Read Ntcham Ezéchiel 14 Bible Online

Ezéchiel 14 - Ntcham bible

Ezéchiel 14

¹Dalbee Isirayeel tindaŋkpilib biba dɔ́miń ki kāl̀ m-nimbiin.

²Niinee ní ti-Dindaan bí-mi yii:

³«Nisaaleen, binib nee tú bi-waaŋi bi-pɔbiliŋin ní. Bi-nimbikpeeŋu pée cɔ́ kun di yàntī bi ŋáań ikpitee pu ní. A dàkafī yii m làá yàntī bí bàlifì-mi tiba ḿ kíí-baaa?

⁴An puee sòoǹ nì bi kí tùkù-bi tin man ni-Dindaan Unimbɔti lēe yii: Tí dūú ŋmàntī kii Isirayeel yab kansikin ubɔ tú u-waaŋi u-pɔbilin ní u-nimbikpeeŋu pée cɔ́ tin di yàntī u ŋáań ikpitee pu, ní boonee ki dɔ́miń kí bàlifì Unimbɔti bɔnaatiliu, man ni-Dindaan di làá kíí-u m-ba. M làá kíí-u kí nóó nì awaa ŋin nyɔkɔm u cááyee ní.

⁵M làá ŋá míǹ ní kí gbēē Isirayeel yab bin dū-mi ki fá ki kíǹ ki nóó awaayee pɔbil.

⁶An pu ní á tùkù Isirayeel yab yii: <Ti-Dindaan Unimbɔti bí-ni yii ní kpántí ni-bimbim. Fàtīmaan ni-boon kí tīī ni-waaŋi ní kí dū ni-timbiilituuŋŋi kɔkɔ kí fá.>

⁷«Isirayeel niliu ubɔ àá unicaan un kóò Isirayeel tiŋkinee yaa dū-mi ki fá ní ki yāntì tiwaabɔti jíń u-pɔbil ní kaa fātì u-boon ki tīī tin di yàntī u ŋáań ikpitee, udaan yaa dɔ́miń m-bɔnaatiliu cee kí bàlifì kí béé m-lammee, man ni-Dindaan di làá kíí-u m-ba.

⁸M làá jáǹ unil gbanti. M làá yàntī ú kpántí ŋabika bí nīn kíǹ ki cáa gà ilan. M làá nyāntí-u m-samaau kansikin ní ní béé yii man di sá ni-Dindaan.

⁹«Ama ubɔnaatil yaa yāntì an ŋmātiǹ-u ní u gāā u-bindi ki kíí udaan tibee, mimmee an dàkà yii man ni-Dindaan di ŋmātiǹ ubɔnaatil gbanti. M làá dàkà udaan m-pɔŋŋu ní kí nyāntí-u m-nibul Isirayeel yab kansikin.

¹⁰Ubɔnaatil gbanti nì un dɔ́miń ki bālifèe kɔkɔ ŋá ikpitibaanti ní bi làá túń bi-kpitii kpuulool.

¹¹An yaa ŋá mimmee, Isirayeel yab kaa ti làá gáatí kí wàatī-mi. Baa ti làá ŋá ikpiti kí kɔ́ǹ bi-ba tijɔkɔndi. Ama bi làá nīn sá m-nibul ní man ḿ nīn sá bi-Nimbɔtiu. Man bi-Dindaan Unimbɔti di lī míǹ.»

¹²Ti-Dindaan bí-mi yii:

¹³«Nisaaleen, kitiŋ kiba pu nib yaa kaa yúl̀-mi deedee ki ŋá ikpitee, m làá dàkà-bi m-pɔŋŋu. M làá bīil̀ bi-kpaajinti tin bi kpáafèe ní kí yàntī ŋkùm ń nyā, ní kí kpɔ̀ kí céetí kitiŋee nib nì ki-waŋkuti.

¹⁴Báà binib bita nee, Noowa nì Daniyeel nì Yoob yaa bí kitiŋ gbanti nib kansikin, bi-deedeeu làá fīī bíǹ ŋmaniŋma ní. Man ni-Dindaan Unimbɔti di lī míǹ.

¹⁵«Àá tí lì yii m dū ipeecuncuti ki tɔ́ kitiŋ gbanti nib pu. Kitiŋee làá kpántí kii kuteeuee ní, di sá ipeel làá kpɔ̀ kí céetí ki-nib ní ipeel puee, ubɔ mun kaa ti làá kíí kí dī niin.

¹⁶Báà binib bita gbanti yaa bí kitiŋee poon, bíǹ baba di làá ŋmátí. Man ni-Dindaan Unimbɔti un bí dimaŋfalinee di bíi lì yii, baa làá ŋmā kí fīī bíǹ bi-ba biyaamu gba, ní kitiŋee làá kpántí kuteeu.

¹⁷«Àá m yaa cáań kujaau ki tɔ́ kitiŋee nib pu ní ki pú bijanjaliibi nsan bí kpɔ̀ kí céetí kitiŋee pu nib nì ki-waŋkuti,

¹⁸ní binib bita gbanti yaa kóò kitiŋee poonee, bíǹ baba di làá ŋmátí. Man ni-Dindaan Unimbɔti un bí dimaŋfalinee di bíi lì yii, baa làá ŋmā kí fīī bíǹ bi-ba biyaamu gba.

¹⁹«M yaa tí cáań bìlbil kúm ki tɔ́ kitiŋee nib pu ki kpáatì m-ŋuul ki sītì bi-pu kí kpɔ̀ kí céetí ki-nib nì ki-waŋkuti,

²⁰ní Noowa nì Daniyeel nì Yoob bí kitiŋee poon, bi-deedeeu làá fīī bíǹ ŋmaniŋma ní. Man ni-Dindaan Unimbɔti un bí dimaŋfalinee di bíi lì yii, baa làá ŋmā kí fīī bíǹ bi-ba biyaamu gba.»

²¹Míǹ boonee ní ti-Dindaan Unimbɔti bí-mi yii: «M dū inaabukpaan inaa ki tɔ́ Jeerusaleem pu kí kpɔ̀ kí céetí binib nì tiwaŋkuti. Inaabu gbanti di sá kujaau nì ŋkùm nì ipeecuncuti nì bìlbil kúm.

²²Ama biba làá ŋmátí. Bi làá nyāntí bininjab nì binimpoobi kitiŋin. Bi làá dāan̄ kí kūtì ni-pu. Ni làá dāá ká bi-bimbim nì bi-tuuŋŋi ní kí tīī-mi mmɔ́ɔn m nín dū nnaabukpaan ŋun ki tɔ́ Jeerusaleem puee.

²³Ni làá kpántí ni-landɔkɔŋu, di sá yii ni làá ká-bi ní kí béé yii m cáá nsan kí ŋá kitiŋ nee kii m nín ŋá-kì pu nee. Man ni-Dindaan Unimbɔti di sòon̄ míǹ.»