Read Ntcham Ezéchiel 13 Bible Online

Ezéchiel 13 - Ntcham bible

Ezéchiel 13

¹Ti-Dindaan sòon̄ nì mi yii:

²«Sii nisaaleen, fōō m-bɔti kí nàatī bin yíì bi-ba yii bi sá Unimbɔti bɔnaatiliibi Isirayeel tiŋkin ní ki nàatī tin bíǹ bi-ba lèe. Tùkù-bi yii bí pīlifì m-nyɔɔbundi.

³Mama ni-Dindaan Unimbɔti bíi lì yii nnaabu làá jēetí bibɔnaatiliibi bin kaa nyí tiba gbantee pu! Bi nóó tin bíǹ bi-ba bɔ́ntì kí sòoǹee ní ki nāantí bíǹ bi-ba leedakaŋ.

⁴Isirayeel yab, ni-bɔnaatiliibi bí kii ŋŋɔkɔmu mun tú ki yìiǹ adigbunnee ní.

⁵Baa jɔ́m̀ ki ŋéeb́ abun ŋin bí digundi puee, kaa tí máń digundi din làá wúń ni-pu ní ŋmā kí já kujaau ti-Dindaan wiiŋŋu dalee[7].

⁶Bi cáá inyimɔn leedakaŋ ní tin bi sòoǹ yii án làá dāan̄ee kaa sá ibaamɔn. Bi lì yii: <Ti-Dindaan nín lī puee sèé>, ama ní man ni-Dindaan kaa tú-bi. Ní bi kā ki cí yii ḿ ŋá tin bi sòon̄ee kí tīī-bi!

⁷Ama ní m bí-bi yii: <Aleedaka ŋin ni kée kaa sá inyimɔn leedakaŋaaa? Tin ni sòon̄ yii an làá dāan̄ee kaa sá inyimɔnaaa? Ni gà ni-biŋŋi ki lì yii ni nàatī tin ti-Dindaan tīī-ni ní nàatēe, ama ní maa kpáàa sòon̄ nì ni gba!

⁸Too, man ni-Dindaan Unimbɔti bíi sòoǹ yii: ni nín ŋá pu ki yāntì inyimɔn nyɔɔbuŋŋi nì inyimɔn leedakaŋee gbītì an kɔkɔ puee, m làá jáǹ-ni.> Man ni-Dindaan Unimbɔti nín sòon̄ puee dee!

⁹«M làá dàkà bibɔnaatiliibi bin kántì inyimɔn leedakaŋ ki sòon̄ tinyimɔmbɔtee m-pɔŋŋu. Baa ti làá nīn cáá mpaan m-samaau kansikin. Baa làá ŋmà bi-yiŋŋi Isirayeel nibul[8] gbɔŋkun ní baa ti làá gítí bi-tiŋkin mun. Niinee bi làá béé yii m sá ni-Dindaan Unimbɔti.

¹⁰«Bibɔnaatiliibi bí ki kíiĺ m-nibul ki lì yii ŋgbansɔŋfi bí, ama ní ŋgbansɔŋfi kaa bí. M-samaau bíi māā digundi ní bíǹ bí ki pōontí-dì.

¹¹Too, tùkù bin bíi pōontí gbanti yii: Digundi làá lítí! Utaakpaan ubɔ làá nì ní ataanyiŋkumbil ń lítí ní kubuŋkpaaŋŋu ń jītí.

¹²Digundee yaa láa lítèe, bi làá dāá bàlifì-ni yii: <Ni nín póoń digundi puee bí la?>

¹³An ní man ni-Dindaan Unimbɔti nìn bíi tùkù-nee yii: M-ŋuul poonee, m làá cáań kubuŋkpaaŋŋu, ní m-bum ń cáań utaakpaan ní ataanyiŋkumbil ń lítí kí nàan̄ tikɔkɔ.

¹⁴M làá kpēelikì digundi din ni póońee. M làá téé-dì kí lúkú kitiŋ ní di-nyeel ń nyā kí páań mpaampiin pu. Di làá lítí ní kí nà-ni dúsi dusi ní ní béé yii m sá ni-Dindaan.

¹⁵M làá yàntī m-ŋuul ń tɔ̄ di-tundi digundi nee nì bin póoń-dèe pu kí cáá kátí. Bi làá dāá tùkù-ni yii: <Digundee kaa ti bí! Ubɔ kaa ti bí kí póoń-dì!

¹⁶Isirayeel bɔnaatiliibi bin nìn sòoǹ ki nàatī Jeerusaleem puee kaa ti bí. Bi nìn kāntí aleedaka ki lì yii ŋgbansɔŋfi bí, ama ní ŋgbansɔŋfi kaa bí! Man ni-Dindaan Unimbɔti di sòon̄.»

¹⁷«Nisaaleen, pīlifì, sòoǹ nì Isirayeel nimpoobi bin bɔ́ntí tin bi lèe ki cáa nàatēe, fōō Unimbɔti nyɔɔbundi kí dūú nàatī-bi.

¹⁸Tùkù-bi tin man ni-Dindaan Unimbɔti sòon̄ee yii: Nnaabu làá jēetí ni-pu! Ni cáá igban ki lù abɔmbil ki fūuntí, ní ki lù iŋaabu nì i-bulifi ki tìì binib kɔkɔ kí ŋmā kí nīn cáá mpɔn bi-pu. Ni là kí fōō m-nibul maŋfal kí gāā ni-bindi ní ki kpáafí nimbi ni-ba yal.

¹⁹Ni bíiĺ-mi m-nibul nimbiin kí ŋmā kí ká ɔɔji aŋaŋkul akaaŋkaa nì kpɔnɔb bikaaŋkaabi. Ni nín bíi mɔ́ntí m-samaau un di néeń ki pílifí tinyimɔmbɔtee, ni bíi kù bin kaa bàà máaǹ ŋkúmee ní ki yàntī bin kaa bàà máaǹ kí nīn bí dimaŋfalinee bí dimaŋfalin dee.

²⁰An pu ní man ni-Dindaan Unimbɔti bíi lì yii m làá jáǹ ni-bɔmbiliŋ ŋin ni cáa sàl̀ bin kíǹee. M làá dáaĺ-ŋi kí tìfì kí fúutí ni-ŋaliyin ní kí fīī bin ni cúúyee kí líí.

²¹M làá dáaĺ ni-ŋaabui kí cátí ní kí fīī m-samaau kí nyāntí ni-ŋaan. Naa ti làá ŋmā kí dū-bi kí kpántí ni-wanti tin ni cúúyee ní ní béé yii man di sá ni-Dindaan.

²²Ni dū ni-nyimɔŋyi ki yɔ̄tì deedeedambi wunti ŋyunti ŋun ní maa bàà là bi-wunti ń yɔ̀tēe. Ni tīī binikpitib kunyannyaau, ki pīiǹ-bi nsan bí fá bi-bimbikpitim kí ŋmátí.

²³Míǹ puee, naa ti làá ká inyimɔn leedakaŋ kaa ti làá sòoǹ tinyimɔmbɔti. M làá fīī m-nibul kí nyāntí ni-ŋaan. Mimmee ni làá béé yii m sá ni-Dindaan.»