Read Ntcham Ezéchiel 15 Bible Online

Ezéchiel 15 - Ntcham bible

Ezéchiel 15

¹Ti-Dindaan sòon̄ nì mi ki bí yii:

²«Nisaaleen, bufiinyisubu cáá kunyampoou ki jítiǹ isufi in kɔkɔ kíǹeeee? Mimmee bu-paŋŋi cáá kunyampoou ki jítiǹ kubambaŋŋun sufii paŋŋaaa[9]?

³Unil ŋūǹ kí dū fiinyi subu kí kpítí tibaaa? Bi ŋūǹ kí dūú ŋá dikpakpaal kí sàkan̄ tiwanaaa?

⁴Bu pée ŋān̄ bí dū-bu kí tɔ̄ ŋŋmin an wà ní. Ní ŋŋmi yaa wùn̄ anyɔɔgbanliitilee, ndɔee kansikin mun wù ní. An yaa wùn̄ mimmee, bi gíti ŋūǹ kí dū-bu kí ŋá ba?

⁵Bu nín nìn sá bumɔmbuee, baa nìn ŋūǹ kí dū-bu kí ŋá tiba. Kin bu nín wùn̄ ŋŋmee ní bi gíti ŋūǹ kí dū-bu kí ŋá tibaaa? Aayee, kpataaa!

⁶«Too, man ni-Dindaan Unimbɔti nín sòoǹ puee sèé: <Kii bi nín dù bufiinyisubu dɔŋu kí tɔ̄ ŋŋmin kí yàntī isufi in kíǹee dɔyee, míǹ ní m làá wà Jeerusaleem yab.

⁷M làá jáǹ-bi. Bi dàkafī yii bi sáǹ ki nyáń ŋŋmin ní, ama ŋŋmi làá wà-bi. M yaa láa bíi jáà nì bee, ni làá dāá béé yii man di sá ni-Dindaan.

⁸M làá yàntī bi-tiŋki ń kpántí kuteeu, kun puee baa yúl̀-mi nì deedee.> Ti-Dindaan Unimbɔti nín sòon̄ puee dee.»