁷Niinee ní m ŋá kii ti-Dindaan nín kpáafì-mi puee. M nyántì ditɔkɔl din m bɔ́ntì kii uyumbu tɔkɔlee ŋwiimpu. Kujoouee ní m dū m-ŋal ki lùkū ki cíl̀ digundi din bi máń ki tú kitiŋee ní ki nyántì ditɔkɔl dibɔmbɔndi poon ní ki yōoǹ ki páaǹ m-gbigbipeeu pu bi-nimbilaaliyin niin.

⁸Kutaa wúntì kutaafaauee ní ti-Dindaan sòon̄ nì mi yii:

⁹«Nisaaleen, mimmee Isirayeel yab pɔɔgaatib nee kaa bālifì-si yii ba ní a ŋáańaaa?

¹⁰Tùkù-bi yii: <Ti-Dindaan Unimbɔti nín sòon̄ puee sɔ̀. Tibɔti nee sá ki tīī dibɔtibil din bí Jeerusaleemee nì Isirayeel yab bin kɔkɔ bí ki kóò kitiŋ nee poonee ní.>

¹¹Tùkù-bi yii a ŋá míǹ kí tīī kudaaŋŋu ní. Kun a ŋá nee, kun làá bàń bi-puee dee, di sá yii bi làá cúú-bi kí cùnnì kuyuŋu.

¹²Dibɔtibil din bí bi-kansikinee làá dāá yòon̄ u-wanti kí páań u-gbigbipeeu pu ní kí nyā dibɔmbɔndin. Bi làá dāá sāā kí cíĺ digundi ní ú dī niin kí nyā. U làá dāá dū tiwan kí bìin̄ u-nimbiin án nín làá ŋá pu ú taa ti ká kitiŋ nee nì u-nimbiliŋee.

¹³M làá dāá dū m-laaŋku kí tɔ̄ u-pu ní m-taliŋku ń sàl̄-u. M làá cùnnì-u Babiloon, Kaldee yab tiŋkin. Ama waa làá ká kitiŋ gbanti ní kí kpú.

¹⁴M làá yàaǹ bin kɔkɔ māntìi tú-uee nì u-tɔntɔnliibi nì u-janjaliibi ijaan kɔkɔ pu. Míǹ boonee ní ḿ dū kitàataajiki kí jà-bi.

¹⁵Bi làá dāá béé yii m sá bi-Dindaan, ŋyunti ŋun m yaa láa jìn̄-bi ki yàl̄ atimbun kɔkɔn nì ntimu kupaau poonee.

¹⁶Ama m làá dāá kíń bi-kansikin binikaaŋkaabi bin làá dāá ŋmátí kí nyā kujaaun nì ŋkùmin nì bìlbil kúminee. Bíǹ làá dāá māafì ntimbiil tuuŋŋi ŋin kɔkɔ bi ŋée. Ŋyunti gbantee, bin kóò niinee làá dāá béé yii man di sá bi-Dindaan.»

¹⁷Ti-Dindaan sòon̄ nì mi yii:

¹⁸«Nisaaleen, a làá dāá jī a-jinti ní a-wunti jìkì, ní kí nyɔ̀ a-nyim nì dipɔɔbiildi nì inimɔɔn poon.

¹⁹Á dāá tùkù kitiŋ nee nib yii: Ti-Dindaan Unimbɔti nín sòon̄ nì bin kóò Jeerusaleem ki bí Isirayeel tiŋkinee pu puee sɔ̀. Bi làá dāá jī bi-jinti inimɔɔn poon ní kí nyɔ̀ bi-nyim dipɔɔbiildi poon. Di sá yii bi làá dāá nàan̄ bi-tiŋki. Tiba nì tiba kaa làá dāá gíti kíń doo, di sá yii bin kóò kitiŋ nee dū tipɔmbɔti ki gbéeǹ-kì.

²⁰Ntimu mun poon binib nìn kóòyee làá kpántí adigbuŋkati ŋma, ní kitiŋ nee ń kpántí kuteeu. Niinee ni làá dāá béé yii m sá ni-Dindaan.»

²¹Ti-Dindaan sòon̄ nì mi yii:

²²«Nisaaleen, ba pu ní ni gà Isirayeel tiŋki dilaŋkpandi nee yii: <Iwiin fɔ̀kɔntí ki cá, ama ní an kaa ŋáań kii an nín lēē ki dàkā puee ní>?

²³Too tùkù-bi yii ti-Dindaan Unimbɔti nín sòon̄ puee sɔ̀. M làá kúntí dilaŋkpandi gbanti. Baa làá ti gāā dilaŋkpandi gbanti Isirayeel tiŋkin. Ama á tùkù-bi yii: <Iwiin tóobiń, míǹ ní an nín lēē ki dàkā puee kɔkɔ làá ŋá.>

²⁴Di sá yii nnyimɔn leedakaŋ kaa ti làá nīn bí, ní ubɔ mun kaa làá ti sòoǹ kí mɔ̄ntì yii tiba làá ŋá Isirayeel yab kansikin.

²⁵Di sá yii m sá ni-Dindaan ní. M sòoǹ tin m cáá kí sòoǹee, ní án lafun làá ŋá míǹ kaa làá tàan̄. Tiŋman pɔɔgaatib, ni-yuntii nee poon ní m làá sòoǹ ní kí ŋá m nín sòon̄ puee. Ti-Dindaan Unimbɔti di sòon̄ míǹ.»

²⁶Ti-Dindaan sòon̄ nì mi yii:

²⁷«Nisaaleen, Isirayeel yab nín bí ki sòoǹ tiŋyee sèé: <Kijapaai nee leedakaŋ sá iwiin iba poon bɔti ní. U bíi sòoǹ ki nàatī iwiin in dátèe poon bɔti ní.>

²⁸An pu ní an sá á tùkù-bi yii ti-Dindaan Unimbɔti nín sòon̄ puee sèé: <Tin m sòon̄ee, m làá yàntī án ŋá míǹ kaa làá tàan̄.> Ti-Dindaan Unimbɔti di sòon̄.»